ACHINE 18 - BAIBEL (BSI)

Ashi-aji Kuqhakeu Lakha

¹ AMPEU no Muse vilo

² Israilmi vilo pipenike ishi pi, “Niye nongu MPEU Alhou ke.

³ Ijipmi wu ghushoghili pape kevilo, puzuu nonguno tilau acheke, momu Kananmi yeghi khilehi ino nongu sasu wucheni keno timi tipaqo pape kevilo.

⁴ Iyezahqo gholulo eno ino kiu ahza tsukeno tipau shilo. Niye nongu Lhou AMPEU ke.

⁵ Ino nongu tsukeu ghushoghili eno ayezah qo papelo; nonguno tishilu aye nolikhi nokuxu xalu nani. Niye AMPEU ke.”

⁶ AMPEU no ayezah hipaqo tsuke. Khilemu nosholokumi sazu kevilo.

⁷ Oza sazu keu lono opu shiputha kevilo Noye oza shiputha kepu kumoe.

⁸ Noye apu nipu kutami sazu keu lono opu shiputha kevilo.

⁹ Noye ochepu momu ochepu kishe sazu kevilo, liye osasu kumtsa aki lakhi lono saputhu puaghi na monamu.

¹⁰ Onulimi nga sazu kevilo kughengu tiye oshiputha anike.

¹¹ Ochepukishe sazu kevilo, li ghi ochepuke.

^12-13 Opu chepu shi aghina oza tsunipu shi aghi namu noye anilimi sazu kevilo.

¹⁴ Opu thikuzuu nipu sazu kevilo; lighi ochike.

¹⁵ Omukishiu sazu kevilo

¹⁶ momu othikuzumi nipu sazu kevilo.

¹⁷ Nono totimi khuu sasu ashi-aji kuqha chenikeno tipau nga momu li nga nonga sazu kevilo; panonguye nosholukumike eno tishikeuye achinelo kixikilake.

¹⁸ Onipu no xuaphi thaqhuloye onipu tsunipu pesu onipu shinike lukevilo.

¹⁹ Totimino aqhilo ahji pokeu ghime shiakeloye ashi-aji kuqha kevilo, kughengu liye achinepulo mithemoke.

²⁰ Kutami nipu sazu kevilo; tiye opelo achinepulo mithemove peniake.

²¹ Molek lhou mllakeulo peitha peniye nongu tianuli khilemu tsupuwu kevilo, kughengu tiye shiputhakeu AMPEU Alhou je shou sughive nanike.

²² Kiptimi khuumu kiptimi kutami sasu kipto kuqhakepu kumoe; Alhou no tipau jumithi ke.

²³ Kiptimi totimi khuumu lhoxu kutau sasu kughupa kevilo; tiye kusakughapu eno tipauno opelo achinepulo mithemove chenipeke.

²⁴ Hipaqo kumla kughutha lono nolikhi nongu pesu mithemokeu shikevilo, kughengu Alhou kumthamiye hipaqo lono panoqo pesu mithemove achenike, Alhou kumthami nongu zuuno aghakhulo achekeqo eno AMPEU no hapheve akeqo tishianguno nongu pelo ilolu peniyeke.

²⁵ Panoqo kumla kughuthano aghakhu mithemoveke ikehu AMPEU ye aghakhu ghimeqhi ani eno tipau pelo tile kughuna chekeqo tuhapheve anike.

^26-27 Panonguno aphikumqhupu hipaqo kumtsu shike eno aghakhu mithemove peke ikemu nonguye tipaqo shikevilo. Nongu Israilmi na inaghami nongu gholo xu achekemi qo pinamu kumtsu AMPEU yezahqo ngo ahza tsupuakeu pelu masake,

²⁸ tishiaye aghakhuqhaye nongu zuu Alhou mtha kemiqo tuhaphekeu toi nongu tuha phevemo nanike.

²⁹ Nonguno ithi anike khunono aphikumqhupu hikithipu shi cheni keno tipaqoye Alhou wu timi gholo kihisumove chenike.

³⁰ AMPEU no pi, “Ino ahza tsukeu gholulo eno nongu zuu timi khunoqono aghakhulo achekeno tipaqo ghushoghili pape kevilo eno ghushoghili tikithipu shikeu lono nolikhi nongu pelo mithemovekeu shikevilo. Niye nongu Lhou AMPEU ke.”