AHOLE 12 - BAIBEL (BSI)

¹ Khunono akighithi kimiye cheni keno pimivekelo panovilo pitsupe nishi cheni. Shikithekutsumi junishimoaye tiye mbomzuke.

² AMPEU ye timi kivimi lau amlo kiqishi cheni ikemu alhoksa kuchughukemi kileqhive cheni.

³ Kixikilaye sushokulu tsuchemoe ikemu amikuchomiye mutotoi puthughope acheni.

⁴ Anipu kiviye akimi kijivilopu eno li lokivipuke; ikemu anipu khipauno likimi shou kujokepu sughini keno tiye pa ghi-anhulo angsuno suakeu toike.

⁵ Kuchou shi xuchekemiye agholauno opeitha nani, kixikilamiye opishiqhive nishikeu likhike.

⁶ Kixikilami tsapiye aji pele nikeu tsa likhike ikemu amikuchomi tsano kichikumsa kemi xaphelu cheni.

⁷ Kixikilamiye pano xaqhikulu kepu kusholu cheni eno ati anuli aghi chemoe ikemu amikuchomi kiboye xu acheni.

⁸ Nono tsukhutsuvayi shiaye osheqhe kepu shi nani; nono mbomzu shi aye timino othogha nani.

⁹ Aje likhino kijemi kepino tuqutughashi xu akepuye inapughami mu shino mlachughi xu akeu pavie.

¹⁰ Timi kiviye pawu pichepighi jukuto cheni ikemu kixikilami ye pawu pichepiqhi ayikusashi peitha cheni.

¹¹ Aka aveshi mlachekemi alukichimiye chukepu kupukunoshi acheni ikemu avehu kuhakeu kumlapu lono ado pevekeuye aghuzunikhake.

¹² Kixikilamiye alhoksa phupuzu tipau shicheni ikemu amikuchomiye mutotoi acheni.

¹³ Kixikilamiye pa kichino pikuquve keuno pa meluve cheni ikemu amikuchomiye akupuna lono ipeluve cheni.

¹⁴ Osaxuye nono kiu pini eno shini keno tipau shou bepe ani; kiu akuzupu keno noye tipau iyighilu nani.

¹⁵ Mbomzumino pulhapuju pano likhino achipi kepi kumsu cheni. Alokutsumiye akukutsu tsa inicheni.

¹⁶ Kughuzumino amlo shimove aye paye paikhavino tipau pephe piye cheni. Kumsukulumiye pa xishikeu jukumghaleive cheni.

¹⁷ Kughou nono kuchou tsa pini keno achipiu xakutha shiani ikemu akimkiye akumou xakuthalo sawuve cheni.

¹⁸ Kumsujumokeu tsaye azuta kutsugha toi thonhei ghuzave cheni ikemu alokutsu tsa pikeuno shipivilu cheni.

¹⁹ Akimkiye akuxu ikhonheike ikemu kuchouye alhokupujulo xu ache nani.

²⁰ Kusakugha iqiphe chekemi mlolo pishikiqhi acheni ikemu akivipu ghenguno mla chekemiye alokivi ithulu cheni.

²¹ Amikuchomi shouye alhoksa kiumu ikughi chemoe ikemu kixikilami salaye akupuna thono kiumu kuhae.

²² AMPEU ye kimkimi mithi cheni ikemu khunono pututano piqhivekeu tsa pecheni keno paye tipaqo lau amloqi cheni.

²³ Kumsukulumiye panono kiu ithiani keno tipaulo inaqhoi acheni ikemu mbomzumino pano yekumtha zale cheni.

²⁴ Aka aghashi mlakeuno akuka otsu cheni; akipichino opelo aquaxemi shivepe cheni.

²⁵ Amlo kutakihikeuno olauno alokivi ikhisuwuve tsu cheni, ikemu kimiyekeu tsano olopivitsu cheni.

²⁶ Amikuchomiye pa shou ghenguno sakipheuke ikemu kixikilami lakhino panoqo sakughuzuve cheni.

²⁷ Akipichi shi aye nono hachekeu khilemu ithumla nani ikemu nono aka aveshi mla aye noye kinikulu ithulu nani.

²⁸ Amikuchoye akuxupu laghike, kixikilaye akithipu laghike.