ACHINE 9 - BAIBEL (BSI)

Aron no Aghakishi Mllae

¹ Akimthepu shikeu chini tave puzu thoghiu tsalalo Muse no Aron ngo panuliqo eno Israil lo sakiphemiqo kusaighipe.

² Pano Aron vilo pi, “Amshitsu alhothe lakhi eno bheritsu tukutiye kuhakeu lakhi pesu AMPEU mllalo, amshitsu no axine kumllagho eno bheritsuno pitikeu kumllagho shilo.

³ Tishieno Israilmi vilo axine kumllagho ghenguno anetsu lakhi eno piti kumllagho ghenguno bheriti lakhi eno amshiti lakhi tukutiye kuhakeu ampe lakhi khi shiakeu,

⁴ eno kuposhukulu kumllagho ghenguno amshitsu lakhi eno bheritsu lakhi ishi saghilo pilo. Panonguye tipaqo pesu athi kumllagho teli pesu kunuvekeu gholono AMPEU lau aghashikeu mlla pelo. Panonguye hipau shimasake kughengu AMPEU no ishino panoqo lau ipeghini chenike.”

⁵ Panonguno Muse no ahza tsukeu jeli kumtsu Aphiki gizulo saghi eno aqoaho kuchopu AMPEU mllanike tilehi kuho kumqoluve.

⁶ Muse no pi, “Nongu pelo hipaqo kumtsu shipenike AMPEU no ahza nongu tsuvae, tishianguno pano akeu saghu saghuikeu kuvu nongu lau ipeghilu peniyeke.”

⁷ Tishieno pano Aron vilo pi, “Akiptialo wulo eno axine kumllagho ngo pitikeu kumllagho pesu mllalo tiye oxineqo eno timiqo xine ikhivelu kepushi. Timiqo xine ikhivetsu nike akumllagho tsulo, AMPEU no ahza tsuvekeu toi shilo.”

⁸ Aron no akiptialo wu eno pa likhi pa ghenguno axine kumllagho shikepu amshitsu alhothe akeu ghiqhi.

⁹ Panuli qono pa lau ahji peighi eno tipaulo pa uloti chosu eno hami pesu akiptia chekulo ichushei akeulo nupuku eno ahji aghikeqo pesu akiptia bophilo leqhive.

¹⁰ Tithiu pano atha ngo amchilothi eno aloshi leqhi akiviu pesu akiptia shouno pitive, tiye AMPEU no Muse vilo ahza tsukeu toi shike.

¹¹ Ikemu pano ashi eno ayiko pesu ngochekeua bocho nguno khalauno pitiveke.

¹² Pano palikhi pa ghenguno pitikeu kumllagho shikepu lhoxu akeu ghiqhi. Pa nuliqono pa lau ahji peighi eno pano tipau pesu akiptia jibo bidi kujolo vepukuke.

¹³ Panonguno akutsu ngo lhoxu tipau shileqhi kutauqo pewo patsu eno pano akiptia shouno pitive.

¹⁴ Tishieno pano kighinoli ngo aluko kuma qhuve puzu akiptialo pitikeu kumllagho kutau akeqo shou qhieno pitike.

¹⁵ Tishive kethiu, pano timiqo wu akumllagho pesu sughi. Timiqo xine ghenguno mllanikeu shi akeu ane saghi no ghiqhi eno tipau pesu mllave tiye pa likhi pa ghenguno axine kumllagho shikeu toi shike.

¹⁶ Pano pitikeu kumllagho ghengu ghi lhoxu saghi eno ayezah lo akeu kiqi lono pesu mlae.

¹⁷ Pano athi kumllagho sughi eno asho mukhu au kie lakhi epesu akiptia shouno piti. Hiye tsalakipetsulo piti keu kumllagho nguno alau sukuphakeu lakhike.

¹⁸ Timiqo ghenguno kuposhukulu kumllagho lakhi shi pano amshitsu ngo bheritsu ghiqhi. Pa nuliqono ahji pesu pa lau sughi eno pano akiptia jibo bidi kujolo tipau vepuku.

¹⁹ Aron no amshitsu ngo bheritsu tha jeliqo pesu

²⁰ lhoxuqo wu amlashi shou bepuzu akiptialo pesu wu

²¹ eno amlashi ngo aluko ajeuqo pesu akimchi gho lakhi shi achinemi ghenguno AMPEU lau qhitsu, tiye Muse no ahza tsukeu toi shike.

²² Aron no aghashikeu kumtsu shikhave kethiu, pano timiqo shou pau peqhe puzu panoqo kumghatsu eno tishieno aqhou cheiqighive.

²³ Muse ngo Aron pamano AMPEU achekeu Phikilo ilove eno pamano khalau ipeghi kelo pamano timiqo shou kumghatsu eno AMPEU no sa akeu saghu saghuikeu kuvu timiqo kumtsu lau ipeghi.

²⁴ Paikhavino AMPEU no ami lakhi puwu eno tipauno pitikeu kumllagho ngo atha jeli akiptia shou akeu piti puhavetsu. Timiqono tipau ithulu kelo panongu kumtsu iqhaigha no ayeghilo panongu gi pishiqho luve.