AHOLE 21 - BAIBEL (BSI)

¹ AMPEU no mlalei aghoki qowukeula wulupe ketoi akukau kukumsu ghi ghakutsupe ani.

² Nono shichekeuye thwokha achipiu kepi kumsu aghiluvi. Ikemu AMPEU no omlo peqheju cheni kepi kumsuchilelulo.

³ Kiuno achipi eno akuzupukeno tipau shilo; tino aghashipe AMPEU mllakeu nguno akiviue.

⁴ Kixikilamiye pa likhi pa pulupivi keu ngo qhezalaki keuno qhasupe acheni eno hiye axineke.

⁵ Tsaqutsalei kughulo eno noye nibonilei anani; nono mighi mughayi mla aye lukumkha shimo nani.

⁶ Amikucho kumo lono akini ithulukeuye paikhavino hauve cheni tiye akithilo osailo mphi lono tishive cheni.

⁷ Kixikilami no heqhi buqhi chekeu huno panoqo pithive cheni, kughengu panonguye achipiu shini keu milive cheni.

⁸ Pimi puakemi laghiye chighi chilaike; pimimokemiye achipiu shi cheni.

⁹ Mutomushu keu nipu sasu kughuna anikeuye aki sheqholo auve keu pavie.

¹⁰ Kixikilamiye pulhapuju alhoksa kumla shini shiqhiyi acheni; panonguye khumu kimiyeqhiyi chemoe.

¹¹ Alikhi apulupivi chekemi lakhino pa ghime ithuluaye khilemu kumsuju chemokemi ghi ithikepu lakhi shikalu cheni. Alokutsumi lakhiye kiu pa shikave keno tipauno ithiluve cheni.

¹² Alhou, amikuchouno kixikilami kibolo kiu shiani keno ithi ani eno pano kixikilami sunheqhipe shikupsalo suve nani.

¹³ Kumlhomino ighamuku keu initsumo aye okuphu peniye ighamuku keu chilutsumo nani.

¹⁴ Timi khamino oshou amlo ide aghiaye tuqhouno agho chhevelo paye iquneive nani.

¹⁵ Kuchou xakutha shitsu kelo kivimiye alokivishive cheni ikemu alhoksamiye tipauno pitipuzaqhi cheni.

¹⁶ Kumsukulu kivi launo itshu susu wuve kemiye akithino pa khe anike.

¹⁷ Nibonileyi kilhe keu aji eno achuqupu kiviye khilemu opelo kinikulu shilupemo nani.

¹⁸ Kixikilamino kivimi ghimeqhiniye pukaputsa keuye pano likhi pano shou ikuve aghi cheni.

¹⁹ Mutomushu chekeu eno muchhoche keu nipu sasu kughuna nikepuye timi kughunamoke alo xuakeu pavie.

²⁰ Alokutsumiye amekusho nhemgha nibonileyi peitha cheni ikemu mbomzumiye papashi ithulu kemtsa panowu pisa puwove cheni.

²¹ Kimiyeqhiyi eno amikucho shi xulo eno noye axushu nani; kutamino ogihu eno achipiu lono opeitha nani.

²² Amuqukini ghushimi atou ye akumtomino aphughi kheaghi namu leluve nani eno tipaqono pukhuchekeu liwo ghi kutsapinyive nani.

²³ Nono akupuna lono putou anishi aye kiu picheni keno kutokupui luvelo.

²⁴ Alikhi apulupivi chekemi ipiyejulo eno paye aqhekuzami eno kutami ghenguno kumsujumokemi lakhi kepi opiyelu nani.

²⁵ Akipichimi khuno mlanishimo keno pa likhi pa heqhi anike;

²⁶ pano lunishi akeu likhi kumsu acheni. Amikuchomiye kupumono kutami tsulu cheni.

²⁷ Kughou kixikilamino alhoksa kimiji lono aghashipe mllani keno AMPEU ye tipau mithi cheni.

²⁸ Kimkimino ashepe tsukeuye puluchemoe ikemu kumsu kutojuno piqhi kemi tsa ikhilu cheni.

²⁹ Amikuchomiye pano likhi pano ghili ithi cheni; ikemu kixikilamiye ithi ake ghili shi acheni.

³⁰ Tsala AMPEU no ogholo ngomove aye alokutsu, tsughaminhe keu eno jupili kuluye okuphuluni chemoe.

³¹ Aghushinike ghenguno nono khurshi kutope aghiluvi ikemu tokulu tsuchekeuye AMPEU no ke.