ACHINE 3 - BAIBEL (BSI)

Kuposhukulu Kumllagho

¹ Kughokughomu timi lakhi no pa mishi lakhi pesu kuposhukulu kumllagho mllani keno tiye amshi tsu momu amshiqu tukutiye kumu kuhakeu shilo.

² Timi tipau no amshi kutsulo pau belo eno AMPEU no achekeu Phiki hukikhala lono ghiqhilo. Aron laghami achineu no ahji pesu akiptia jibo bidi kujolo vepukulo

³ eno lhoxu tipau shileqhi hipaqo pesu amino piti mllakeugho shi AMPEU lau sughilo: kighinoli lo atha aghikeu kumtsu,

⁴ amchilothi eno tipaulo atha akeqo, aloshi aleqhi akiviu.

⁵ Achinemi no hipaqo kumtsu pesu akiptialo piti kumllagho gholono pitilo. Achuqupu kumllagho xo hipauye AMPEU lopu shicheni.

⁶ Tsala bheri momu ane lakhi pesu kuposhukulu kumllagho shi aye tiye atsu na aqu namu pesu shiluvi ikemu tiye tukutiye kiumu kuhakeu shimayesake.

⁷ Timi lakhi no bheri pesu mlla aye,

⁸ pau pesu tipau kutsu shou beno Aphiki zulono tipau ghiqhilo. Achinemino tipau jih pesu akiptia jibo bidi kujolo vepukulo

⁹ eno ashi leqhi hipaqo pesu amino piti mllakeu shi AMPEU lau tsulo: atha, ashomhi tha ashomhibo ghikutha, kighinoli kuzupe akeu atha kumtsu kighikuxatha kumtsu,

¹⁰ amchilothi tipaulo atha kumtsu eno aloshi aleqhi akiviu.

¹¹ Peitha akeu achineuno hipaqo kumtsu pesu AMPEU lau achuqupu kumllagho shi akiptia lono pitilo.

¹² Timi lakhino ane pesu mlla aye,

¹³ paye pau pesu tipau kutsu shou beno Aphiki gizu lono ghiqhilo. Achinemino tipau jih pesu akiptia jibo bidi kujo lo vepukulo

¹⁴ eno ashi leqhi hipaqo pesu AMPEU lau achuqupu kumllagho shi tsulo; kighinoli kuzupe akeu atha kuchopu, kighikuxa tha dape aghikeu,

¹⁵ amchilothi eno tile atha akeu kumtsu eno aloshi aleqhi akiviu.

¹⁶ Achineuno hipaqo kumtsu pesu akiptia lono pitilo, tiye AMPEU lopu shitsunike achuqupu kumllagho lakhike. Atha jeli kumtsu AMPEU salake.

¹⁷ Israilmi khuunomu atha momu ahji kiumu chukepu kumoe; ayezah hipauye Israilmi kumtsuno khile khile kughuna aghi pinamu alhokupujulo pepimheche masake.