AHOLE 5 - BAIBEL (BSI)

Salhashupu nosake Ghuttu

¹ Inu, tsaqui inilo eno ilokutsu ngo ino jupilikulu inijulo.

² Tishiaye nono kithikiyi xu kepu ithi nani eno noye akighithi kutho anikepi otsa lono michilu nani.

³ Timi kutami nipu mutsuye akhi ngozu toi aghiluvi eno lino mumakeu huye oliv teli toi phephei aghiluvi,

⁴ ikemu kughono ti shitaveni keno akuxulo aghime eno khumtsayikeu thono kutau kiumu otsumo nani.

⁵ Lino osasu kithimi yeghilo iqive nani; lino che chekeu laghiye akithipu laghike.

⁶ Liye akuxupu laghilo ngochemoe, ikemu itsusu wuve cheni eno kiu shive cheni keno kumsuchilelu chemoe.

⁷ Inuliqo, itehiye itsa inilo eno ino piakeu khilemu kumsuma kevilo.

⁸ Tikithipu totimi launo putosuvelo! Li hukikha phivilomu kupunu wukevilo!

⁹ Nono tile wu aye puzuu timino ogihu chekeu hu kutamino luveniake eno noye lhothemi shiaphi lono xesuxenimi ulono thive nani.

¹⁰ Kuchouno inaghamino okinikulu kumtsu luve nani, nono mlaqhi puakeu huye kutamiw shive nani.

¹¹ Noye okithi zua dapesu oshi aji kumtsu pitipuza igha huhushi ihi nani,

¹² eno noye ishi pinani, “Kushiye niye puzuuno shikaluvemo kela! Kushiye niye kutami pelo ishi kumzu pemo kela!

¹³ Niye ikukutsumi tsa inimoveke, niye panoqono pikeulo amlo tsumoveke.

¹⁴ Paikhavino aqo-aho zulo niye kujomza kepu shiveniye auvae.”

¹⁵ Onipu lau likhi pulubelulo eno okikimiye li likhi tsulo.

¹⁶ Otianuli shikepuhu aqha kumtsulo kutho leveni kesha?

¹⁷ Onuliqono kichimi shipuzu okuphu peni thono inaghami tianuli pelo tishi pekevilo.

¹⁸ Tighenguno onipu lau amlokiqi alo eno olhothe lono lukeu nipu sasu alopivilulo,

¹⁹ liye ashe ali toi hipuhilayi juvi eno aghileke.

²⁰ Inu, noye kushiye xupusa chekemi totimi lau okikimiye tsuni kya? Noye kushiye kutami nipuno zuizakeu pavi ani kya?

²¹ AMPEU no thwokha kumtsu ithulu ani, nono khilekhile wunamu pano ojukuto ani.

²² Kixikilami xineye alichhe lakhi toike. Pa likhi pa xine khame lono meluve cheni.

²³ Paye ghasukulu kuhakeu ghenguno thive cheni eno paw mbomzu ihulokeu lono pa puhave cheni.