AKUMLO 3 - BAIBEL (BSI)

Ghimeqhi, Xaide eno Lajupu

¹ Niye Alhou no kishi ghimeqhi cheni keno tipau ithi akemike.

² Pano ihape akuzu kutholo suve.

³ Kimiyemo mithe no atsala kupuju tamono ighaqhi.

⁴ Pano iphilo ashipa ikholevetsu eno isaghi kuboleve tsu.

⁵ Pano akijiksa eno amlo ghuju kughukilo ikhathave.

⁶ Pano ihape khaghilomi kithimi toi akuzulo suve.

⁷ Pano ayikichhe pesu itshuve; Niye pokulupu lajupu kuhave kemi akughumi lakhike.

⁸ Kuphulepi ino ighamukuke ikemu Alhou no initsumoe;

⁹ Ikuwula kumtsulo atuqu qono ivekhaluve kehu niye kulo- kuloyi ala chewuke.

¹⁰ Pano ava lakhi toi ikhe aghi, pano abongushu lakhi toi ishou ika ikughi.

¹¹ Pano ala lono ihakuqo pupove, isutha piniyipe qhiveke.

¹² Pano pa suzu piqe eno ipesu pa piji kimijipu shike.

¹³ Pano iphilo pa piji thonhei kasuvetsu.

¹⁴ Timino atsala kupujulo ijunuqhi; niye panoqo kumtsu zukutunupu shive.

¹⁵ Pano angukashi ikughokilo khumtsayikeu zu sutsu eno khumtsayikeu kuchu kusho sutsuke.

¹⁶ Pano atu kughupo shouno ihu helavetsu eno ipelo ayevu shou ihipe.

¹⁷ Ashiaji kivi ngo alokiqi alokughu noye kiu kela niye qhoi kumsumavae.

¹⁸ Niye ado kushuwa xumae; AMPEU lau ino laju chekeu kuhavae.

¹⁹ Ino sukutu akeu eno aki kuhavekeu kukumsu huye khumtsaikeu tughuke;

²⁰ Niye tamono tipau kumsu acheni eno ingu-aghaye thibuyivae.

²¹ Tishimu ino thime hipau kumsu chilelu kelo lajupu ideghi cheni:

²² AMPEU wu ikiqivemo keu kikimiye ngo kupuqhiyikeuye achephi.

²³ Tiye inaqhe toi anile shi ani, tsukinhe ipekighi toi mutsuqheike.

²⁴ Niye kiumu kuhakemu AMPEU ani ikehu pa shou iwu lajupu qhicheni.

²⁵ AMPEU ye pa pukhu chekemi ju alo cheni.

²⁶ AMPEU wu xakulu ghenguno iquighai kheakulu shi keuye aloke.

²⁷ Nino lhothemi shi aphi lono kheakulu hipau shikalukeu pavike.

²⁸ AMPEU no ghime keulo kheakulu shi inaqhoi ngolo.

²⁹ Ninguye itsaqi qhoqhu kepu kughengu tile lajupu aghi luvike.

³⁰ Pa pelo pa gimchu kughope pa kuo akemiqo tsupelo. Thokughano pa phi chhive pelo.

³¹ AMPEU ye kupukinike eno alhokupujulo ningu milivemo nani.

³² Pano nishou amlokusapu sughiluvi ikemu pano nikimiye chekeuye mutsuqheino mutotoi ani.

³³ Kughengu paye ithithaino ni ghimeve chemo momu timiqo mlo shikighishi vetsu chemoe.

^34-36 Kughou akughumi apukhuno munudaveni, Akughushu zulono timiqo sheamzu luve tsuni eno kughono timiqo tsa kukugha suchighive tsuni keno Alhou ye tipaqo juzuve tsu nani kesha?

³⁷ Tsala AMPEU no ahza tsumo keloye khuuno tishi kulupu kya?

³⁸ Pa kichi lono akivighi akusaghi ipeghi chenike kumo kesha?

³⁹ Nixine ghenguno nighimeqhi keulo ninguye kushiye muchho acheni kya?

⁴⁰ Nilaghi jeli jukidekudai juni eno ningu AMPEU lau xaidewoni nolo.

⁴¹ Kungughalo Alhou lau nimlo xukho eno niu peqhepe inikhuni nolo,

⁴² “Ninguno axine shive eno hebideve kehu noye nikipimi pevetsumphie.

⁴³ ‘Ologhu kighide lono ni hakuqo ighi no kimiyemono ni pithiveke.

⁴⁴ Nikighinino shoxu mla kepushi khungkusu shishoi keuno onhaluveke.

⁴⁵ Nono nikugha pesu xinexigha toi shivetsuke.

⁴⁶ “Nighumi kumtsuno ni cheqhi.

⁴⁷ Hakiphikeu, kutsakungokeu eno shikupusano ni shou ikughi.

⁴⁸ Niwu timi kutsaleveke ghenguno ni nhezuno aghoki toi qowu ani.

⁴⁹ ‘Inhezuye qotamla keu ghokiti toi qolewu anani.

⁵⁰ AMPEU no Kungugha lono jupiqi moke kutolo tishi anani.

⁵¹ Niphughilo lhothelimi shou kiu shivekeno jupe imlo kighishi shive.

⁵² “kiu lonomu imithi kepu kuha keghi aghumino aghau lakhi toi ikhasuluve.

⁵³ Ni akuxu aphi lono panonguno aqohlo ivesuve eno atu pesu tipau kichi qhoveke.

⁵⁴ Azuno yimi ighiveno niye akithi kupunuve akepi kumsuve.

⁵⁵ ‘Aqoh alouno ino olau ighamuku okuke, O AMPEU,

⁵⁶ Ighugha initsulo pi ino oqhuiniju keulo nono chilutsuke.

⁵⁷ Nono ikhochile tsu eno ivilo msakevilo pike.

⁵⁸ “AMPEU, nono ithi ani kehu ixaphe- lunike ighi eno ikuxu xaluke.

⁵⁹ Isaphughi kughatha tsulo, ishou akumou shipuakeu nono ithi anike.

⁶⁰ Ighumino imithi eno panonguno ipithive niye kuchughu keu nono ithi ani.

⁶¹ O AMPEU, panonguno icheqhi keu nono chiluvae; panonguno kuchughu keu kumtsu nono ithi ani.

⁶² Atsala kupuju panonguno ighili kughano akupughu shike.

⁶³ Panonguno putho pucho ixishi acheni.

⁶⁴ O AMPEU, panonguno kiu shipuani keno tipau ghenguno aghime tsulo;

⁶⁵ Panoqo musuinivelo eno panongu pelo amlo hauve pelo!

⁶⁶ Panoqo hakuqoqhilo eno ayeghi lono panoqo jolevelo!”