AKIKIHI 7 - BAIBEL (BSI)

Sakiphemi Kumllagho

¹ AMPEU no ngochekeu Phiki shiqhipe kutoluveke tsalanino pano Aphiki ngo tipaulo thime nhemghaqo eno akiptia ngo tipaulo peitha chekeqo kumtsu nukishelu eno akimthepulo tsuve.

² Tithiu Israil shiyeh gholo alagha shou atou shi saphe akemi khunoqono timi kikihi jukutsu akeno

³ tipaqono akumllagho AMPEU lau sughi: tuha garipe tsugho eno amshitsu chighi kini, sakiphemi kinini salano tuha gari lakhi eno sakiphemi lakhikhi salano amshitsu lakhi ishi saghi. Panonguno anhemgha tipaqo sughive kethiu

⁴ AMPEU no Muse vilo pi,

⁵ “Aphiki ghenguno mulakepu shi akeu kumla lo peitha kepushi aghoqo ikhiluve tsulo; Levi lagha ulo tipaqo sutsu puzu panongu pelo akumla kiqi lono peithapelo.”

⁶ Tighenguno Muse no anhemghaqo tuha gari eno amshitsuqo suwo Levi lagha tsuve.

⁷ Pano anhemgha tuha garipe kini eno amshitsu tuna kini pesu Gershon limi tsuve,

⁸ eno anhemgha tuha garipe bidi eno amshitsu tuna bidi pesu Merari limi tsuve. Panonguno akumla mla kepu thaqhuye kumtsu Aron nu Ithamar no kichetsu keu kiqi lono mlape.

⁹ Ikemu Muse ye anhemgha tuha garipe eno amshitsu pesu Kohat limi tsumo, kughengu akimthe nhemgha panonguno jukutsu masa keqoye panongu binika lono pukepu shive kehu.

¹⁰ Sakiphemi ghi akiptia akimthepu shi keu pinye pinyi kelo akumllagho pe ighi. Kughou panonguno akiptialo panongu gho sughinike kuto keno,

¹¹ AMPEU no Muse vilo pi, “Panongu vilo atsala chighi kini dolo atsala lakhilo sakiphemi lakhi khino pano gho pesu akiptia akimthepu shi kepushi sughilo pilo.”

^12-83 Panonguno akumllagho sughi kelo hipau ghola lono sughitsu: Atsala Alagha Sakipheu Atughuni Juda Aminadab nu Nahshon Akinini Isakhar Zuar nu Nethanel Akuthuni Zebulun Helon nu Eliab Abidini Ruben Shedeur nu Elizur Apunguni Simon Zurishadai nu Shelumiel Akutsughoni Gad Deuel nu Eliasaf Akutsunini Efraim Amihud nu Elishama Akutacheni Manase Pedazur nu Gamaliel Atokuni Benjamin Gideoni nu Abidan Achighini Dan Amishadai nu Ahiezer Chighiqhaqhini Asher Okhran nu Pagiel Chighikinini Naftali Enan nu Ahira Milakhikhino sughi keu kumllagho kumtsu aphiphi shi sughike: tsandiyi khu kilogram lakhino tuxa eno tsandiyi chithakhu 800 gram hipaqoye aqhano pekiye chekeu bekutha kimshi qhemike, tikuma kinikujo athi akumllagho ghenguno asho kukubo telino kite keuno chhitoi shino sughikhake; shunayino shikeu khu lakhikhilo 110 gram qhemi tsungquita no chhitoi sughi; amshitsu alhothe lakhi, bheritsu lakhi, bheriti ampe lakhi shivekeu lakhi akuchopu piti mllanikeu; axine kumllagho ghenguno ane lakhi; amshitsu kini, bheritsu pungu, anetsu pungu eno ampe lakhi shivekeu bheriti pungu tiye kuposhukulu kumllagho ghenguno saghi.

Atsala Alagha Sakipheu

^84-88 Sakiphemi chighi kinino akiptia akimthepu shikepu ghenguno akumllagho sughi keu pe kuqhakelo hipaqo: —tsandiyi no shikeu ilaleikeu khu chighi kini eno tsandiyi chithakhu chighi kini, pekutsukelo kilogram mukutsunino tuxake. —shuna no shikeu khu chighi kini pekutsukelo kilogram lakhino gram 320 eno tipaqolo tsungquita no chhitoi —amshitsu chighi kini, bheritsu chighi kini, bheriti ampe lakhi shivekeu chighi kini, tipa gholo athi kumllagho sughi, tiye piti kumllagho shiniye sughi —axine ghenguno akumllagho shinike ane chighi kini sughike —amshitsu muku bidi, bheritsu lhotsugho, ane lhotsugho, bheriti ampe lakhi shivekeu lhotsugho kuposhukulu kumllagho ghenguno sughi.

⁸⁹ Kughou Muse no AMPEU sasu kuptsaniye Aphiki lo ilokeno AMPEU no Puloshoqhi Bohu kunha shou kerubim kini akeu dolo ngono pa putsa keu Muse no chilu.