AHOLE 9 - BAIBEL (BSI)

Alokutsu eno Mbomzu

¹ Alokutsuno liwu aki shipeqhi eno tipau ghenguno atsukucho tsuni mlae.

² Lino aghulhu lakhi shiniye lhoxu heqhi, tsungquikeu pesu atsaijilo lekite eno akhuna kutope qhiwo.

³ Lino aphughilo atoghi akiqheu lono ighamuku kupeniye li qelimi puwu.

⁴ Lino ishi piwupe: “Mbomzumi hilau tsughu ighilo!” eno anikhami vilo lino ishipi,

⁵ “Ighilo, ichuqupu chulo eno ino lekite puakeu tsayiji sholo.

⁶ Mbomzumi loji qhivelo eno xululo. Akighithi laghi papewulo.”

⁷ Alikhi akishekulumi nono shikumzu aye oghechile nikeu likhie. Nono alhoksami sakiyi aye oghuza nikeu likhie.

⁸ Khilemu alikhi akishekulumi shikumzutsu kevilo; tipau ghenguno paye omithi nani. Ikemu nono alokutsumi lakhi shikumzutsu aye paye ogihu nani.

⁹ Alokutsumi vilo nono kiu kiumu pikeulo paye alotsu kitheve nani. Amikuchomi vilo nono kiu kiupimu tipau pa kighithilo pekuqha luve nani.

¹⁰ Alokutsu shinishiaye noye atughushi AMPEU gholulo. Nono Akimtheu ithi aye noye ithikututa shilukeu anike.

¹¹ Alokutsuno akuxulo ampe kutomo sukuphatsu nani.

¹² Nono alokutsu aghiaye olikhi ola kighishe kulupuke eno nono tipau milive aye olikhi oghimepuke.

¹³ Mbomzuye totimi ayehkumthami, aghugha kuloghimi eno akukujo kuhakemi toike.

¹⁴ Lino ahukikhalo momu aphughi qhemghaikeu alo iqano

¹⁵ pututa kumlapu saje ghenguno iqhoiqi vechewu chekemi vilo ishi kucheni,

¹⁶ “Ighilo, mbomzumiqo!” Aghuzunikhamiqo vilo ishi pi cheni,

¹⁷ “Pukalukeu zuuno ngoyini ani. Pukalukeu chuqupu no jumghayi ani.”

¹⁸ Ikemu likilo wukemiqoye akithipu tile ani kepi mthae, likilo ilo vekemiqoye kithimi yeghi kutholo anike.