ACHINE 16 - BAIBEL (BSI)

Axine Peivetsuke Tsala

¹ Aron nu pamano AMPEU lau mithemokeu mi pesu mllake lono pithive kethiu AMPEU no Muse putsa.

² AMPEU no pie, “Omu Aron vilo paye ado achipiulo likhino nhaqhiphi thiu Shishe Akimthe-a lo wulo pilo kughengu tilauno Puloshoqhi Bohu kunha shou khungkusulo ino ipeghi chenike. Pano hebideve aye pa pithive nanike.

³ Pano axine kumllagho ghenguno amshitsu alhothe lakhi eno piti kumllagho ghenguno bheritsu lakhi sughi anguno paye Shishe Akimthea lo ilolu nanike.”

⁴ Tileno shikepu shiakeu hipaqo AMPEU no pesu tsuke. Aron no Shishe Akimthe-a lo ilo mphi lono paye azu kuchhuve no achinemi phiminiqo pepu masa: phephei phikuzu ngo ikhonheikeu mini, apokha eno akutsu kunha phi.

⁵ Israilmi aqoahono axine kumllagho ghenguno anetsu kini eno pitikeu kumllagho ghenguno bheritsu lakhi Aron tsulo.

⁶ Pa likhi pa xine eno pa kibolomi xine ikhipeve tsunike pano amshitsu lakhi pesu agha shikeushi mllalo.

⁷ Tithiu pano anetsu kuma sasu AMPEU no achekeu Phiki hukikhalo sawulo.

⁸ Tilau pano atu kini, lakhino “AMPEU sala” eno lakhiuno “Azazel sala” ipi amchi shipuakeu peitha puzu asa qhijulo.

⁹ Aron no AMPEU sala asa qhipukulu keu anetsu pesu aghashilo eno axine kumllagho lakhi shi tipau mllalo.

¹⁰ Azazel sala kishephelu keu anetsu huye AMPEU lau akuxuno qhilo eno asayeqhalo Azazel lau puwuvelo, tishi keuno timiqo xine xapuwuve penike.

¹¹ Kughou Aron no pa kibolomi ngo pa likhi pa xine ghenguno axine kumllagho amshitsu pesu agha shini keno,

¹² pano amikihipu lakhilo amiyi iqu akeu chhitoi eno tsungqui-ta au kie kini chhitoi lulo eno Shishe Akimthe-a lo tipaqo sughilo.

¹³ Tilau AMPEU no achekeulo pano tsungquita pesu amilo sulo eno tsungquikeu michhino Puloshoqhi Bohu kunha kuzuluve nani tishianguno paye tipau ithulumo keu lono thimo nani.

¹⁴ Pano amshitsu jih hami lulo eno pauloti pesu akunha gizuu kuzutelo eno tipau hami pesu Puloshoqhi Bohu agizuu ghuthu tsuni kuzutelo.

¹⁵ Tipathiuno pano timiqo ghenguno axine kumllagho shikepu shi anetsu hu heqhilo eno tipau jih pesu Shishe Akimthe-a lo iloghilo eno pano amshitsu jih pesu shike tho lono Puloshoqhi Bohu kunha shou eno tipau gizuu kuzutelo.

¹⁶ Hitoi shipuzu pano Israilmi kimthekumo launo panoqo xine kumtsu launo Shishe Akimthe-a shikimtheni keu chine chinilo. Paye Aphiki lo hipau chine chini masake kughengu tiye ngochekeu ghazu mtalo anike eno tipaqoye achinepulo mithemoke.

¹⁷ Aron no Shishe Akimthe-a lo shikimthekeu chine chininike ilo puzu ipeghimoke kutolo timi lakhimu Aphiki alou ngokepu kumoe. Kughou pano pa likhi pa ghenguno, pa kibo eno aqoaho kuchopu ghenguno achine chinini keno,

¹⁸ paye pitikeu kumllagho shinike eno akiptia shikimthe nike tilau no amshitsu jih hami eno anetsu jih hami lumasa eno akiptia chekulo ichushei ikughi akeu kumtsu shou qhimasa.

¹⁹ Pa ulotino ahji pesu akiptia shou ghuthu tsuni kuzute puku masa. Hitoi shipuzu pano Israilmi xine launo tipau shikimthe pesu akimthe shivetsu masake.

Ane Ghapheu

²⁰ Kughou Aron no Shishe Akimthe-a ngo AMPEU no achekeu Phiki aqha kutau eno akiptia shikimthekeu chine taveni keno Azazel sala kisheluvekeu ane xuakeu hu pano AMPEU lau qhitsulo.

²¹ Pano pau kinikujo pesu ane kutsulo inape puzu Israilmi lhoksa, axineqo eno hekibide kumtsu tipau shou piphepukulo eno tipaqoye ane kutsu shou pimi pukuvetsu anike. Tishieno timi lakhi kutope puakeu pelo ane hasasu asayeqhalo hapupove pelo.

²² Ane no panoqo xine kumtsu xapususu timi kughunamo keu qhalo wuve nanike.

²³ Tithiu Aron ye Aphiki alou ilo puzu pano Shishe Akimthe-a lo ilonike zulono achinemi phimini pepu keu hu xaqhivelo eno tilau qhivelo.

²⁴ Paye akimthe-a lakhi lono azu kuchhuve masa eno pa phimini pepulo. Tipathiuno, paye khalau ipelo eno pa likhi pa xine eno timiqo xine ikhivenike pitikeu kumllagho pesu mllalo.

²⁵ Axine kumllagho lhoxu heqhikeu atha pesu pano akiptia lono pitilo.

²⁶ Timi khuuno asayeqhalo Azazel lau tsukeu ne hasasu wukeno paye ngochekeu qhalo ideighinike zuuno pa phimini ishive eno azu kuchhuve masa.

²⁷ Axine kumllagholo peithakeu amshitsu ngo anetsu, khipaqo jihno axine ikhisuwuvenike Shishe Akimthe-a lo suloghikeno, tipaqo kumoye ngocheke qha khalau xapu ipelo eno pitivelo. Ayiko, ashicho eno kighinoli kumtsu pitivelo.

²⁸ Timi khuuno tipaqo pitini keno ngocheke qhalo ideighimoke zuuno paye pa phimini ishive eno azu kuchhuve masae.

Peivetsukeu Tsala Pinyikeu

²⁹ Ayezah hipaqoye ighinikeu ghuloki kumtsulo ikhiluche masake. Aqhi akutsuniulo atsala achighiu lo Israilmi ngo panoqo gholo inaghami xua chekeqoye kumvu masake eno akumla kiumu shikepu kumoke.

³⁰ Tipa tsalanino panoqo xine kumtsu launo pano shikimthe nikeu chine chinilo tishianguno panonguye chini kepulo mitheluve nanike.

³¹ Tipa tsalaye ighono akimthe tsala lakhi shimasa, tipaulo panonguno kumvu eno akumla kiumu shikepu kumoke. Ayezah hipaqoye ighinikeu ghuloki kumtsulo ikhiluche masae.

³² Achinetou khuuno papu qhusunike kithipe akimthepu shipuani eno pakutashi akimthepulo qhivetsu akeno pano shikimthekeu chine chinilo. Paye achinemi phimini pepu

³³ puzu Shishe Akimthe-a, AMPEU no achekeu Phiki aqha kutauqo, akiptia, achinemi eno aqoaho lo akemi kumtsu shikimthe nikeu chine chinilo.

³⁴ Ayezah hipaqoye ighinikeu ghuloki kumtsulo ikhi luche masake. Achine hipauye Israilmiye panoqo xine kumtsu launo shikimthe nike ampe lakhilo ghuthu lakhi pinyi masa. Ike AMPEU no ahza tsukeu toi Muse no shike.