AHOLE 16 - BAIBEL (BSI)

¹ Timino kughuphe cheni ikemu tipau khokichileye Alhou no tsu cheni.

² Nono kumsukeu thwokha achipike ipiluvi ikemu AMPEU no ololo akeu peqheju cheni.

³ AMPEU vilo okukughu kumghatsu penike khulo eno opelo tipaqo shikupulu pe nani.

⁴ AMPEU no mlape puakeu jeli kumtsu pututa kimji ani; eno kixikilamiye kutsapinyiveni keu kimji shipe puani.

⁵ Qhezalaki ghi xuchekemi kumtsu AMPEU no mithi acheni; paye panoqo pelo aghime shipenikeu lono povepemo nani.

⁶ Qhoqhu eno pukhukulupu shilo eno Alhou no oxine qhivetsu nani. AMPEU ghokulu shilo eno olau alhoksapu shimo nani.

⁷ Kughou nono AMPEU pulou shini keno noye oghumi pesu shompami shilu nani.

⁸ Amikucho lono kitila qelukeuno amikucho kumo lono kumzapu suwo puaghikeu nguno akiviuke.

⁹ Nono akukughu shipuaghiluvi ikemu Alhou no okumla kughutha kichetsu cheni.

¹⁰ Akukauye akuka gha pesu picheni; paw kughakuthaqoye pulhapuju achipike.

¹¹ AMPEU ye ahhu ngo akimighi tu kuchou lono peitha keuno paloke eno jekeu jeli kumtsu achipi lono shipe nishi cheni.

¹² Kukamiye alhoksa pelo tishi auve pemlake kughengu yepeka pelo mutotoilu chekeu huye achipiu xakutha akeu lono ke.

¹³ Kukamiye kuchou chilunishike eno khunono tipau pini keno tipau lau amloqi cheni.

¹⁴ Alokutsumiye akukau pelo alokivishi apenike pukaputsa cheni; akukauno amlo ideve aye timi khamiye pithive luvike.

¹⁵ Akukau lopuye ghixu tsalalo tsutsughu sughiche keu khungkusu toike, tilehi akuxupu anike.

¹⁶ Shuna ngo tsandi nguno alau alokutsu ngo akighithi akeu pavibeke.

¹⁷ Khunono alokemi keno alhoksa laghi pula chemoe; ikehu noye khilau wucheni keno jukutolo, tino okuxu xakulupu shi nanike.

¹⁸ Aqhekuzano shikupsalo sawu cheni eno qhezalaki keuno xaqhikulu cheni.

¹⁹ Qhezalaki xulepuwo kijelu keu nguno aqho kigheu eno akumlhou shiakeu pavike.

²⁰ Kiu oshikani keno amlo tsuqhiyi shilo eno noye tokulupu shi nani; AMPEU pukhulo eno noye alovilu nani.

²¹ Alokutsumi tekhoyikeqoye pano vethathikeu lono kutami pelo pa ithi chenipe. Pa tsa khijehi jumghai keno tijehi paye kutamino pavesumla kepu shive cheni.

²² Alokutsuye alokutsumi ghenguno akuxupu zupuki lakhike ikemu mbomzumi shikaputhu nike pukaputsa akeu adouke.

²³ Tsukhuyikemiye panono pimphi lono kumsuju paghi cheni; tishiaye panono kiu pikeno timi putsaqhilu keu ani.

²⁴ Kimiyekini tsaye akhingozu toike, ngoniyi michelu eno ashi aji kivipuke.

²⁵ Nono achipiu laghi kepi kumsuakeuye akithipulo sailove kepu shi aghiluvi.

²⁶ Aqekiqemi khuamzuno papelo aka aveshi mlachenipe tiye pano muzuthi akeu ghapiqi tsunishiyeke.

²⁷ Alhoksamiye kutami shipsanikeu laghi phu cheni; panoqo tsapi ghi alhoksano pitipuzaqhi cheni.

²⁸ Kusakughamino kuqhu kidimokeu vekupha cheni akupuna xukutho cheni eno shompami kughuxavetsu cheni.

²⁹ Hekiqhi bukiqhimiye pa kusami pishiqhi sawuve cheni eno akuxu pukhule keulo sawu cheni.

³⁰ Khunono numigheyi shi anhekutsu otsuni keno timi tipaqo jukutolo; panonguye kiukela alhoksa kumsupu anike.

³¹ Amikuchomi saxuye axukushuke; asa kumpaye ajekipipu kutsukuqhoke.

³² Kutuu kuluye akuka kumto nguno akiviue. Olikhi oghasulu keuno aphughi kuchopu qhasulukeu nguno akiviuke.

³³ Timino Alhou pulou ithinishi kelauno asaqhi cheni ikemu Alhou no khokichile kihithape pua cheni.