ACHINE 6 - BAIBEL (BSI)

¹ AMPEU no peitha kepu yezah hipaqo Muse tsuke.

^2-3 Timi lakhino pa kusami Israilmi lakhino pekikepe pa gholo qhikeu, huu hiu thelilo qhikeu tsuchilemove keu momu pa launo kiuala pukaluveni momu pa pishiqhiluve momu kiuala puhavekeu lo mikikeu tsa pipuzu paye tipau ithumla kepi tushoqhive keu lono AMPEU shou axine shive aye akumllagho lakhi shipelo.

^4-5 Hikithipu shipuzu timi lakhino axine shive keulo pano amikucho kumo lono kiu kiumu luvekeu paye lochileve masa. Pano kuquvekeu phuluveke tsala lono paye tipau mipeu lau qhoi lochilelo eno tinguno alauno tipau saje pungulo saje lakhi qhemi pesu vebeno lochile masa.

⁶ Paye AMPEU lau tipau lochilekeu kumllagho ghi achineu lau anetsu momu bheritsu tukutiye kuhakeu sughilo. Tipauye kiume qhemi shikepu keno achine alo mighi chekeu qhemi lono hulo.

⁷ Achineu no timi tipau xine ghenguno aghashi keu pesu mllalo eno pa xine ye peivetsu nanike.

Kuchopu Pitikeu Ghakishi

^8-9 Aron ngo panuliqo lau piti mllakeu gho yezah hipaqo tsupenike AMPEU no Muse lau ahza tsuke. Piti mllakeugho lakhi ye puthotsu akiptia shou qhipualo eno ami kuqupe pualo.

¹⁰ Tipathiu achineuno pa phikuzu phepheikeu ngo amini kughukhou pepusu akiptialo iyiyikeu yevu shopesu akiptia jibolo qhilo.

¹¹ Tishieno pa phimini kilive puzu ayevu pesu ngochekeu ghazu nguno khalau chini kimthe puakeu-alo pewulo.

¹² Akiptialo amiye iqu ape masake eno khilemu inhevepe kepu kumoke. Inaqhe atsu-tsu achineuno tipaulo sukughupu su suwo sulo, tipau shou piti mllakeu gho kithikiyi shilo eno kuposhukulu kumllagho lo atha pesu pitilo.

¹³ Akiptialo amiye pulhapuju iqu apelo eno khilemu inheve pekevilo.

Athi Kumllagho

¹⁴ Athi kumllagho yezahye hipaqoke. Aron laghami achineuno athi kumllagho pesu akiptia gizu lono AMPEU lau qhitsu lo.

¹⁵ Tishi puzu asho mukhu kie lakhi ngo teli lulo eno tipau shou tsungquikeu zu suno akiptia lono tipaqo pitilo, tiye kumtsu qhoi AMPEU lau mllavekeu shi kumsumamla keu michi shipelo. Akumllagho hipau xoye AMPEU lopu shichenike.

^16-17 Achinemino tipau achili aghikeqo chulu nani. Tiye kholaqhi sumo puzu asho shilo eno akimthea lono chulo, tiye AMPEU no achekeu Phiki bokuthabo lono chulo. AMPEU no achinemi lau piti mllakeu lono panoqo saje tsu anike. Tiye axine kumllagho ngo lochilekeu kumllagho toi ighono akimtheke.

¹⁸ Hithiazuu ghulokilo ghi Aron laghalo kiptimi thaqhuno AMPEU lau piti mllakeu lono panoqo saje lupesu chulu che nanike. Kutami khunono achuqupu kumllagho buni keno tipau kimthe kukano pa shipusa nani.

¹⁹ AMPEU no Muse lau ayezah hipaqo tsuke,

²⁰ tiye Aron laghalo achinemi lakhi akimthepu shinikeulo, Paye akimthepu shive ke tsalalo AMPEU lau akumllagho lakhi shilo, tiye ashomukhu kilogram lakhi, tsala kipetsulo athi kumllagho qhemi shilo, inaqheno tuxa eno kijiliuno tuxa ishi pesu mllalo.

²¹ Tiye teli pesu kunulo eno ayipa lono shu pugha puzu chunuphono athi kumllagho lakhi tsulo, AMPEU lau aloqikeu xo lakhi shilo.

²² Hithiazuu ghi Aron laghami khuuno Achinetou shini keno tipauye akumllagho hipau shimasae. Hiye AMPEU lau aghashi keu lakhi shi kumtsu qhoi pitive masae.

²³ Athi kumllagho achineuno pesu tsuvekeu kitila pinamu chukepu kumoe; tipau kumtsu pitive masake.

Axine Kumllagho

²⁴ AMPEU no Muse vilo ahza tsu puzu

²⁵ axine kumllaghoqo ghenguno ayezah hipaqo pesu Aron ngo panuliqo tsupenikeu shi. Axine kumllagho shikepu lhoxuye akiptia ahuu kudauno ghiqhilo, tiye piti kumllagho shikepu lhoxuqo ghiqhi chekeu-alo. Hiye ighono akimthe kumllagho lakhike.

²⁶ Achineu khuno lhoxu tipau pesu agha shikeno akimthea lakhi lono pano tipau shi chulu nani, tiye AMPEU no achekeu Phiki bokuthabolo.

²⁷ Timi na kiu kiu pinamu lhoxu tipau shi dilukeuye tipau kimthe kukano pa shipusa nani. Aphimini kiukiu namu lhoxu tipau jih dalu napiaye, akimthe-a lono tipau qhuve masa.

²⁸ Ayeghili khipau lono tipau shi lhoni keno tipauye kubolevelo eno ayili peitha napiaye tipauye akivishi sukimtheve masa eno azu pesu qhuvelo.

²⁹ Achinemi kibolo kiptimiye khuu khuu namu tipau kumllagho chulu nani; tiye ighono akimtheke.

³⁰ Ikemu ahji kitilamu Aphikilo suloghi aye eno axine ikhisuwu veni ke chinikeulo peitha aye lhoxu tipau shi chukepu kumoe; tiye pitive masake.