AKIKIHI 9 - BAIBEL (BSI)

Hechekulu Pinye Akiniu

¹ Israilmino Ijip qhive kethiu ampe akiniulo aqhi atughiu shi akelono AMPEU no Sinai tolono Muse putsa. Pano pi

^2-3 “Hipa qhi atsala chighi abidini avelauno huthu susu Israilmiye Hechekulu Pinye Yezah yepuakeu kiqi lono pinyi wovelo eno pekepu yezah kumtsu shikupulo.”

⁴ Titoi Muse no timiqo vilo kishekulu shi Hechekulu Pinye pinyi lepi pitsu,

⁵ eno aqhi atughiulo atsala chighi abidini kijiliu panonguno Sinai to lono titoi pinyi. Timiqono AMPEU no ahza Muse tsuke toi kumtsu shikupu kulai shivetsu.

⁶ Ikemu tipa gholo timi khami akithi kumo buluveno khamiye tipa tsalani achine zah kiqi loye mithemove no akivishi Hechekulu Pinye pinyi kutokughoi lumove. Panonguno Muse ngo Aron pama lau wuno

⁷ pi, “Ninguye mithemovea kughengu ninguno akithi kumo lakhi buve ikemu kushiye ninguye Israilmi kutami gholo AMPEU lau akumllagho tsupemo kea?”

⁸ Muse no khochile, “Ino AMPEU launo mijekutsu tsa ithulumono akedolo khe aghilo” ipive.

⁹ AMPEU no Muse vilo

¹⁰ Israilmi vilo ishi pilopike, “Nongu dolo khualano momu nongu kughukomino akithi kumo bulu kelo mithemove momu kushuwolo izuuve ikemu tishi pulano Hechekulu Pinye pinyi nishi aye

¹¹ nonguye pinyi lupenike tipa ghulokilo zuqhu aqhi lakhi thiuno pinyi penike ahza tsu ani, tiye aqhi akiniulo atsala chighi abidini kijiliuno huthuwo kepushilo. Kholaqhi sumokeu sho ngo ayetsuni khumtsai ke chuno ti pinyilo.

¹² Thanau kutolo achuqupu kiumu qhimoni eno lhoxu saghi kiumu kubove tsumoni. Pekepu yezah kumtsu shikupu ghi Hechekulu Pinye kithikiyi pinyilo.

¹³ Ikemu khuuno achine shikelo mithe ani eno kushuwolo izuumono Hechekulu Pinye pinyi movenikeno paye iwu timiqo gholo lakhi kepi kihisu kide moveni kughengu pano kihikutha ghulokilo akumllagho suwo itsu move keke. Paye axine jume shiluksa shi ime mayesa.

¹⁴ “Tsalatsa inami lakhi nongu gholo akeuno Hechekulu Pinye pinyi nishi aye paye ayezah eno pekepu yezahqo kumtsu kishekulu shi pe masa. Ayezah ye aghakhulomi shelo pina inami shelo pinamu kumtsu lau aphiphishi mayesake.”

Ami Khungkusu

^15-16 Tipa tsalani AMPEU no ngochekeu Phiki shisu luve kelo khungkusu lakhi iqighi eno tipau kuzupho luve. Putholo khungkusu tipau ye ami toi ithuluke.

¹⁷ Kugho kughomu khungkusu hu saikuve kelo Israilmiye aghazu xakiqhe wuve che eno itaghi khilehi iqighinikeno tilehi aghazu shiche.

¹⁸ Timiqo ye AMPEU no ahza kutsu kiqi lono aghazu xakiqewu che eno pa zah kutsu lono aghazu shisu che. Khungkusu no khitohi Aphiki shou ngo akeno panonguye aghazu tilehi ngo ache.

¹⁹ Khungkusuno Aphiki shou nhape ake thaqhulo panonguye AMPEU gholu eno ithawumono ngo che.

²⁰ Khaniloye khungkusu huno Aphiki shou atsala aghulo likhi ngoche; kiu kiu papushi anamu AMPEU no ahza kutsu kiqi lono panonguye aghazulo ngo momu ithawu che.

²¹ Khaniloye khungkusu huno kijiliuno wo inaqhe kuto likhi ngoche eno panonguno khungkusuno ta ikuve kemtsa kiqhewuve che. Kugho kughomu khungkusu huno ta ikuve keloye panonguno ala chethuve che.

²² Ti kumono atsala kini shi aghina, aqhi na, ampe lakhi momu tinguno akushuu shive namu khungkusuno Aphiki lo ngo ake thaqhu loye panonguno ithamono ngo che, ikemu tipauno iqewuve kelo

²³ panonguye AMPEU no Muse vechewo tsukeu zah ghokulu lono Aphiki shisu eno aghazu xakiqhe ishiche.