ACHINE 19 - BAIBEL (BSI)

Akimthe eno Amikucho Yezah

¹ AMPEU no Muse vilo

² Israilmi aqo aho vilo pipenike pi, “Akimthe shilo kughengu ni, nongu Lhou AMPEU ye akimthe.

³ Nonguye ino ahza tsuvekeu toi pututa puaza sumsa masake eno Sabat pine pelumasake. Niye nongu Lhou AMPEU ke.

⁴ “Iqhive puzu ajulho mlla kevilo; ayi pesu alhou julho shipuzu tipaqo mllakevilo. Niye nongu Lhou AMPEU ke.

⁵ “Kughou nonguno kuposhukulu kumllagho lhoxu heqhini keno, ino ayezah nongu tsupuakeu pelulo eno ino akumllagho tipau ikhilutsu nanike.

⁶ Lhoxu heqhi kelo tipau shiye heqhike tsala momu thoghiu tsala lono chuve masake. Akuthuni kutolo aghikeu shiye pitive masake,

⁷ kughengu tiye achinepulo mithemoke eno timi khuuno tipau chuni keno niye akumllagho ikhilutsu mo nanike.

⁸ Timi khuuno tipau chunikeno kiu ikhiphe pe itsuve akeno tipau pesu inapugha kumlho shivetsukeu kipimi shiveni ake eno paye tinguno tilauye iwu timi gholo kihisumove nanike.

⁹ “Kughou nonguno alulo ghile huni keno, alu phelo aghibo akeu gholu kevilo eno aghipe qhivekeu idewo gholu kevilo.

¹⁰ Nongu tsayilulo atsayithi kachesu wuvekeu xolunike momu atsayithi ikiqivekeu kichelunike athiu idewo kevilo; tipaqoye kumlhomi ngo inaghami ghenguno qhitsulo. Niye nongu Lhou AMPEU ke.

¹¹ “Pukaqhi, pishiqhi momu miki kevilo.

¹² Ije lono ashoqhi shikevilo nono tipau pemla kepushi kumsu aghi aye; tipauye shiputhakeu ishou sughi anike. Niye nongu Lhou AMPEU ke.

¹³ “Noye khiumu nedaqoda momu suxaluvekeu shi kevilo. Nono piqesu akemi jume kijili lakhi ghenguno pinamu suchilelu kevilo.

¹⁴ Akini kughupomi ghusho kevilo momu anhethi kighichemi lakhi pelo kupuxa lupenike pa gizulo kiumu qhitsu kevilo. Isumsalo; niye nongu Lhou AMPEU ke.

¹⁵ “Atsakugha kepulo kughono xakutha tsunikeno amikucho eno achipiu shilo; kumlhomi lau xadakevilo momu kinimi musave kevilo.

¹⁶ Kutami ghili akimki tsa vekupha kevilo timi lakhino pa kuxu ghenguno atsa kugha aghiaye eno oshepeno pa kuphulu kepushi aghiaye pitsulo. Niye AMPEU ke.

¹⁷ “Kutami shou axesu pukukevilo ikemu kidi mlano akeu pa sasu kuptsathalulo, tishianguno pa ghenguno noye axine shimo kepushilo.

¹⁸ Khuu shoumu amkhu lukevilo momu pa mithi acheuve kevilo, ikemu olikhi okimiyeke toi okisughumi kimiyelo. Niye AMPEU ke.

¹⁹ “Ino ahza tsukeu gholulo. Atsuaqu qo alho kututakeu sawo kughupakile pekevilo. Alu lakhilo axa jeli kini yisu kevilo. Aye jeli kinino ghokeu phimini ukevilo.

²⁰ “Timi lakhino pa qeliu pesu kutami lakhi nipu amishiu shipenike jesu tsunikeu tushoqhiveni ikemu timi tipauno li ghenguno ame tsumono aghiaye, kutami no ayiliu sasu ashi-aji kuqhave pinamu pama heqhi pithi kevilo; pamaye ghimeqhilo.

²¹ Timi tipauye bheri tsu lakhi ino ngochekeu Phiki hukikhalo saghilo tiye pawu lochilekeu kumllagho shikepushi,

²² eno tipau pesu achineuno shikimtheve keu chine chinilo timi tipau xine ikhivetsu nike eno ni Alhou no pa xine peivetsu nanike.

²³ “Kughou nonguno Kanan yeghilo iloghiveni eno axathi subo ajeli shosuni keno ampe kuthu dolo axathiye chinikeu lo mithemo kepi ithivelo. Tipa ghulokilo nonguye tipau chukevilo.

²⁴ Ampe abidiulo nongu xathi kumtsu ni AMPEU shikimthikeu shi tipau ikhiphepe akumllagho lakhi shi tsuvelo.

²⁵ Ampe apunguu loye nonguno axathi chulu nani. Nonguno hipau kumtsu shilu aye noxathibono axathi alau pithi nani. Niye nongu Lhou AMPEU ke.

²⁶ “Ashilo ahji apulaghi tipau chukevilo. Kuduu jeli lakhimu shikevilo.

²⁷ Nongu kutsusa hothapu kevi momu nongu kichimhi tsave kevilo,

²⁸ Momu kithimi ghengu amloksa shinike nongu philo tsubui ghipu kevi momu aphimpi kiheletha kevilo. Niye AMPEU ke.

²⁹ “Nongu ngaqo pesu achinekilo kusalhami shipe puzu linoqo shiputha kevilo; nonguno tishiaye nonguye kutau lhouqo lau wuve nanike eno aghakhuye salhashupuno chhitoive nani.

³⁰ Sabat pine pechelo eno imlla chekeu-a gihulo. Niye AMPEU ke.

³¹ “Kithimi ghungu sasu kusutsa chekemi launo akukumsu lunike wukevilo. Nonguno tishi aye chinike pulo mithemovae. Niye nongu Lhou AMPEU ke.

³² “Kitemi lau qhoqhu sumsakeu piyelo eno panoqo gihulo. Isumsalo; niye AMPEU ke.

³³ “Noghakhulo inaghami xuakeqo peithapusa kevilo.

³⁴ Nongu kusami Israilmi toi panoqo peithalo eno nolikhi nokimiye ketoi panoqo kimiyelo. Nongu ghi ghuthu lakhiye Ijip yeghilo inaghami shi achekepi kumsululo. Niye nongu Lhou AMPEU ke.

³⁵ “Kichileu kimighi kighi, abohu momu mishi sheikeu peitha puzu kutami pishiqhi kevilo.

³⁶ Amikucho kimighi-su, amikucho kimshi eno amikucho kimghi kighi peithalo. Niye nongu Lhou AMPEU ke eno ino Ijip lono nongu saipeghike.

³⁷ Iyezah eno ahza tsupuakeu kumtsu gholulo. Niye AMPEU ke.”