AHOLE 3 - BAIBEL (BSI)

Lhothemi Kukutsu

¹ Inu, ino kiu oshikapiye keno pheve kevilo. Ino ovilo kiu shilo pikeno pulhapuju kumsupulo.

² Ino kutsupiye keuno kinikulu eno axukushupu otsu nani.

³ Khilemu aghokulu eno pulukulupu pelo opheve pekevilo. Okuo veho tsughapulo; omlolo yesu pululo.

⁴ Nono hipau shiaye Alhou ghi timi ghi oju alo nani.

⁵ Omlo kuchopu pesu AMPEU pukhulo, Nono ithi akeu shou bepe xukevilo.

⁶ Nono mlakeu thwokhalo AMPEU kumsululo eno pano alaghi achipiu opiye nani.

⁷ Khilemu olikhi nouno alokutsuu kepi pukha kevilo; AMPEU sumsalo eno alhoksa launo tsughuvelo.

⁸ Nono titoi shi aye tino shikipivi kusughu kivi toi oghuzaku shipivilu nani eno oghichhe ghime kumthulu nani.

⁹ Oyeghi lono tuxatini ipeghikeu akiviu pesu AMPEU lau akumllagho shi pa gihulo.

¹⁰ Nono tishiaye, obi aleye athino chhitoilu nani eno noye atsayiji kupukuno shi kikepe pualu nani.

¹¹ Inu, kughou AMPEU no oshikimzuni keno tipau thaigha kevilo momu pano sakiyikeulo anhuthive kevilo.

¹² Anu khipau jupesu akijivilo acheni keno tipau apuno shikumzu tsu cheketoi AMPEU no pano kimiye chekemi shikumzu cheni.

¹³ Khunono alokutsu eno vethakulu ithi kuphaluni keno pano kumghae.

¹⁴ Tsandiyi ngo shuna lono kighishe kulupu akeu nguno hipaulo kighishe pavike.

¹⁵ Alokutsuye amekusho chi nguno amekuapuke; nono lunishi akeu kiunomu hipau sasu kimghi mlae.

¹⁶ Alokutsuno axukushu otsu ani eno tipa mtsa kinikulu ngo agigihu ghi tsucheni.

¹⁷ Alokutsuno okuxu alokepu shilu nani, eno akuxulo alashilupe cheni.

¹⁸ Khunono alotsuveni keno alovi cheni; alokutsuno akuxupu panoqo tsu cheni.

¹⁹ AMPEU no pa lokutsu lono ayeghi lhope; pa kighithi lono atsutsu kughupe qhi.

²⁰ Pa lokutsuno aghoki qowulupe cheni eno khungkusu pelo ayeghi shou ghuqhi chenipe.

²¹ Inu, olokutsu eno jupilikulu tsuqululo. Panoqo pelo khilemu olauno wuvepe kevilo.

²² Panoqono ongulho ghenguno akuxupu, jukivi eno alokivi kuxu ke.

²³ Tishi aye olalo ililayi wulu nani eno khilemu kupuxalumo nani.

²⁴ Nono azualo zuakelo ghi noye musamo nani eno noye putholo zucheyi zuhulu nani.

²⁵ Noye zulileno aghesuqhi ighi kelo amlo kusapu kuha nani eno pasapaghano kixikilami shou ikughi chekeu paphi shimo nani.

²⁶ AMPEU no opelo akivishi ape nani. Pano opelo alichhelo ikiqi ilopemo nani.

²⁷ Kugho kughomu nono shikulupu thaqhulo kutamino avehupu shiaghikeu kuphulo.

²⁸ Tsala nono itehino pa kuphulu kepushi aghi aye okisughumi vilo thoghiu kuto lo kheaghilopi khilemu pikevilo.

²⁹ Okisughumi ghuzanike ghenguno mqumugha kiumu kuchughu kevilo; paye opukhu ghi ophivilo xuchenike.

³⁰ Pano oshipsakepu shipuaghimoaye akiqi kuhamu timi khuala sasu kighekile kevilo.

³¹ Heqhi buqhichekemi jupe anheshu kevilo momu panoqo toi shinikeu kughatha kevilo,

³² kughengu alhoksa shiche kemiye AMPEU no mithi cheni ikemu akumzumi ye pano pulube acheni.

³³ Kixikilami kibo shou Alhou no angsu becheni, ikemu akumzumi kibo kumghatsu cheni.

³⁴ AMPEU ye timi thaigha chekemi peitha chemoe ikemu khunono aqhokighemi keno tipano lau amlo kiqi acheni.

³⁵ Alokutsumi ye gihu kuzupu kuphalu nani ikemu mbomzumiye kujomzakeu pekutsulu cheni.