ACHINE 23 - BAIBEL (BSI)

Achineyeh lo Tiqhetini

¹ AMPEU no Muse lau

² achineyeh tiqhetini ghenguno pekithiyeh hipaqo tsuke, tiye Israilmino akumlla hoho shiniye kumqo kelo ghengunoke.

³ Nolikhi no kumla shikepushi nonguye atsala tsugho ani, ikemu atsala akutsuniu kumsululo, Sabat pine tiye akulho qhikeu tsalake. Tipau tsala loye mla kevilo ikemu akumlla hoho ghenguno kumqolo. Nonguno khile khile xu aghi namu Sabat pineye AMPEU wuke.

⁴ Kichetsu pua keu ghulokilo tiqhetini hipaqo pesu asheshulo.

Hechekulu Tiqhetini

⁵ AMPEU gihunike ikhilu chekeu, Hechekulu tiqhetiniye, aqhi atughiu atsala chighi abidiulo tsukinhe ilove kelono huthu cheni.

⁶ Atsala chighi apunguulo Kholaqhi sumokeu sho peithakeu Tiqhetini huthu cheni, eno atsala tsuni kutolo nonguye kholaqhi sukeu sho kiumu chukevilo.

⁷ Hipa tsala atughiulo nonguye akumlla hoho shinike kumqolo eno nonguno tsalakipe kumla shichekeu lakhimu shikevilo.

⁸ Nonguno achuqupu kumllagho atsala tsuni ghenguno AMPEU lau mllalo. Atsala akutsuniulo nonguno akumlla hoho shinike itaghi kuho kumqolo, ikemu nonguye tsalakipe kumla shichekeu lakhi mu shikevilo.

^9-10 Kughou AMPEU no nongu tsuakeu yeghilo iloghini eno nongu xa jeli ghile huni keno, aghipe piqhekeu atughiu pesu achineu lau pewulo.

¹¹ Pano tipau pesu AMPEU lau akimchi kumllagho lakhi shi tsulo, tishianguno AMPEU no nongu ikhilutsu penike. Achineuno Sabat pine shiwo thoghiu tsala lono tipau pesu tsulo.

¹² Tipa tsalalo nonguno athi kumllagho sughilo eno pitikeu kumllagho shikepu shi bheriti atsu ampe lakhi tukutiye kuhakeu ghi pesu aghashilo.

¹³ Tipau gholo nonguno asho mukhu oliv teli pesu kunuvekeu kilogram kini pesu mllakeugho shinike sughilo. Hipau kumlla xoye AMPEU lopuke. Nonguno tipau gholo atsayi-ji liter lakhi ghi akumllagho shi sughilo.

¹⁴ Nonguno hipau kumllagho Alhou lau sughi mphiloye athi kitheye akuxu pina, sakeu na momu asho shikeu pinamu chukevilo. Pekithiyeh hipauye nongu polo kughukomi kumtsu ighini keu ghuloki kumtsulo pepimhe ache masae.

Ghile Tiqhetini

¹⁵ Khipau Sabat pine tsalalo nonguno AMPEU lau nowu aghipe kipiqhe pesu sughikeno tipani lono apinyedo kupuju tsuni kihilo.

¹⁶ Atsala lhopungu shi akelo, tiye Sabat pine tsala akutsuniu shiwo thoghiu nonguye athi pesu akumllagho akithe lakhi AMPEU lau tsulo.

¹⁷ Akibo lakhikhino akughungu shopa kini sughi eno akimchi gho lakhi ghi AMPEU lau tsulo. Akughungu shopa lakhikhino asho mukhu kilogram kini pesu kholaqhi supuzu shilo eno tipau pesu athi atughiu ghile hukeu kumllagho lakhi shi AMPEU lau qhitsulo.

¹⁸ Asho gholo aqoahono bheriti ampe lakhi shivekeu tsuni tsulo, amshitsu lakhi, anetsu kini pesu tsulo, tipaqo gholo lakhimu tukutiye akeu shimoni. Tipaqoye AMPEU lau piti kumllagho lakhi shi mllalo tiye athi kumllagho ngo atsayi-ji kumllagho kumtsu kuqhano shilo. Hipau kumllagho xoye AMPEU lopu shichenike.

¹⁹ Anetsu lakhi ghi axine kumllagho ghenguno tsulo eno bheriti atsu kini ampe lakhikhi shivekeuno kuposhukulu kumllagho shi pesu mllalo.

²⁰ Achineuno asho gholo bheriti kuma suno AMPEU lau akimchi gho lakhi shi achinemi ghenguno tsulo. Akumllagho hipaqoye akimtheke.

²¹ Tipa tsalalo akumla shichekeu kiumu shikevilo ikemu mlla kepu shi kuhokumqolo. Nopolo kughukomiye ighinikeu ghuloki kumtsulo khile khile xuaghi namu pekithiyeh hipau ikhilu ache masae.

²² Nongu lulo ghile hukeulo aluqa phelo aghi akeqo gholu kevilo eno athi iche aghikeu qhivekeqo idechilewo tipaqo gholu kevilo; tipaqoye kumlhomi ngo inaghami ghenguno qhivetsulo. AMPEU ye nongu Lhou ke.

Ampe Kithe Tiqhetini

^23-24 Aqhi akutsuniu atsala atughiulo pakutakeu tsala lakhishi akulhoqhi keu pinyilo eno kughono afuko ighani keno mlla kepu shi kuhokumqo ighilo.

²⁵ AMPEU lau achuqupu kumllagho lakhi sughilo eno tsalakipe shichekeu kumla kiumu shikevilo.

Ikhivetsukeu Tsala

^26-27 Aqhi akutsuniulo atsala achighiuye timiqo xine ikhivetsu nike ampe ampelo achineyeh shi ikhiluche keu tsalake. Tipa tsalaniye kiumu chukepu kumoe; mlla nike ghenguno kumqo ighilo eno achuqupu kumllagho lakhi AMPEU lau tsulo.

²⁸ Tipaniye akumla shikevilo kughengu tipau tsalaniye axine ikhivetsu nike chininikeu tsalake.

²⁹ Timi khuuno tipa tsalani kiu kiumu chuni keno paye Alhou wu timiqo gholo kihisumove nani.

³⁰ Timi khuuno tipa tsalani akumla shini keno, AMPEU ampino pa pithive nani.

³¹ Pekithiyeh hipauye nongu polo kughukomi kumtsu ghengunoke, panonguno khile khile xu aghie pinamu.

³² Tipa qhilo atsala atokuu tsukinhe ilove kelono atsala achighiu tsukinhe iloke kutolo hipa tsalaye pakutakeu tsala akulhoqhikeu lakhi shi pinyilo, tipa ghulokilo kiumu chukevilo.

Apusho Tiqhetini

^33-34 Apusho Tiqhetiniye aqhi akutsuniu atsala chighi pungu lono huthu puzu atsala tsuni kutolo shi acheni.

³⁵ Tipa tsalaqo atughiulo akumlla ghenguno kuho kumqolo eno tsalakipetsulo shichekeu kumla lakhimu shikevilo.

³⁶ Tsalakipetsu atsala tsuni ghenguno nongu ye piti pesu tsukeu kumllagho lakhi shilo. Atsala akutacheulo mlla nike ghenguno itaghi kuho kumqolo eno piti pesu tsukeu kumllagho lakhi pesu tsulo. Tipa tsalaye mlla nike ghenguno akumla kutau kiumu shikevilo.

³⁷ (Achinelo tiqhetini hipaqo vechewono nonguno AMPEU gihu keu shi mlla nike kuho kumqo eno piti pesu tsukeu kumllagho ngo pitikeu kumllagho, athi kumllagho agha shikeu, atsayi-ji kumllagho tsalakipetsulo avehupushi akeu pesu tsulo.

³⁸ Tiqhetini hipaqoye Sabat pine ado atsutsulo shichekeqo nguno alauke eno akumllagho hipaqoye nonguno ado atsutsulo agho tsuche keu, ashoqhi shikupulu keulo akumllagho tsukeu eno puloniqhiyi keu kumllagho pesu AMPEU lau tsuchekeu nguno alauke.)

³⁹ Kughou nonguno alulo ghile huni keno tiqhetini hipau atsala tsuni pinyilo, tiye aqhi akutsuniu atsala chighi apunguu lono huthulo. Tipa tsala atughiuye akulho qhikeu tsala pakutakeu shilo.

⁴⁰ Tipa tsalani nongu xathibo lono axathi akiviu hami lulo, amsabo loka lulo eno asu minipho lono aloka lulo eno mulo subo loka lulo. AMPEU nongu Lhou gihukeu shinike achine tiqhetini lakhi hipau huthulo.

⁴¹ Atsala tsuni hipau pinyilo. Pekithiyeh hipauye ighinikeu ghulokilo ghi nongu polo kughukomiqoye peche masae.

⁴² Israilmi kumtsuno atsala tsuni apusholo ngolo,

⁴³ tishianguno nongu polo kughukomino AMPEU ye pano Ijip lono Israilmi saipeghi kelo panoqo pelo inapugha pusholo ngope kepi ithilu peniyeke.

⁴⁴ Ike hipa ghola lono Muse no pekithiyeh Israilmi tsuke tiye AMPEU gihu keushi achinelo tiqhetini pinyi che peniyeke.