AHOLE 6 - BAIBEL (BSI)

Alaushi Ghuttu

¹ Inu, nono kutami piagha ghenguno amakho putsunikeu shi piqhipuani kesha?

² Olikhi otsano otshuluve akesha? eno piqhivekeu tsa huno omeluvea kesha?

³ Tishiaye noye timi tipau kuka qholo auveake ghenguno tipau lono ipelunikeu hipau shilo: mtazu pa lau wulo pa vilo opheve lopi pa qhuinijulo.

⁴ Noye zunikeu momu akulho qhinikeu kumsu kevilo.

⁵ Ashihami lakhi launo ashe momu aghau lakhi polukeshi alichhe lono noye ipevelo.

⁶ Akipichimi, noye alhacheno kishi xuacheni keno tipau launo alokutsu ithilulo.

⁷ Tipaqoye sakipheu, atou momu ayehkipeu kuhae,

⁸ ikemu panonguye susu tsalalo sala mutsutsala lono achuqupu pekikepe puave cheni.

⁹ Akipichimi, noye azualo khitotohi ihozu anani kya? Noye okuzu lono kughono ithu nani kya?

¹⁰ Nono ishi picheni, “Ino ado kitila zulu paghini, iu kumsho pesu ado kitila akulho qhini.”

¹¹ Ikemu nono zuakelauye suxakuchumino aghunanu pepu ighi akeshi aquaghano oha ighive nani.

¹² Abokumsa kixikilamino chighichilai keu tsapi piwu cheni.

¹³ Panonguno anhethi kulo eno au kihi puzu opishiqhiniye shicheni,

¹⁴ ado kumtsu pano kukumsu chighichilai keulo alhoksa kumqu acheni eno aqha kumtsulo akupuna xuphe acheni.

¹⁵ Highenguno zulileno kutsakungo keuno panoqo hekuluqhi nani eno panoqoye akithi pushi ghuzave nani.

¹⁶ AMPEU no mithi chekeu thime tsuni ani, paye tipaqo khilemu kutuu mlae:

^17-19 Aqhekuzashi juchekeu, akimki mili pukeu, pimipuamokemi pithikeu phiau kupumi, Kixikila kukughu kumsuphe chekemi, alhoksa shiniaye kakashi pokeu pukhu, akimki tsa piqhi chekemi thopimi eno shompami dolo akupuna xukuthokeu.

Salhashupu nosake Ghuttu

²⁰ Inu, opuhno ovilo kiu pini keno tipau shilo eno ozano oshika keu khilemu kumsuma kevilo.

²¹ Panoqo tsa pulhapuju pechelo, omlolo supululo.

²² Panoqono kutsupiyekeuno aghuzulalo osache nani, putholo osusho nani eno puchou okutsupiye nani.

²³ Panoqo zahkutsuye yevuqai keu kuvu lakhike; panoqono shikithetsu keuye kishi xuamasa keno oshika nani.

²⁴ Tino totimi lhoksami launo opelo putosulupe nani eno timi khunoqo nipuno kutami zuluve chekeu tsa picheni keno tipaqo launo putosulupe nani.

²⁵ Panoqo jukivi pelo omusulu pe kevilo; panoqo ghaghu nhethi pelo omeluve pekevilo.

²⁶ Timi lakhiye ashopa lakhi qhulukepu me pesu kutuqhalimi peithaluvi ikemu salha shupu kemiye timi tipauno aghikeu kumtsu lukhavetsu nani.

²⁷ Noye omlalo ami bepe qhipuzu aphimini pitimono ngolu nani kesha?

²⁸ Noye amiyi iquakeu shou nepe puzu opukhu pitimono ngoluni kesha?

²⁹ Tihutoi timi kutami nipu sasu zukeu ghi akuighupuke. Khunono tipau shini keno aghime shi nani.

³⁰ Timi lakhino akhuno pukachu keulo thiveni cheghiye timiye pa thaigha chemoe,

³¹ ikemu pa kughaluve aye paye ghuthu tsuni kighishe pesu lochile masave cheni, pano aghikeu thwokha kumtsu tsuvekepu shicheni.

³² Ikemu timi khuuno salhashupuni keno paye kumsukulu kitilamu kuhae, paye pa likhi pa kutsave anike.

³³ Paye shikukujo puzu ghaqhi nani; paye alholo kujomza kepushi acheni ake.

³⁴ Akimi lakhi nheshulo loghukighide nguno alau kuhae; pano amukhu lunikeu lo kihikutha kuhae.

³⁵ Paye kuthakulo shikeuye lumo nani; agho khipahi pa tsunamu pa loghu ghasumla nani.