ACHINE 21 - BAIBEL (BSI)

Achinemi Kimthe

¹ Muse pelo Aron laghami achinemi vilo pipe nike AMPEU no ishi ahza tsue, “Achinemi khuumu asholokumi thivekelo akumo shiqhokeu vechewo achinepulo pa shipixilu kepu kumoe;

² akithiu tipauno paza, papu, panu, panga, pa thikuzuu

³ momu pa chepu kulaumono pa gholo achekeu shi aghimo napiaye.

⁴ Kulakupu vechewo khunoqomi pa sasu kutshukime ani keno tipaqo kithi lono pa likhi pa pesu mithemokeu shikepu kumoe.

⁵ “Achinemi khuumu pa kutsusa miyevemoni momu pa kichimhi tsave momu pa philo ashi ghale puzu mloqakeu piyekeu shimoni.

⁶ Paye akimthe shimasa eno ije shiputha kevilo. Pano achuqupu kumllagho pesu imlla chenike eno paye akimthe shimasake.

⁷ Achinemi lakhiye salhashupu totimi ilitathe kumove kemi momu jumuvekemi sasu kulakupu shikevilo; paye akimtheke.

⁸ Timiqono achinemiye akimthe kepi kumsuluvelo, kughengu pano achuqupu kumllagho ilau sughi chenike, Niye AMPEU ke; niye akimtheke eno ino iwu timiqo akimthe shitsu chenike.

⁹ Achineu ngano kusalhalimi shive aye lino papu shiputha anike; liye pitiqhi pithivelo.

¹⁰ “Achinetouye pa kutsu shou nukishe teli lepukuve tsuake eno achinemi phimini pepu penike pakuta keu shi akimthepu shiveake, tighenguno paye pasa xemono qhikevilo momu paye amloksa shiani kepi piye niye pa phimini suxu kevilo.

^11-12 Paye ilau ikhiphepe tsuvae ike paye chini kepulo mithemokeu shikepu kumoe momu ikimthe Phiki lono ipepuzu kithimi akeu kilo ilo veno Aphiki shipixi kepu kumoe, kithimi tipauye papu aza shi aghi pinamu.

¹³ Paye ilitathe sasu kulakupu shini thono,

¹⁴ jumu-kilevekemi totimi momu chimemi momu puzuuye salha-shupu chekemi sasu kulau kevilo. Paye pano laghalomi ilitathe likhi sasu kulaulo.

¹⁵ Tikumoaye patinuli akimthemi shikepuqo huye chini kepulo mithemoni ake. Niye AMPEU ke eno papelo Achinetou shipenike pakutashi qhipuanike.”

¹⁶ AMPEU no ahza Muse tsuno

¹⁷ Aron vilo pike, “Nongu polo kughukomi milakhimu aphi ampilo tukutiye akemiye achuqupu kumllagho ilau sughi kevilo. Hiye ighinikeu ghulokilo ghi shichemasake.

¹⁸ Aphi ampilo tukutiye akemi hipaqoye khuunomu akumllagho mllakevilo: anhethi kighichemi, ayiku kughupami, aju shipsave kemi, momu alho vimovekemi,

¹⁹ apukhu au kinitavekemi;

²⁰ aghutsu kughukomi momu alu kughukhomi; anhethi lakhi likhikemi momu ayiko kusu akemi eno shoko shivekemi.

²¹ Aron achineu polo kughukomi aphi mpilo tukutiye akemi khuu pelomu achuqupu kumllagho ilau sughi pekevilo.

²² Tikithipu timiye achuqupu imllakeu chulu nani, achuqupu akimthe kumllagho shikeu ngo ighono akimthe chuqupu kumllagho kinikujo chulu nani,

²³ ikemu paye aphimpilo tukutiye anike ghenguno paye akimthe nhaqhiphi phivilo ighikevilo momu akiptia kupunu wukevilo. Paye akimthe nhemgha hipaqo shipixi kepu kumoke kughengu niye AMPEU ke eno ino tipaqo akimthe shitsu chenike.”

²⁴ Hipauye Muse no Aron ngo Aron nuli eno Israilmi kumtsu vilo pikeqoke.