AKIKIHI 6 - BAIBEL (BSI)

Nazario Yeh

¹ AMPEU no Muse vilo ahza tsukeuye

² Israilmi pelo shi penike mijetsu keqo tsake. Kiptimi na totimi namu khuuno mithekemi Nazariomi shinike miji anikeno tipauye pakuta keu shoqhi lakhi shike zah eno

³ pano pa likhi pa pesu AMPEU tsuve keuye aji ngo axathi ji kitike moveke zah. Paye kiu kiunamu atsaithi no shikeu ji shomoni momu atsaithi chumoni momu atsaithi kiki chumonike zah.

⁴ Khitohilo pano Nazariomi lakhi shiani keno ,atsaibo lono ipeghi keu chuqupu, alothi momu atsaithi yiko mu chumonike zah.

⁵ Pano Nazariomi shoqhilo ake thaqhu pa kutsusa momu akichimhi miyemoni. Paye pephe pesu AMPEU tsuvekeu shoqhi lupe puakeu huno ado tipau kuchopulo pa tsughape akezah.

^6-7 Pasa michiye pa pephe pesu Alhou tsuvekeu michi eno paye akithi kumo phivilo wuno palikhi pa shipixi kepu kumoe; tilikhi kumono papu, paza momu chepu-cheli kumo vilomu wuke zah kuhae.

⁸ Pano Nazariomi lakhi shi ake thaqhu paye AMPEU lau shikimtheve keu shiamayesake.

⁹ Tsalatsa shikimtheve keu Nazariomi lakhi sa shipixive tiye pano timi khami phivilo ake lono zuleno pa phivilo akeu timi huno thiveni, tishi aye paye atsala tsuni khemasa eno tithiuno pasa ngo akichimhi miyeve kezah; eno tishike lono paye achine lono mithelu nani.

¹⁰ Atsala akutacheni paye miqhedu momu kobutur kini pewo achinemi khuu AMPEU no ngochekeu Phikilo ikulola lo akeno tipau tsuni kezah.

¹¹ Pano akithi kumo kidilu kehu pa ghenguno achineyeh lono shikimthe keu kumla kuputsunike, miqhedu lakhino axine kumllagho eno lakhino piti kumllagho achineuno shitsunike zah. Tipa tsalanino timi huye pasa akimthepulo qhinikezah.

¹² Nazariomi lakhi toi pado ikhiphe kithethu shi AMPEU tsunike zah. Puzuu ghulokiye kihimovea kughengu pasa kimthepu shikeu ye shipixive ke. Tsuchilekeu kumllagho ghenguno paye ampe lakhi shi akeu bheriti lakhi sughinike zah.

¹³ Akimthepu Nazariomi lakhino pa shoqhi do kupuveke lo paye chini kepu shilo. Paye Aphiki ikulo lalo wulo,

¹⁴ eno tikishi atiche kuha keu kuthusawo AMPEU tsupelo; bheriti atsu pitiwo ampe lakhi shi akeu pesu piti kumllagho shilo eno bheriti ampe lakhi shivekeu pesu axine kumllagho shilo eno bheritsu lakhi kuposhukulu kumllagho shilo.

¹⁵ Paye kholaqhi sumokeu sho ashoghi lakhi pesu mlla pelo tiye ashopa shishoi shino oliv telino nhikeu eno ipumihei shopa oliv teli pesu nuda pukuve keu eno tinguno alaughi kiu shilopi puanikeno athi ngo atsayi ji kumllagho peighi pelo.

¹⁶ Achineuno hipaqo kumtsu AMPEU lau sughino axine kumllagho ngo piti kumllagho ngo ishi pesu mllave tsupelo.

¹⁷ Paye bheritsu pesu kuposhukulu michi shi akumllagho shini eno asho pa ashoghi gholono mllanikeu shipelo; paye athi ngo aji ghi suwo tsulo.

¹⁸ Aphiki ikulo lalo Nazario no pasa miyeveno khipa alo kuposhukulu gho kumlla shive akeno tipami lono pitivelo.

¹⁹ Kughono bheritsu shi phuveno bevenikeno achineu no ikhiluni eno tipau pesu ashopa shishoi keu ngo ashopa ti ipumihei ke ashoghi lono supe ighino suwo Nazario ulo sutsulo.

²⁰ Tipashelo, achineuno tipaqo pesu pakutakeu gho lakhi AMPEU lau sughini; tipaqoye achineu ghenguno akimthe gho lakhike, ayezah lono achineu sala bheritsu mulashi ngo apukhu ikhiphetsu keu nguno alauke. Tishike thiuno Nazariomi huno atsayi ji sholu nani.

²¹ Hipaqoye Nazariomi no peche kepu yezahke; ikemu Nazariomino puloshoqhilo shimasa keu nguno alau akumllagho tsunikeu shi piqhi puaghi aye kiu tsunikepi piqhipe puani keno loi shikupu mayesa.

Achineuno Kumghatsu

²² AMPEU no ahza tsuno,

²³ Aron ngo pa nuliqo pelo Israilmi kumgha tsupeni keu tsaqo:

²⁴ AMPEU no nongu kumghatsu eno nongu tucho peniu;

²⁵ AMPEU no nongu kimiye eno nongu qhuivulai peniu;

²⁶ AMPEU no nongu jupesu amlo qiqhiyi eno alokughuno nongu tsupeniu.

²⁷ AMPEU no pi, “Panonguno ije pesu Israilmi shou kumghatsu aye ino panongu kumghatsu nani.”