AKIKIHI 3 - BAIBEL (BSI)

Aron nuliqo

¹ Hiye Aron ngo Muse pama kibolomi AMPEU no Sinai naghuto lono Muse putsake ghulokilo acheke qoke.

² Aron ye anu bidi ache. Nadab no akichiu, Abihu, Eleazar, Ithamar.

³ Panongu telino nukisheno achinemi shipenike kishebetsu.

⁴ Ikemu Nadab ngo Abihu pamano mithekumo mi pesu Sinai yeghi Kithito lono AMPEU mllake lono pamaye pithive. Pamaye anuli kuha, tighenguno Eleazar ngo Ithamar pamano Aron kuxu kupujulo achineu kumla shiche.

Levimi pelo Achinemi Qepe

⁵ AMPEU no Muse vilo pi,

⁶ “Levi laghaqo sasu azuu saghino panongu pelo achineu Aron qemi shipenike susulo.

⁷ Panonguye Aphiki ino ngoche keulo avehupu kumla shini, achineu kumla eno aqo aho kuchopu ghenguno mlani.

⁸ Panonguye Aphikilo peithachekeu thimeqo jukutsuni eno Israilmi kutami ghenguno akumlapu saje mlani.

⁹ Levi laghano shikepu kumla saje akeuye Aron ngo panuliqo ghini shipenikeuke.

¹⁰ Noye Aron ngo panuliqo achineu kumla shipenike panongu susulo. Kutami khuana tipau shi aghiaye pithivelo.”

¹¹ AMPEU no Muse vilo pi,

^12-13 “Levi laghaqo itehiye iwu shivenia. Kughou ino Ijipmi anu anoghiuqo pithive keno ino Israil lagha kibo lakhi khilo anu anoghiu shikimthevea eno tikishi anoghiu kumtsu shikimthevea. Itehiye Israilmi nuli anoghiuqo iwu shinike zuqhulo Levi laghaqo luvenia, panonguye iwu shivenia. Niye AMPEU ke.”

Levi Lagha Kikihi

¹⁴ Sinai Sayeqha lono AMPEU no ahza Muse tsukeuye

¹⁵ Levi laghalo ali ali eno akibo akibolo anu kiptimi thaqhu apunu tsala aqhi lakhi nu momu tinguno akichiuqo yekutsuluvepe,

¹⁶ eno Muse no titoi shivetsu.

^17-20 Levi ye anu kuthu ae, Gershon, Kohat eno Merari, tipaqono alimi je puchekeqo puasu ke. Gershon, ye anu kini ae, Libni ngo Shimei pama; Kohat ye anu bidi ae, Amram, Izhar, Hebron eno Uziel; eno Merari ye anu kini ae, Mahli ngo Mushi pama. Panonguye alimi puasu kepi aje kuchekeqo ke.

²¹ Gershon limi gholo Libni ngo Shimei pama kibo suno shilu.

²² Kihikuqhakelo kiptimi aqhi lakhi nu momu tipau shou nu 7,500 aghi.

²³ Hipano limino kulola kudau Aphiki thiu aghazu shipe,

²⁴ alimi dolo Eliasaf ti Lael nu pelo atou shino ngope.

²⁵ Aphikilo panongu kumlapu saje ye alou kukuzu, ashou kukuzu ikulola lo nhaqhiphi jukutonikeu.

²⁶ Nhaqhiphiqo ye Aphiki eno akiptia bothasu ghi shikeu eno nhaqhiphiye bokutha bocho dolo akumlapu saje khikhi anikeno tipaqo mla tsunike amakho pukemike.

²⁷ Kohat limi gholo Amram, Izhar, Hebron eno Uziel kiboqo suno shilu.

²⁸ Kiptimi aqhi lakhi nu momu tipa shou shi akeu kumtsu kihikuqha kelo 8,600 aghi.

²⁹ Hipau limino Aphiki apeu kudau aghazu shipe ngolu.

³⁰ Uziel nu Elizafan pelo alimi dolo atou shipe.

³¹ Panonguye Puloshoqhi Bohu kibe lipa, akulu kibepu, akumlla kiptia, achinemino pechekeu akhu ajukhu eno Akimthe-a ikulo lalo nhaqhiphi hekutsuni kemike. Panonguye hipaqo peitha kepu kumlapu saje kumtsu jukutsuni keuke.

³² Levi lagha gholo atou shi akeuye Aron nu Eleazar no shia. Pano Akimthe-a lo akumla shikepu shou jukutsuu shike.

³³ Merari limi gholo Mahli ngo Mushi pama kibo sukuqhalu.

³⁴ Kihikuqha kelo kiptimi aqhi lakhi nu momu tipau shou kumtsu pekuqha kelo 6,200 aghi.

³⁵ Hipa limino Aphiki ahuu kudau aghazu shikepu shi, tiye Zuriel ti Abihail nuno atou shike.

³⁶ Panonguye Aphiki shikepu suyezu, tipaulo hepta khadu, atsukucho, aboqhasu eno akikimepu thime kumtsu jukutsu nikeu makho pepu. Panonguye hipaqo peitha kepu kumlapu saje kumtsu jukutsunikeu shike.

³⁷ Panonguye atsukuchoqo aboqhaqo akupufu ghuchu eno khalacheu akighino hekuxa pe bothasuni keuqo jukutsuke zah ke.

³⁸ Muse ngo Aron eno pama nulino Aphiki kipela kudau aghazu shike zah shi. Panongu kumla sajeye Akimthe-a lo Israilmi ghenguno akumla makho kiu shitsukepu anikeno shikuputsu penike zah. Kutamino akumla tipau shi aghiaye pithiveni kezah.

³⁹ Kihikuqha kelo kiptimi aqhi lakhi nu momu tipau shou ali alilo AMPEU no ahza tsukeu kiqi lono kihikutsu kelo 22,000 aghi.

Levimino Anoghiu Zuqhu

^40-41 AMPEU no Muse vilo pi, “Israilmi anu punu tughiu kumtsu iwu shivea. Tighenguno Israilmi nuli punu tughiu kumtsu khijehino aqhi lakhi nu momu tipau shoukeno apasu shi aje yekutsulo. Ikemu panongu zuqhulo Levi laghamino iwu shimasake. Niye AMPEU ke! Niye Levi lagha wu tikishi kumtsu piti tughiu thaqhu iwu shinike pukha ani.”

⁴² Muse no anu punu tughiu kumtsu yekutsu sulu venike aghokulu shive.

⁴³ Aqhi lakhi nu momu tipau shou nu kumtsu je yekutsu kelo timi 22,273 aghi.

⁴⁴ AMPEU no Muse vilo pi,

⁴⁵ “Itehi Israilmi punu tughiu zuqhulo Levi laghami shikimthepe itsulo eno Israilmi wu tikishi piti tughiu zuqhulo Levi laghaw tikishi piti tughiu shikimthepe iwu shitsulo.

⁴⁶ Israilmi nu punu tughiu 273 no Levi lagha punu tughiu shou kiyeve ake ghenguno anuli kiyeve keu jehi qhuchile suluvelo.

⁴⁷ Anu lakhi khi me aqhalo bekutha kiqi lono tsandiyi tachu punguno qhulo,

⁴⁸ eno hipau pisa pe Aron ngo panuliqo tsulo.”

⁴⁹ Muse no tipa tsa gholu eno

⁵⁰ tsandiyi tachu 1,365 ikhipesu

⁵¹ Aron ngo panuliqo tsuve.