ACHINE 4 - BAIBEL (BSI)

Shipimikulu Xine Kumllagho

¹ AMPEU no Muse pelo Israilmi vilo pipenike ahza tsukeuno

² timi khuno mthano axine shive eno AMPEU no ahza tsukeu hexaveni keno ayeh hipaqo pepimhe lopike.

³ Achinetouno axine shive no timiqo shou angusu sughive aye pano amshitsu alhothe tukutiye kiumu kuhakeu pesu tsulo eno pa xine ghenguno AMPEU lau tipau heqhipe agha shilo.

⁴ Pano amshitsu sasu Aphiki hukikhalo saghino pau pesu tipau kutsu shou belo eno AMPEU gizu lono tipau heqhilo.

⁵ Tishieno Achinetouno amshitsu jih hami lupuzu Aphiki alou ilolo.

⁶ Pano pa uloti pesu ahjilo chosulo eno tipau pesu akimthe nhaqhi phi zulo ghuthu tsuni kuzute pukulo.

⁷ Tipathiu pano Aphikilo tsungquikeu kiptia chekulo ichushei akeu shou ahji hami nupukulo. Ahji khije aghinikeno tipaqoye agha shikeu kiptia ti Aphiki hukikhalo akeu bophilo leqhi khavelo.

⁸ Amshitsu hipau launo pano atha kumtsu luvelo, kighikuxa aghikeu,

⁹ amchilothi eno tipaqolo atha aghikeu eno aloshi leqhi akiviu.

¹⁰ Achineuno atha tipau lupuzu mllakeugho kiptia lono tipaqo pitilo; tiye kuposhukulu kumllagho ghenguno lhoxu heqhikeu tha peithakeu toi shilo.

¹¹ Ikemu tipau yiko ngo tipau shicho kumtsu, akutsu, apukhu eno dubonoli ghi sukuqhano

¹² kumtsu xapusu ngo chekeu ghazu nguno khalau achineyeh kiqi lono mithe puakeu alo wulo, ayevuqo leqhi chekeu-alo eno pano tilauno asuno ami shikeu shouno tipaqo pitilo.

¹³ Tsala Israilmi aqoahono mtha puzu axine shiveni eno AMPEU no ahza tsukeu gholo lakhi hexavekeu ngusu shive aye,

¹⁴ axine shivekeu ithi kemtsa aqoaho ghano mtazu axine kumllagho shikepushi amshitsu alhothe lakhi sughilo. Panonguno AMPEU no ngochekeu Phikilo tipau saighilo,

¹⁵ eno aqoaholo sakiphemino tipau kutsu shou panoqo u belo eno tilehino tipau ghiqhilo.

¹⁶ Achinetouno Aphiki alou amshitsu jih hami pe ilolo,

¹⁷ tipaulo pau loti chosulo eno nhaqhi phi gizu lono ghuthu tsuni tipa shou kuzute pukulo.

¹⁸ Pano ahji hami pesu Aphikilo tsungquikeu-ta kiptialo ichushei keulo nupukulo eno ahji aghikeqoye agha shi pitichekeu akiptia bophilo leqhilo, tiye Aphiki hukikhalo akeulo.

¹⁹ Tipashelo pano tipau tha kumtsu lupuzu akiptia lono pitivelo.

²⁰ Pano axine kumllagho ghenguno amshitsu pesu kishi shivekeno tipaphi lono hipau mishitsu ghi tishi shilo eno hipa ghola lono pano timiqo xine ghenguno agha shikeu shilo eno panongu xineye peivetsu nanike.

²¹ Tipathiu pano amshitsu kumo pesu aqono ngochekeu ghazu khalau wuno pitilo, tiye pa likhi pa xine ghenguno amshitsu mllakeu pano pitikeu toi shilo. Hiye aqoaho xine ikhisuwu veni ke akumllagho shikeuke.

²² Tsala ayehkipemi lakhino mthano axine shiveno AMPEU zah kutsu gholo lakhi hexavekeu ngusu shive aye,

²³ pano axine shivekeu ithive kemtsa mtazu anetsu tukutiye kiumu kuhakeu lakhi pesu akumllagho shinike saghilo.

²⁴ Pano tipau kutsu shou pau beno akiptia ahuu kudauno tipau ghiqhilo, khileno piti mllakeu lhoxuqo ghiqhi cheni keno tipau alo. Hiye axine ikhisu wuve tsunikeu kumllagho lakhike.

²⁵ Achineuno pauloti pesu lhoxu tipau jihlo chosulo eno akiptia chekulo ichushei keulo nupukulo eno tipau jih kutauqoye akiptia bophilo leqhilo.

²⁶ Tipashelo pano tipau tha kumtsu akiptia lono pitilo tiye kuposhukulu kumllagho ghenguno lhoxu heqhikeu tha pano piti keu paphi shilo. Hipa ghola lono achineuno ayehkipeu xine ghenguno agha shikeu pesu mllalo eno pa xineye peivetsu nani.

²⁷ Tsala inapughami lakhino mthano axine shiveno AMPEU zah kutsu gholo hexavekeu ngusu shive aye,

²⁸ pano axine shivekeu ithilu ve kemtsa paye mtazu anequ tukutiye kiumu kuhakeu lakhi pesu akumllagho shinike saghilo.

²⁹ Pano tipau kutsu shou pau beno akiptia ahuu kudauno ghiqhilo, khileno piti mllakeu lhoxuqo ghiqhi chenikeno tipa alo.

³⁰ Achineuno pa uloti pesu lhoxu tipau jihlo chosulo eno akiptia chekulo ichushei akeulo nupukulo eno tipau jih kutauqoye akiptia bophilo leqhilo.

³¹ Tipathiu pano tipau tha kumtsu ikhiluvelo, tiye kuposhukulu kumllagho ghenguno lhoxu heqhikeu lono atha ikhilu keu toi shilo eno pano tipau pesu akiptia lono pitilo tishianguno tipau xono AMPEU lopushipenike. Hipa ghola lono achineuno timi tipau xine ghenguno agha shikeu pesu mllalo eno timi tipau xineye peivetsu nanike.

³² Timi lakhino axine kumllagho shikepushi bheri lakhi saghi aye tiye tukutiye kiumu kuhakeu aqu shimasake.

³³ Pano tipau kutsulo pau beno tiye akiptia ahuu kudauno ghiqhi lo, khileno piti mllakeu lhoxuqo ghiqhi cheni keno tipa-alo.

³⁴ Achineuno lhoxu tipau jih lo pa uloti chosulo eno akiptia chekulo ichushei akeulo nupukulo eno ahji aghi keqoye akiptia bophilo leqhilo.

³⁵ Tipashelo pano tipau tha kumtsu ikhilulo, tiye kuposhukulu kumllagho ghenguno lhoxu ghiqhikeu tha ikhilukeu paphishi shilo eno pano tipau pesu akiptia lono achuqupu kumllagho gholono AMPEU tsukeu shi pitilo. Hipa ghola lono achineuno timi tipau xine ghenguno agha shikeu pesu mllalo, eno timi tipau xineye peivetsu nanike.