AHOLE 8 - BAIBEL (BSI)

Alokutsu Shekiqhe

¹ Inilo! Alokutsuno kuani, kiqikuluno li sutsa chilupeniye igha ani!

² Alaghi phivilo atoghilo eno alapalo lino puthugho anie.

³ Aphughi ikulolalo, ahukikha ijeh pesu lino kuani:

⁴ “Nongu timiqo, ino nongu qhuiniju ani, ayeghilo akemi lakhikhi vilo ino igha piani.

⁵ Nonguye tekhoimphi kesha? tekhoikeu shikalulo. Nonguye nikha shi aphi kesha? aloputsululo.

⁶ Itsa aghileuke inijulo; ino nongu vilo pikeu kumtsu achipike.

⁷ Ino kiu piani keno tipaqoye kuchouke; akimkiye ino mithicheni.

⁸ Ino pikeuye thwokha kuchou; kiumu akimki momu sabidekeu kuhae.

⁹ Jupilikulumi ghenguye hi kumtsu thebeyi ani, akivishi ithiakemi ghenguno hiye mutsumisheike.

¹⁰ Tsandiyi zuqhulo ino kutsukeu lulo; Shuna akiviu zuqhulo akighithi kishelulo.”

¹¹ “Niye Alokutsuke, niye achiku nguno akiviu; Nono lunishi akeu gholo kiunomu isasu kimghimlae.

¹² Niye Alokutsuke eno niye jupili kulupu ani; niye akighithi ngo kishethikeu ani.

¹³ AMPEU gihu aniaye tiye alhoksa mithivekeuke; niye aqhekuza ngo akulaki, eno alhoksa-la ngo akimki tsapi mithi cheni.

¹⁴ Ino kughuphe no tipaqo shiwo cheni. Niye vethakulu eno akumto ani.

¹⁵ Kukamiqo ayehpethi penike ino kuphu cheni eno ayehkipemi pelo ayezah kivi mlape nikeu shicheni.

¹⁶ Ayehkipemi lakhikhino ikukuphu pesu ayehpethi cheni, pithi shithikemi eno suqhekinimi ghi tishi cheni.

¹⁷ Khunono ikimiye cheni keno ino tipaqo kimiye, khunono iphu cheni keno iphulu nani.

¹⁸ Niye akini, agigihupu, kighishe kulupu eno tokulupu acheni.

¹⁹ Nono ilauno kiu ithuluni keno tiye shuna aghileu nguno akiviu, tsandiyi thakimtheve keu nguno akiviuke.

²⁰ Niye amikucho laghi pula cheni; Niye achipiu xakutha laghi pape cheni,

²¹ ikimiyekemi lau kinikulu tsu cheni, akughupu nhemgha pesu panoqo ki shepichhitsu cheni.

²² “AMPEU no kumtsu nguno atughiu shi ilhopheke, khaghi pa kumlalo lhotughiuke.

²³ Inahuu abothu lono ilhopheke, ayeghiqha lhophe mphi lono niye atughiu shike.

²⁴ Azughi eno azupuki kuha aphi lono ilhove ake.

²⁵ Naghutoqo eno atoghiqo pututa alo qhimphi lono ilhove ake;

²⁶ Alhou no ayeghi eno aluza lhomphi lono momu ayeghi muqo atughiu ghi kuha aphi lono ilhove ake.

²⁷ Kughou Alhou no atsutsu pa alo qhiakeno pano azughi shou aboho qhawo akelo niye tilehi ake.

²⁸ Kughou pano khungkusu atsutsulo qhiakeno, pano azughizu puki lhaphe puzu

²⁹ azughizu vilo pano pitave tsukeu nguno alau ihi ikughi kevilo pi ahza tsu akelo niye tilehi ake. Pano ayeghi chokiqhe tsukucho gho akelo niye tilehi ake.

³⁰ Aki kishilo kughukutsumi lakhi toi niye pa phivilo ake, tsalakipetsulo paye ilauno alovilu cheke. pa gholo akelo pulhapuju alokivi shike,

³¹ Alhou yeghilo timino kughuna kulupu shiakeu eno timi lhoxu jeli jupe niye amlokiqi shiake.

³² “Anuliqo, itehi itsa inilo: khunono ino pikeu shini keno tipanoye alovilu nani.

³³ Akukutsu shikakeu inilo eno alotsululo, tipau kughuchove kevilo.

³⁴ Khunono itsa inini keno, iwu khagholo tsalakipetsu khekutoni keno ikikha phivilo ngokheni keno, paye alovilu nani.

³⁵ Khunono iphuluni keno akuxupu phuluvae, eno AMPEU no paju amloqi nani.

³⁶ Khunono iphumoni keno pa likhi pa ghuza anike; khunono imithi cheni keno akithipu kimiye cheni.”