ACHINE 24 - BAIBEL (BSI)

Akulubo Jukutonikeu

¹ AMPEU no Muse vilo

² ahza hipaqo pesu Israilmi lau tsulo pike: Aphikilo akuluqo ghenguno oliv teli tsughukhuyi keu akiviu sughilo, tishi anguno akulu lakhi tamono iquape kepu shilo.

³ Kijili atsu-tsu Aron no tipaqo kuqulo eno inaqhe kutolo iqu akepu shilo, khile AMPEU phikilo Puloshoqhi Bohu Shishe Akimthe-a tipau zulo nhaqhiphi nguno khalau kudauno shilo. Pekithiyeh hipauye ighinikeu ghuloki kumtsulo shiche masae.

⁴ Akulu kibepu shunayi kutsughuno shikeu shou akulu akeqo Aron no tuchomujolo eno tipaqoye AMPEU no achekeu-alo ado kumtsulo iqu apenike jumasake.

Alhou lau Asho mlla

⁵ Asho mukhu kilogram chighi kini lulo eno ashopa chighi kini shupughape qhilo.

⁶ Shuna tsughukhui keuno kuzukeu akibepu khipau AMPEU no achekeu-alo ani keno tipau shou ashopaqo pesu ajo kini shi qhilo ajo lakhilo ashopa tsughogho.

⁷ Ashopa zuqhulo achuqupu kumllagho lakhi kumsumamo keu shi AMPEU tsunike ashopa ajo lakhikhilo mithemigheyi keu tsungquita hami qhilo.

⁸ Sabat pinye atsu-tsulo ighinikeu ghuloki kumtsulo AMPEU gizulo ashopa qhitsu masake. Hiye alhokupujulo Israilmino shiche masake.

⁹ Ashopaye Aron ngo papolo kughukomi salake eno panonguno akimthe-a lono tipau chulo kughengu achinemi ghenguno achuqupu pesu AMPEU lau mllakeulo hipauno saje akimtheu lakhike.

Achipiu lono Ghimekeu

^10-11 Timi lakhi acheke papuye Ijipmi eno pazaye Israilmi lakhi, lijeye Shelomit, Dan laghalo Dibri nonga lakhike. Timi tipauno Israilmi lakhi sasu mutolu. Muto akelo pano Alhou ghushoke ike panonguno pa sasu Muse lau wu,

¹² aghukhemi pa khe ake eno pa pesu kiu shive kepu kela panoqo vilo pitsupenike AMPEU kheju ae.

¹³ AMPEU no Muse vilo pi,

¹⁴ “Timi tipau ye ngochekeu-a lono saipevelo. Timi khijeno pano ghusho keu chilu keno tipaqono au pesu timi tipau kutsu shou bepuzu paye kuquve kepi ashepe shilo eno aqoaho kuchopu ghano atu pesu pa veqhi pithivelo.

¹⁵ Tishieno Israilmi vilo pilo ike timi khuuno Alhou ghushoni keno paye tishikeu makho imemasa

¹⁶ eno pa pithivelo. Israilmi momu inaghami Israil lo xuachekemi khuuno AMPEU ghushoni keno aqoaho kuchopu ghano atu pesu pa veqhi pithivelo.

¹⁷ “Timi khuuno kutami ghiqhi heqhiveni keno pa pithivelo,

¹⁸ eno timi khuuno kutami pichepighi heqhi veni keno paye tipau thelilo lochile masake. Akhuayeh ye hike, lhoxu lakhi thelilo lhoxu lakhi.

¹⁹ “Timi lakhino kutami ghuzave aye pano kiu shivetsu keno tipau pa lau shivelo.

²⁰ Pano asaghi lakhi kubovetsu aye pa saghi lakhi kubove tsulo; pano anhethi lakhi kighichevetsu aye pa nhethi lakhi kighicheve tsulo; pano ahu lakhi helavetsu aye pahu lakhi helavetsulo. Pano kutami shou kiu ghuza pukuni keno pa lau tipau shikide pukuvetsulo.

²¹ Khuuno lhoxu lakhi heqhive nikeno tipau theli tsulo, ikemu khuuno timi lakhi heqhiveni keno pa pithivelo.

²² Ayezah hipauye nongu kumtsu lau tsu anike, Israilmi lau eno inaghami nongu gholo xuakemi lau tsu anike, kughengu niye nongu Lhou AMPEU ke.”

²³ Muse no hipau pesu Israilmi vilo pikeulo panonguno timi sasu ngocheke-a nguno khalau saipeve eno atu pesu pa veqhi pithive. Hitoi shikeu lono AMPEU no Muse vilo ahza tsukeu kiqi lono Israilmino shiveke.