ACHINE 15 - BAIBEL (BSI)

Aphi lo Mithekumo Ipeghi

¹ AMPEU no ayezah hipaqo pesu Muse ngo Aron tsuke,

² tiye Israilmi ghengunoke. Timi lakhi phighu lono azu ipeghikeu,

³ aphighu lono tipau qoipeghi auvena momu tipau tave pe namu tiye mithemoe.

⁴ Azua khipau shou pano iqani momu zuni keno tiye mithemovae.

⁵ Timi khuuno pa zua buni keno

⁶ momu timi tipau no iqavekeu shou iqani keno paye azu kuchhuve eno pa phimini ishive masa eno paye avelau kutolo mithemono auve nanike.

⁷ Timi khuuno aphighu zu ipeghiakeu diluni keno paye pa phimini ishive eno azu kuchhuve masa eno paye avela kutolo mithemono auveni ake.

⁸ Azu ipeghiakeu timi huno kutami achinepulo mithe akeu shou musute pukulu aye timi tipau ghi pa phimini ishive eno azu kuchhuve masa eno paye avela kutolo mithemono ani ake.

⁹ Alakhu momu akughuqa-a khipaqo shou azu ipeghi akeu timi huno iqani keno tiye mithemoni ake.

¹⁰ Timi khuuno timi tipauno iqakeu mu diluni keno paye avela kutolo mithemoni ake. Timi khuuno timi tipauno iqavekeu shouno kiu kiumu xapuwuni keno paye pa phimini ishive eno azu kuchhuve masake eno paye avelau kutolo mithemono ani ake,

¹¹ Timi lakhino azu ipeghi ani puzu pau mutsuve paghimo puzu kutami diluaye timi tipauye pa phimini ishive eno azu kuchhuve masa eno paye avela kutolo mithemono ani ake.

¹² Timi tipauno ayeghili dilukeu kumtsu kuboleve masa eno asukhu kiu kiu shiaghi namu pano dilukeuye kusuve masa.

¹³ Timi tipauno qoipeghi auvekeu vive kethiu paye atsala tsuni khe aghi masa eno azupukilo azu kuxu lono pa phimini ishive eno azukuchhuve masa eno paye achine pulo mitheni ake.

¹⁴ Atsala akutachenino paye amiqhi momu kobutur kini pesu AMPEU no ngochekeu Phiki hukikhalo wulo eno tipaqo achineu tsulo.

¹⁵ Achineuno tikuma gholo lakhi pesu axine kumllagho shi eno lakhiu pesu pitikeu kumllagho shi mllalo. Hitoi shipuzu pano timi tipau ghenguno shikimthekeu chine chinilo.

¹⁶ Kughou timi lakhino aphizu ile ipeghini keno paye paphi kumtsu azu kuchhuve masa, paye avela kutolo mithemoni ake.

¹⁷ Aphi momu ashiyiko pesu shikeu nhemgha kiu kiu shou pinamu aphizu ikuvekeuye ishive masa eno tiye avelau kutolo mithemoni ake.

¹⁸ Ashi-aji kuqhave kethiu akipitiu ngo atotiu pama kini kujo azu kuchhuve masake eno pamaye avela kutolo mithemoni ake.

¹⁹ Kughou totimino aqhilo ahji pochekeu shini keno liye atsala tsuni kutolo mithemoke. Timi khuuno li diluni keno avela kutolo mithemo ake.

²⁰ Lino aqhilo ahji pochekeu shi akelo kiu kiu shou iqani momu zuni keno tiye mithemo ake.

^21-23 Timi khuuno li zua momu lino iqavekeu diluni keno pa phimini ishive eno azu kuchhuve masa eno paye avela kutolo mithemoni ake.

²⁴ Timi lakhino lino aqhilo ahji pochekeu shi ake lono sasu ashi-aji kuqha aye li kimthekumono pa kitiqeve ake eno paye atsala tsuni mithemono ani ake eno pano khipau zualo zuni keno tiye mithemoni ake.

²⁵ Totimi lakhino aqhilo ahji pochekeu nguno alau atsala kini kuthu kutolo ahji pole auve momu lino aqhilo ahji pochekeu ye ado heche ghi poauve aye tishi poauve ke kutolo liye mithemono auveni ake, aqhilo ahji pochekeulo mithemokeu toi ke.

²⁶ Tipa ghulokilo lino azua khipau shou zuni eno khipau shou iqani keno tiye mithemo ake.

²⁷ Timi khuuno tipaqo diluni keno mithemo ake eno paye pa phimini ishive eno azu kuchhuve masake, paye avela kutolo mithemo ake.

²⁸ Lino pochekeu tave kethiu liye atsala tsuni khe aghimasa, tithiuno liye achinepulo mitheni ake.

²⁹ Atsala akutacheni lino amiqhi momu kobutur kini pesu AMPEU no ngochekeu Phiki hukikhalo achineu lau pewulo.

³⁰ Achineuno tikuma gholo lakhi pesu axine kumllagho shilo eno lakhiu pesu pitikeu kumllagho shilo eno hitoi shipuzu li shikimthekeu chine pano chinilo.

³¹ AMPEU no Muse vilo Israilmiqoye mithemono akeu ghenguno piputo penike pike tishianguno panonguye AMPEU no ngochekeu Phiki shipixi pemoniyeke, aphiki tiye ngochekeu ghazu mtalo ake. Panonguno shipixive aye panongu pithive nanike.

³² Ayezah hipaqoye timi khuuno azu ipeghi aghini momu aphizu ile ipeghini keno tipau ghenguno,

³³ totimi lakhino aqhilo ahji pochekeu shi akelo momu timi lakhino totimi khuuno achinepulo mithemono akeu sasu ashi-ahji kuqhani keno tipaqo ghengunoke.