ACHINE 17 - BAIBEL (BSI)

Ahjiye Akimthe

¹ AMPEU no ahza Muse tsu puzu

² Aron ngo pa nuliqo eno Israilmi kumtsu lau ayezah hipaqo tsupeniyeke.

^3-4 Israilmi khuuno AMPEU lau akumllagho mishi, bheri momu ane pesu AMPEU no achekeu Phiki hukikha nguno a-a kutauno ghiqhini keno paye Ayezah hexavae. Paye ahji peleve kemi shivae eno paye Alhou wu timiqo gholo lakhi kepi kihisu kepu kumovae.

⁵ Ahza kutsu hipau kiqiye Israilmi pelo panonguno aluza lono lhoxu heqhikeu pesu AMPEU lau sughi pemoniyeke. Panonguno itehiye Aphiki hukikhalo achineu lau lhoxu tipaqo saghilo eno kuposhukulu kumllagho lakhi shi ghiqhilo.

⁶ Achineuno Aphiki hukikhalo akiptia akeu jiboqo shou ahji vepuku lo eno AMPEU lopu shipenike axo kumna kepushi atha pitilo.

⁷ Hinguno hilau Israilmiye ane ghahwu lau aghashi akeshi aluza lono lhoxu heqhi puzu AMPEU lau amikuchokumo shikevilo. Israilmiye ighinikeu tiqheli kumtsulo ayezah hipau peche masae.

⁸ Israilmi na inaghami aqoaho gholo xuachekemi pinamu timi khuuno pitikeu kumllagho momu agha shikeu kumllagho

⁹ kiukiu mu pesu AMPEU mllakeulo Aphiki hukikha nguno kutau lono mlla aye tinguno tilau paye Alhou wu timiqo gholo kihisumovelo.

¹⁰ Israilmi na aqoaholo inaghami xu achekemi namu timi khuuno ashilo ahji a-ghi chuni keno AMPEU no pa junishimove nani eno paye pawu timi kepi kihisumove nani.

¹¹ Xuakeu jeli kumtsu akuxuye ahjilo ani kehu timiqo xine ikhi suwuvetsu nike ghenguno ahjiye kumtsu akiptia shou lepukuvelo pi AMPEU no ahza tsuke.

¹² Tighenguno AMPEU no Israilmi vilo panongu na inaghami panoqo gholo xu achekemi pinamu ashilo ahji a-ghi chukevilo pi pivae.

¹³ Israilmi na aqoaholo inaghami xu achekemi lakhino achinepulo mithe akeu ashi aghau hau kelo paye ayeghi shou ahji kighiji qhiveno ayeghi pesu tipau jonhave masake.

¹⁴ Xu akeu jeli kumtsu akuxuye ahjilo ani tighenguno AMPEU no Israilmi vilo pikeuno panonguye ashilo ahji apulaghi chukevilo pike eno khunono tishini keno tinguno tilauye pawu timi shipemove nanike.

¹⁵ Israilmi momu inaghami shi aghi namu timi khuuno lhoxu lakhi pa likhi pa kutoshi thivekeu momu tughashi kutauno tsu puaghikeu shi chuni keno paye aphimini ishive eno azu kuchhuve masa eno avela chini kimthemoke kutolo khe aghi masae.

¹⁶ Pano tipau shimo aye paye kuquvekeu ghime punanike.