AKIKIHI 12 - BAIBEL (BSI)

Miriam Aghime Tsu

¹ Muse no Kushit ghalimi lakhi sasu kulawu eno Miriam ngo Aron pamano pa pipusave.

² Pamano pi, “AMPEU ye Muse likhi vechewono piache anikeshea? Paye ni vechewono ghi pichenike kumo keshea?” Panonguno kiu pikeno AMPEU no chiluve.

³ (Muse ye akumtsami lakhi, ayeghilomi kumtsu nguno ivunhei kemike.)

⁴ Paikhavi lono AMPEU no Muse ngo Aron eno Miriam pano kuthu vilo pi, “Niye nokuthu pelo aghazu lono ipeghino ino ngo chekeu phikilo ighi penishi ani.” Panonguno wuno

⁵ AMPEU no khungkusu tsukucho lono iqighino Aphiki kulaghilo puthughono ishi kuphelu, “Aron! Miriam!” Pamano chesu azuu ighi

⁶ eno AMPEU no pi, “Ino kiu pini keno inijulo! Tungkupumi nongu gholo ake ghulokilo ino kungunhetsu lono ikutoshino panongu nhepithe eno asamouno putsa cheni.

⁷ Ino iqeu Muse putsa chekeuye pakuta keu ghola lono ke; ino iwu timi Israilmi kumtsu pesu pa qholo qhipe puani.

⁸ Tighenguno niye pa vilo aholeuno pimono agi kinheqhe no mutsumishei putsa cheni; paye ikoghe ghi ithulu apeke! Nokujoye kishi puzu ighumono iqeu Muse piputha anikya?”

⁹ AMPEU no pama shou amlo ideve no wuve

¹⁰ eno khungkusu Aphiki qhive, Miriam yikoye paikhavino akusupuno ju kumsapu shi nhakhave eno murasu toi miyetsughoive. Aron no li philo jupuku kelo akusupuno nhakhavekeu ithulu no

¹¹ Muse vilo pi, “Akijeu, kishimoake niw mbomzu xine ghime nipipe kevilo.

¹² Li pelo aphi tuxa tsuitave ghi kiuala akithi shi punukemi toive pekevilo.”

¹³ Tighenguno Muse no AMPEU vilo asheshu pi, “O Alhou, li shipivive tsulo” ipi.

¹⁴ Tileno AMPEU no khochile, “Li puno li gilo musute puku tsuaye liye akukujo tipau atsala tsuni kutolo pulu masake. Tighenguno liye atsala tsuni aghazu lono khalacheu haphepe qhivelo eno tipathiuno liye sasu ile iloghipelo.”

¹⁵ Miriam ye atsala tsuni aghazu lono khathapheve eno timiqoye li sachile sailoghi mphi kutolo iqewumono ae.

¹⁶ Tithiuno panonguye Hezerot qhiveno Paran saye qhalo aghazu shilu.