ACHINE 20 - BAIBEL (BSI)

Aghokulukumo Ghimepu

¹ AMPEU no Muse vilo

² Israilmi vilo pipenike pi, “Nongu gholo momu inaghami nongu gholo xu akemi khuuno pa tianuli pesu Molek julho mllakeulo peitha peniye tsuni keno aqoaho kumtsu ghano atu pesu pa veqhivelo.

³ Timi khuuno pa tianuli pesu Molek tsupuzu ikimthe Phiki shipixi eno ije kimthe shiputhani keno, ino pa kutotsu nani eno iwu timiqo gholo pa kihisu move nanike.

⁴ Ikemu aqoahono pano mlakeulo kughuchove no pa pithimo aye,

⁵ pa shou ngo pa kibo kuchopu shou eno pa gholo sukuqhano ilau amikucho shimove puzu Molek mllauve kemiqo shou ni ampino kutotsu nani. Tipanoqoye iwu timi kepi niye kihisumove nanike.

⁶ “Timi khunono kithimi ghungu sasu kusutsa cheni keno tipano launo akukumsu luniye wu aye, ino pa kutotsu nani eno paye iwu timiqo gholo kihisumove nani.

⁷ Nonguye akimthe shi achelo kughengu niye nongu Lhou AMPEU ke.

⁸ Iyezahqo gholulo, kughengu niye AMPEU ke eno ino nongu akimthe shitsuke.”

⁹ AMPEU no ayezah hipaqo tsuke. Timi khuuno apu momu aza ghushoni keno pa heqhi pithivelo; pa kithiye pa makhoke.

¹⁰ Timi lakhino akusami Israilmi lakhi nipu sazuvetsu aye, pa ghi eno atotiu ghi kinikujo pithivelo.

¹¹ Timi lakhino papu nipu gholo milakhi sazuvetsu aye papu shiputha anike pama kinikujo heqhi pithivelo. Pama kithiye pama makhoke.

¹² Timi lakhino pa mukishiu sazuve aye pama kinikujo heqhi pithivelo. Pamaye kixikula kumla shive ake eno pama kithiye pama makhoke.

¹³ Timi lakhino kutami lakhi sasu sazu aye pamaye aphikumqhupu shive ake, eno pama kinikujo heqhi pithivelo. Pama kithiye pama makhoke.

¹⁴ Timi lakhino totimi lakhi sasu kulau eno liza sasu kulau ishi aye pano kuthu kujo pitiqhi pithivelo kughengu panonguno kuthakughapu shikeu ghenguno; nongu gholo tikikhipu shipe kepu kumoke.

¹⁵ Timi lakhino atsawo lhoxu sasu kughupa aye pamaye heqhi pithivelo.

¹⁶ Totimi lakhino atsawo lhoxu sasu kughupa nike pukaputsa aye li eno lhoxu pamaye heqhi pithivelo. Panongu kithiye pano makhoke.

¹⁷ Timi lakhino pa chepu momu pa chepu kishe sasu kulakupu shi aye pamaye aqha gizulono shikukujolo eno aqoaho gholono hapupovelo. Paye pa chepu sazuve ake eno tipau ghime sholu masake.

¹⁸ Timi lakhino totimi no aqhilo ahji pochekeu shi ake lono ashi-aji kuqha aye pama kinikujo aqoaho lono hapupovelo, kughengu pamaye chini kepulo mithemove chekeu yezah hexave ake.

¹⁹ Timi lakhino pani sazu aye, kixikula tipau ghenguno aghime ime masake.

²⁰ Timi lakhino papu thikuzuu nipu sazuve aye papuh thikuzuu shiputha anike, pamaye tipau ghengu lomoaye sake; pama khuunomu atinuli shimo nanike.

²¹ Timi lakhino pa thikuzumi nipu sasu kulau aye chini keulo mithemokeu shivae eno pa thikuzuu shiputhave ake.

²² AMPEU no pi, “Iyezah eno ahza tsukeu kumtsu gholulo tishianguno ino nongu sasu iloniye che keu yeghi Kanan no nongu kolephevemo nani.

²³ Timi khunoqono tilau xuacheni keno tipano khuayeh pepimhe kevilo; ino Alhou mthakemi hupaqo hapheve anike tishi anguno nongu pelo aghakhulo ilolu peniyeke. Panonguno ghushoghili lhoksa shikeu ino kuchhubeke.

²⁴ Ikemu ino nongu mheghi shipenike kinikulu eno aghuma yeghi hipau nongu lau tushoqhivae eno ino tipau nongu tsuni cheni. Niye nongu Lhou AMPEU ke, eno ino ashiayeh kutami launo nongu kutashi qhipuani ke.

²⁵ Tighenguno, nonguye ashi aghau khipaqono chinikepulo mithe eno khipaqono mithemo keno mutsumishei kututa shithi masae. Ashi aghau mithemo keuye chukevilo. Ino tipaqoye mithemo kepi pive tsuae eno tipaqo chukeu lono nonguye mithemoni ake.

²⁶ Nonguye akimthe shilo eno iwu likhi shilo kughengu niye AMPEU ke eno niye akimtheke. Ino ashiayeh kutamiqo launo nongu kutashi qhi puanike tishianguno nonguye iwu likhi shiche peniyeke.

²⁷ “Kiptimi na totimi namu kithimi ghungu sasu kusutsa kemiye atuno veqhi pithivelo; timi khuuno hipau shini keno pa kithiye pa makhoke.”