AKIKIHI 8 - BAIBEL (BSI)

Akulu pewo Qhi

¹ AMPEU no Muse vilo pi,

² “Aron vilo pano akulu tsuni pesu akulu kibepu alo bekelo agizuu yekulupu shi qhilo pilo.”

³ Aron no agholuve eno akuluqo pe akulu kibepu zuu qhitsu.

⁴ Akutsuqa lono abophi kutolo akulu kibepu ye shunayi kununo shi, AMPEU no kiutoi shilepi Muse piyekeno tipau gholano shi.

Levimi Akimthepulo Shikimthe

⁵ AMPEU no Muse vilo pi,

⁶ “Israilmi dolono Levi lagha kutashi kothaphe eno panongu shikimthevelo.

⁷ Hipa ghola shilo: panongu shou akimthe zu kuzupuku no panongu pelo aphi kuchopu amhi miye pelo eno panongu phi ishive pelo. Tithiu panonguye achine pulo mithenia.

⁸ Tithiu panonguno amshitsu lhothe lakhi luno thosulo shichekeu kiqi lono athi sukeu pesu asho kukubo pe oliv teli gholo kitepelo eno nono amshitsu kutau axine kumllagho ghenguno saghilo.

⁹ Tithiu Israilmi amqo kuchopu pelo wo kumqopelo eno Levi lagha pelo ino ngochekeu Phiki zulo puthugho pelo.

¹⁰ Israilmino panongu u pesu Levi lagha kutsu shou bepelo

¹¹ eno tithiu Aron no Israilmi lau no agho pakutakeu pesu itsukeu michi shi Levi lagha akimtheshi itsulo, tishi anguno panonguno ikumla shikepushi.”

¹² Levi lagha ghenguno shikimthe chine ghenguno Levi laghaye panonguu chhope amshitsu kuma kutsu shou bepelo; tipathiu lakhiu pesu axine kumllagho eno lakhiu pesu piti kumllagho shilo.

¹³ “Levi lagha ikhiphe pe itsuvelo tiye agho pakutakeu lakhi michi shi eno Aron ngo panuliqo pelo tipaqo shou jukukutsuu shipelo.

¹⁴ Levi lagha ye Israilmi launo kotha kuta shivelo tishikeu lono panonguye iwu shiluve kepushi.

¹⁵ Nono Levi lagha shikimthepe akimthepu shive kethiu panonguye Aphiki zulo ikumla shikepu akuzupu shiluve nani.

¹⁶ Ino Israilmi anu anoghiuqo zuqhulo panongu pesu iwu shi pukhaluvea eno panonguye iwu likhi shivea.

¹⁷ Kughou Ijip lo anu anoghiu kumtsu pithikhave keno Israilmi lakhi kibolo inu anoghiu toi ino shikimthe luve eno tikishi piti tughiu kumtsu shikimtheluve.

¹⁸ Niye itehiye Israilmi anu anoghiu zuqhulo Levi lagha luve ani,

¹⁹ eno ino Israilmi launo kumsagho lakhi ithuluke toi Levi lagha pe Aron ngo pa nuliqo tsu ani, Aphikilo Israilmi ghenguno akumla mlape nike eno Israilmino Akimthe-a punukhoi kutu ighike lono zaghi kitikhi sholu puzu thive kepushive kelo susholu peni kehue.”

²⁰ Titoi Muse ngo Aron eno Israilmi kumtsuno AMPEU no ahza Muse tsuke toi Levi lagha akimthepulo tsuve.

²¹ Levi laghaqo ye pano likhi pano shikimtheve eno panongu phimini ishive eno Aron no kumsagho lakhi toi panongu akimthepulo AMPEU tsuve. Pano shikimtheve keu chine ghi panongu ghenguno shitsu.

²² Timiqoye AMPEU no Levi lagha ghenguno Muse vilo pikeu kumtsu shikupu. Titoi Levi laghaye Aron ngo panuli gholo ngono Aphikilo mlalu nikeu akuzupu shilu.

²³ AMPEU no Muse vilo pi,

²⁴ “Apunu mpe muku pungu shivekeqo lono huthusu Levi lagha lakhi khino ino ngo chekeu Phikilo akumla shipelo,

²⁵ eno apunu mpe lhopungu lo paye akumla lono akulho qhivepelo.

²⁶ Tishive kethiu paye paqomi Levi lagha no Aphiki lo panongu kumlapu saje mla ake gholo kuphuluvi ikemu pa kutashi mla kepu kumoe. Levi laghaqo kumla sajelo nonguye hitoi shichelo.”