AKIKIHI 4 - BAIBEL (BSI)

Kohat Bolomi Kumlapu

¹ AMPEU no Muse vilo

² Levi laghami Kohat limi laka eno abolomi kihikutsulo pi,

³ eno kiptimi apunu mpe shighi ngo lhopungu kuma dolo kumtsu khunonguno AMPEU no ngochekeu Phikilo mlalu kepu akuzupu shi anikeno yesulu lopi.

⁴ Panonguno mula kepu thimeqoye shisheno akimtheuke.

⁵ AMPEU no Muse lau akukutsu hipaqo mijetsuke. Kughono aghazu xani keno Aron ngo panuli qoye Aphikilo iloni, Puloshoqhi Bohu zulo akeu nhaqhiphi kuqhoqhino tipau pesu Abohu kuzuve penikeu shi.

⁶ Panongu ye ashiyiko muduniyike lakhino tipau shou nhaveno tsulakibe shishoi keuno akutsuqalo khobeve eno tithiuno pekepu khadu chuxusuno pewukepu shipe.

⁷ Asho pesu Ampeu mllache keu kibepu lipa shou panonguno tsulakibe phi khobeni eno tipaqo shou akhuqo beni,axokutsungu khu, akumllagho khu, eno ahji pesu mllakeu gho sukepu bohu ishi beni. Akibe lipa shou alhokuthulo asho qhipuakeu zah shi.

⁸ Panonguye aphi akuhuu lakhi pesu tipau kuchopu shou nhape puanike zah shi, ashiyiko muduniyike lakhi pe tipau shou nhanike zah shi eno tithiuno pekepu su khadu chuxusupe puanike zah shi.

⁹ Panonguye tsulakibe phi ikhiluno akulukibe a kuzupe qhinike zah shi, akulu gholo amikutsapu alazakhu eno oliv telibo qhinike zah shi.

¹⁰ Panonguye tipau eno tipaulo kughakusu kumtsu ashiyiko muduniyi keuno shikeu kukuzu lakhi lono kuzuveno pekepu awophe lakhilo qhinike zah shi.

¹¹ Tipashelo panonguye tsulakibe phi sukhope shunano shikeu akiptibo nhanike zah shi, ashiyiko muduniyike lakhi kukuzu pesu tipau khonhanike zah shi; eno tithiuno pekepu khadu chuxusuno pekepu shinike zah shi.

¹² Panonguye Akimthe-alo peitha chekeu khu aliqo ikhiluke zah shi, tsulakibe phino tipaqo nhaveke zah shi, ashiyiko muduniyike lakhino tipaqo kuzupuaveke zah shi eno tipaqo pewo pekepu awophelo qhike zah shi.

¹³ Panonguye akiptia lo ayevu medave keu shiqhive eno hughaike phi pe khonhave ke zah shi.

¹⁴ Panonguye akiptia lo peithakeu nhemgha kumtsupe tipau shou qhi: amikhu, xikepuqo sholepu eno chithakhu qhikezah. Tithiu panonguye ashiyiko muduniyike lakhi pe tipau kuzuveno pekepu khadu chuxusu veke zah shi.

¹⁵ Kughono aghazu xakepu ghuloki shinikeno Aron ngo panuliqo no kuzukhave kethiu likhino Kohat limino akimthe thime nhemgha kuzupe puakeqo xapupe. Kohat limiye thivenosake akimthe nhemgha thime bupe kevilo. Kugho kughomu Aphiki kiqheve kelo Kohat limino amakho hipaqo pupe.

¹⁶ Achineu Aron nu Eleazar no Aphiki hekutsuni keuno pa makho shini eno teli, kibepu, axokutsungu, mllakepu athi jeliqo, nukishe chekeu teli shikimthe pesu AMPEU tsuveke thaqhu hekutsunike zah shi.

¹⁷ AMPEU no Muse ngo Aron pama vilo pi,

¹⁸ “Kohat limi pelo thivenosake akimthe akiqheu thimeqo phivilo wupe kevilo.

¹⁹ Hi kutusu kepu lono lakhaluve nike ghenguno Aron ngo pa nuliqono sholokuu iloni eno timi lakhikhi kumla kichepiye tsuni eno kiu xapu kepukeno pa pelo pitsu pelo

²⁰ Ikemu Kohat laghano Aphikilo ilopuzu achinemino iqeuvenike ghenguno akimthe thimeqo kuto akeu juaye panonguye thive nani.”

Gershon Limi Kumlapu

²¹ AMPEU no Muse vilo

²² Levi laghalo Gershon limi laka eno akibo kiqi lono akikihi lulo pi,

²³ eno timi kumtsu apunu mpe shighi ngo lhopungu dolo AMPEU no ngo chekeu Aphiki zulo akumla shikuzupu keno kihisulu lo pike.

²⁴ Panonguye thimeqo xapu wunike makho puke zah shi.

²⁵ Aphiki tipau alou eno ashou bothasu keu, tipau shou ashiyiko muduniyi keuno kuzube keu, ikulolalo nhaqhiphi akeu,

²⁶ Aphiki eno akiptia vehomxa keu nhaqhiphi akeqo eno tipau a kughu kelo thime pekepuqo kumtsu jukutsuni keu shi. Panongu ye thime khijehi shikepu avehu ani keno kumtsu shini keu shike.

²⁷ Muse ngo Aron pamaye Gershon limino akumla khijehi shipe puani keno timi kumtsu shikupu kulai ani kemo keno juni keu shi eno Aron ngo panuliqono anhemgha pupenike kutotsu ke jeli kumtsu pichetsu.

²⁸ Hipaqoye Gershon limino aphiki lo shikepu makhoqo ke: panonguye Aron achineu nu Ithamar no kiu kichetsuni keno shikupu masa kepu shie.

Merari Laghami Kumlapu

²⁹ AMPEU no Muse vilo Levi lagha laka eno akibo kiqi lono Merari limi kihikutsulo pike,

³⁰ eno timi kumtsu apunu mpe shighi ngo lhopungu kuma dolo kihipe suluve lopi,panonguye AMPEU kungo-a Aphikilo ngono akumla shilu kepu akuzupushi aghi mayesa keu shi.

³¹ Panonguye Aphiki lo anhemgha xapuni keu makho shike, akupuwu khadu atsukucho eno tipa boqha

³² Aphiki hekumxa lo sumxa kepu tsukucho, qhakepuqo, akupatusu, eno tshumxa kepu kighiqo, akikithi shino shipuku kepu thime xapughi mayesa. Timi lakhi khino thime jeli ala kututa shi xapughinike zah shi.

³³ Merari limino aphiki lo shimosa kepu makhoqo ye hipaqo ke; panonguye kiu shikepu keno Aron achineu nu Ithamar no tsu keu kiqi lo shikupu tsuni ke zah shike.

Levi Lagha Kikihi

^34-48 AMPEU no ahza tsukeu kiqi lono Muse ngo Aron eno aqo gholo sakiphemi no Levi lagha kughuko kuthu ti Kohat, Gershon eno Merari limi kikihi lu. Panonguye alagha laka eno akibo lo timi kumtsu ampe shighi ngo lhopungu kuma dolo akeqo khunoqono AMPEU Phikilo mulalu kuzupu shi akeno tipaqo kumtsu kihikutsupe ye suluve, tipaqo limiye hike: Alagha Kikihi Kohat 2,750 Gershon 2,630 Merari 3,200 Kuqhakelo: 8,580

Alagha Kikihi

⁴⁹ Ampeu no Muse lau ahza tsuketoi timi lakhikhije yesuluve eno Ampeu no Muse vechewo ahza tsuketoi milakhi khino qenikeu momu xapunikeu makho kutotsue.