ACHINE 22 - BAIBEL (BSI)

Akumllagho Kimthe

¹ AMPEU no Muse vilo ahza tsukeuno

² Aron ngo panuliqo vilo pilo pike, “Nonguye ikimthe je shiputhakeu sughi kepu kumoe, tighenguno Israilmino akimthe kumllagho ikhiphepe itsuvekeu agigihupu shi peithalo. Niye AMPEU ke.

³ Nolaghami khuuno chinikepulo mithemo pulaghi Israilmi no akimthe kumllagho ikhiphepe itsuvekeu kupunu ighi nikeno paye khilemu akiptialo iqekithelu monanike. Hiye ighinikeu ghulokilo ghi tishi nanike. Niye AMPEU ke.

⁴ “Aron polo kughukomi khuu khumu kumsapu yiko kusu momu aphi lono azu ipeghikeu ani keno paye chini kepulo mithemoke kutolo akimthe kumllagho chukepu kumoe. Achinemi lakhiye mithemo ake, pano mithemokeu jeli bulu aye tiye akithikumo dilu napiaye momu paye aphizu ipeghi aghi aye

⁵ momu pano mithemokeu lhoxu momu mithemokeu timi bulu napiaye.

⁶ Achinemi khuuno mithemove akeno paye kijiliu kutolo mithemono ani ake eno tishi anamu pano azu kuchumoke kutolo paye akimthe kumllagho lakhimu chulukepu shimo nani.

⁷ Tsukinhe ilove kethiu paye mitheluni ake eno tithiuno pano akimthe kumllaqho khipau pa chuqupu keno tipau chulu nani.

⁸ Paye lhoxu kiu kiu namu alikhi akutoshino thive keu shi momu tughashi kutauno tsuvekeu shi chukevilo; tipauno pa pelo mithemovepe nanike. Niye AMPEU ke.

⁹ “Achinemi kumtsuno ino pekithiyeh tsuvekeu peithalo, tikumoaye panonguye angsu shive eno thive nani, kughengu panonguno akimthe pekithiyeh hebideveke. Niye AMPEU ke eno ino panoqo pesu akimthe shicheni.

¹⁰ “Achinemi bolomiqo likhino akimthe kumllagho chulu nani kethono kutami khuumu tipau chumla, achineu sasu akemi pina momu pano aju piqesu akemi pinamu tipau chumlake.

¹¹ Ikemu achinemi lakhino pawu pisa pesu qhuluvekemi aqemi momu paki lono punu kemino achineuno sughikeu chuqupu chulu nani.

¹² Achinemi nga khuuno achine kumomi sasu kughunani keno liye akimthe kumllagho chumlake.

¹³ Ikemu chimemi shivekemi momu ixa vekeu totimi khuuno atianuli kuha eno khuuno papu pukhu ghi papuhno kilo acheuveni ke ide ighivekemiye apuno achinemi lakhi kehu achinemi saje ithulukeu chuqupu chulu nani. Achinemi bolomi likhino tipaulo kiukiumu chulu nani.

¹⁴ “Timi khuuno achinemi bolomi lakhi kumo kemu tipau kumsumlave puzu mthano akimthe kumllagho kiu kiumu chuve aye, paye tipau me akuchopu eno tinguno alau saje pungulo lakhi pesu vebeno achineu lochileve masa.

^15-16 Achinemiye agha tsupuamo kemiqo pelo akimthe kumllagho chuvepe no tipau shou angsu ngo aghimepu sughive nani. Niye AMPEU ke eno ino akumllagho akimthe shicheni.”

¹⁷ AMPEU no ahza Muse tsu puzu

¹⁸ Aron ngo pa nuliqo eno Israilmi kumtsu lau pekithiyeh hipaqo tsupeniyeke. Kughono Israilmi milakhino momu Israil lo akemi inaghami lakhino pitikeu kumllagho lakhi sughini keno, tiye ashoqhi shivekeu shikupunike momu puloniqhiyi keu kumllagho shi aghi namu, tukutiye kuhakeu lhoxu lakhi shiaghi masae.

¹⁹ Tipau ikhilutsu penike tiye tukutiye kuhakeu lhoxu atsu lakhi shimasa.

²⁰ Nonguno kiu kiumu tukutiye akeu lhoxu pesu mlla aye AMPEU ye tipau ikhilutsumo nani.

²¹ Kughono timi lakhino kuposhukulu kumllagho lakhi AMPEU lau tsuni keno, tiye ashoqhi shivekeu shikupunikeu momu puloniqhiyi keu kumllagho shi aghi pinamu tipau ikhilutsu peni aye tiye tukutiye kuhakeu lhoxu lakhi shi aghi masae.

²² Kiu kiu lhoxu pinamu anhethi ichevekeu momu aphi a-u ichhe tsuoive keu momu kinitavekeu momu apiyi iji akeu momu ayiko iphucho akeu momu ayiko ilhamuikeu pesu AMPEU lau mlla kevilo. Lhoxu tikithipu pesu akipti alo piti mllakeu shi kevilo.

²³ Puloniqhiyi keu kumllagho shinikeulo nonguno lhoxu thuwumokeu momu kupukulaimo keu lhoxu pesu mllaluvike ikemu ashoqhi shikupu kutsu kumllagho loye tipau ikhilutsumlake.

²⁴ Kiukiu lhoxu pinamu aphighuthi chishephovekeu, ghathavekeu, hephovekeu momu futhavekeu pesu AMPEU mlla kevilo. Noghakhulo tishi pemlake.

²⁵ Inaghami launo kuqhukili shi saghikeu lhoxu pesu piti pesu mlla keugho lakhi shi mllakevilo. Lhoxu tikithipuye tukutiye akeu shi kihi acheni eno ikhilutsumo nanike.

^26-27 Kughou amshiti momu bheriti momu aneti lakhi pitini keno, atsala tsuni doloye tipau aza launo suwuvetsu kevilo, ikemu tipathiuye piti pesu mllakeugho shinikeulo ikhilutsu kepu shinani.

²⁸ Amshiqu ngo tipau ti pesu atsala lakhi lono heqhi mlla kevilo.

²⁹ Kughou nono AMPEU lau shikimthikeu aghashi mllani keno ayeh kiqi lono shilo tishianguno noikhilutsu penike;

³⁰ tipa tsalanino tipau chulo eno tipau kitilamu thanau kutolo qhikevilo.

³¹ AMPEU no pike, “Ino ahza tsukeu gholulo; niye AMPEU ke.

³² Ije kimthe shou shiputhakeu sughikevilo; Israilmi kumtsuno niye akimthe kepi ithiluve masae. Niye AMPEU ke eno ino nongu akimthe shitsu cheni;

³³ eno nongu Lhou shinike ino Ijip lono nongu saipeghike. Niye AMPEU ke.”