AKUMLO 4 - BAIBEL (BSI)

Zion Ikiqive kethiu

¹ Niwu shunayi phuphuikeu huye nhaquivae; Achineki tuquqoye alaghilalo tuleqhi pesu ngo akhani.

² Zion lo lhothemiqoye shunayi toi nighenguno akughupu ke, ikemu itehiye inapugha yeghili toi peitha nani.

³ Atinequ ghi liti tuchohiju cheni, ikemu iwu timiqoye ostrik toi pano tianuli lau ayikusa shike.

⁴ Panonguno pano nga kughunu pelo akhuno thivepeke; Khunomu panoqo tsumoamu itimi qoye achuqupu khu akhani.

⁵ Timi khunoqo achuqupu kivi chuche keno itehiye alaghilalo akhuavano thiani; Nibonilei peitha no saputhu pua keqo huye xine xigha pekile alo achuqupu lheju anike.

⁶ Ingaqo ghime huye Sodom xine ghengu no aghime tsukeu nguno akijeu shi ado kitila dolono peiveno khunomu panoqo kuphu kulupu shimove.

⁷ Niwu sakiphemiqoye murasu toi tsughukhui, choshiyi eno mutotoi ashi aji nimughuike.

⁸ Itehi panonguye khunomu mthano alaghilalo dapesu ani, thive puzu panoqo giye tsubuivae; Panongu yikoye asukithi toi asaghi khakutsuluvae.

⁹ Aghukishi lono thive kemi qoye athiuno thikeqo nguno akiviu shivae, kughengu panoqo puxulu kepu achuqupu ithumla kelauno shisheno akhuno thiveke.

¹⁰ Kutsakungo keu ni timiqo lau ighi keu lono, azanoqono amlo ighiqhiyi panoqo tianuli saputhukeqo chuniaye heqhipe lhoke.

¹¹ AMPEU no pa loghu kighide kumtsu pephe eno pa mlo kighide tuleke; Pano Zion lo ami lakhi kuyiquno tipau boqha pitipuhave.

¹² Ayeghilo kukamiqo eno kughuna kuamiye aghumino Jerusalem khagholo ilolu nani kepi pulu mono acheke.

¹³ Ikemu liwu tungkupmino axine shive eno achinemino kuqukeu ghenguno pimimokemi pithive kepu shiveke.

¹⁴ Panonguye anhethi kighichemi toi alaghi lalo itsuche eno timi jino kitiqeve kehu khunomu panoqo phi bu msave.

¹⁵ Timiqono asheshu pi, “Nonguye kitiqeve ake wuvelo! Idekevilo!” Ikehu panonguye khunomu sasumono kupokichemi shive. Ashiayehlo timiqono pi, “Panonguye hile kughunamo nani.”

¹⁶ AMPEU ye panoqo ghenguno alokumsu kuhae; pa ampino panoqo haleve. Paye achinemi ngo sakiphemi kitilamu phimove.

¹⁷ Akukuphu ighini malaye ninguno kheju ache kemu khilamu ighimo veno ninguye khepukave. Ashiayeh hami launo akukuphu ithuluni malaye kheche kemu ithumlave.

¹⁸ Aghumiye ningu jukuto ake; ninguye alaghila loghi cheiqho iqimlave. Nitsalaye hauve, ashekha tsala ighive.

¹⁹ Aluquno kunguuno kutsukhoi ihi qighikeu nguno akumthuushi panonguno ningu hakuqoqhi. Panonguno naghutolo nipapesu ighive, asayeqhalo paikhavino panonguno nihaluve.

²⁰ Nikuxu puxutsu chekeu, AMPEU no nukishekuluu akukau hu kughaluve, Ningu leighikemi launo nisusholu penike pukhu achekeu hu kughaluve.

²¹ Edom ngo Uz lo akemiqo nu alo; nonguno shiluke thaqhu alovi alo. Nongu shou ghi kutsakungo keu chenike; nongu ghi kujo kelauno aphikumsa kulokuloive nani.

²² O Zionmiqo, nongu xine ghenguno ghime keuye tava, paye hinguno alauye nongu halepuwumoae. Ikemu Edommiqo, noxine ghenguno ghime nani; eno no xineqo lhephetsu nani.