ACHINE 13 - BAIBEL (BSI)

Apugha Kusu Jeli Yezah

¹ AMPEU no Muse ngo Aron pama lau ayezah hipaqo tsuke.

² Timi lakhi yiko lo apiyi momu, amishe momu iphuchope aghi puzu tipauno ayiko kusu lhoksa shivekepu shiaghi aye timi tipauye Aron lagha chinemi lau saighilo.

³ Achineuno apiyi hu jukide kudailo eno apiyi tipaulo asa akeu metsughoive eno apiyiye ayiko kutau nguno itanhei ilove aghi aye, tiye apugha kusuke achineu no timi tipauye mithemove ake pi pithi puwuvetsulo.

⁴ Ikemu apiyiye phalai eno ayiko kutau nguno itanhei ilomo eno asa tile akeuye metsughoi mphi aye, achineuno atsala tsuni ghenguno timi tipau kutashi qhilo.

⁵ Atsala akutsunilo achineuno itaghi pa lhekide kudajulo eno pano ithulukelo apiyi tipauye atho puzu qhawomono aghi aye pano itaghi atsala tsuni pakutashi qhilo.

⁶ Atsala akutsuniulo achineuno itaghi pa lhekide kudajulo eno apiyi huye hawo cheghi eno qhawomo aye paye chinikepu lono mithe anike pi pithino puwovelo, tiye apiyi likhike. Timi ye pa phimini ishive pelo eno paye chini kepu lono mithe anike.

⁷ Ikemu achineuno pa lhekide kudajuve kethiu eno paye chini kepu lono mithe ani kepi pivetsu kethiuno apiyi phawove aye paye achineu gizulo itaghi saghi masake.

⁸ Achineuno itaghi pa lhekide kudajuni eno tipauno phawove aye timi tipauye mithemovekeu pivetsulo, tiye kumsapu yiko kusuke.

⁹ Timi khualano kumsapu yiko kusu puaghi aye achineu lau saighilo,

¹⁰ papelo tipau jukutoju pelo. Payikolo apiyi phalai puzu tile asa akeu metsughoive eno ani puaghi aye,

¹¹ tiye supushuvekeu ayiko kusuke. Achineuno paye mithemovea kepi pivetsulo, pakutashi qhipuaghi kepu shiakevilo kughengu paye mutsuqheino mithemono anike.

¹² Ayiko kusu huno phawo aghi eno timi tipau akutsu lono apukhu kutolo qhawove aye,

¹³ achineuno itaghi pa jukutojulo. Tipauno aphi kuchopu qhawove aghikeu achineuno ithulu aye timi huye chinikepu lono mithe akeu pivetsulo. Payiko kuchopu phalai aghi aye paye chinikepulo mithe anike.

¹⁴ Ikemu apiyi piyi ipeghi kemtsa lono paye mithemoveake.

¹⁵ Achineuno itaghi pa jukutojulo eno pano piyi ipeghi aghikeu phulu aye timi tipauye mithemovea kepi pano pivetsulo. Apiyi piyi ipeghi keuye kumsapu yiko kusu kiqike eno timi tipauye mithemoke.

¹⁶ Ikemu kughono apiyi viveni keno eno metsughoi kitheve aye timi tipauye achineu lau wulo

¹⁷ eno achineuno pa jukutoju kithe nani. Apiyino metsughoive aye timi huye chinikepulo mithe ani eno achineuno paye mithe akeu pivetsulo.

¹⁸ Timi khualano amishe puapuzu viveni

¹⁹ eno hithiuno mishekeu-alo metsughoi ingu momu hughaikeu tipa alo ipeghi aye paye achineu lau wulo.

²⁰ Achineuno pa jukutojulo eno ayiko tipa aloye kutau nguno itanhei ilove aghi eno asa tipaulo akeuye metsughoive aghi aye paye mithemove akepi pivetsulo. Tiye kumsapu yiko kusu amishe lono huthu ipeghi anike.

²¹ Ikemu achineuno tipau jukutoju keulo asa tile akeuye metsughoi mphi eno tiye ayiko kutau nguno itanheimo ikemu ashi xuthilei aghi aye achineuno atsala tsuni pakutashi qhilo.

²² Tipauno phawove aghi aye paye mithemove ake pi achineuno pivetsulo, paye akusu auve ake.

²³ Ikemu tipauno kilimono atho shi auve eno phawokeu kuha ishi aye tiye amishe zaku likhike eno achineuno timi tipauye chinikepulo mithe ani kepi pivetsulo.

²⁴ Timi lakhi amino pitivekeu shelo ashichono metsughoi momu hughaive aye,

²⁵ achineuno pa jukutojulo. Tipa alo asa akeu metsughoive aghi eno ayiko kutau nguno itanheive aghi aye tiye kumsapu yiko kusu amino pitivekeua lono huthu anike eno achineuno timi tipauye mithemo akepi pivetsulo.

²⁶ Ikemu tipa alo asano metsughoimo eno tiye ayiko kutau nguno itanhei mo, ikemu xuthilei aye achineuno atsala tsuni pakutashi aghi pelo.

²⁷ Achineuno itaghi atsala akutsuniu lono jukutojulo eno tipauno phawove aghi aye tiye kumsapu yiko kusuke eno achineuno timi tipauye mithemoke pi pivetsulo.

²⁸ Ikemu ayiko tipau ju kilimo eno phawomo eno tiye ashi xuthilei napi aye tiye kumsapu yiko kusu kumoke. Achineuno paye chinikepulo mithe ani kepi pivetsulo kughengu tiye pitive keu zaku likhike.

²⁹ Kiptimi na totimi namu milakhi kutsulo momu agimuchulo apiyi aghi aye,

³⁰ achineuno tipau jukutojulo. Tipau no ayiko kutau nguno itanhei keu shi aghi eno tipaulo asa akeqoye phalai eno ililiyi aghiaye tiye kumsapu yiko kusuke eno timi tipauye mithemo akepi pano pivetsulo.

³¹ Ikemu achineuno pa jukutoju kelo apiyiye ayiko kutau nguno itanhei ithulumo aye eno tipa alo asaqoye akivishi akeu kuha aye atsala tsuni ghenguno timi tipau kutashi qhilo.

³² Atsala akutsuniulo achineuno apiyi jukutoju kithelo eno tiye phawomono aghi eno tipaulo phalaikeu kuha eno ayiko kutau nguno itanheimono aghi aye,

³³ timi tipauno apiyi qhalo asa miyevelo. Achineuno timi tipau atsala tsuni pakutashi qhilo.

³⁴ Atsala akutsuniulo achineuno apiyi jukutoju kithelo eno tipauno phawomono aghi eno ayiko kutau nguno itanheimono aghi aye timi tipauye chinikepulo mithe ani kepi pivetsulo. Timi no pa phimini ishivelo eno paye mitheluni ake.

³⁵ Ikemu paye mithe ani kepi pive kethiuno apiyi phawove aghi aye

³⁶ achineuno pa jukutoju kithelo. Apiyi phawove aghi aye, phalaikeu sa ju akepu kuhake, timi huye mithemove ake.

³⁷ Ikemu achineuno michilu keuno apiyi ye phawomo eno asa akivi tilehi thuwu ani eno apiyiye vive aghi aye achineuno paye chini kepulo mithe ani kepi pivetsulo.

³⁸ Kiptimi momu totimi milakhi yikolo metsughoi keu aqe aqe shi aghi aye,

³⁹ achineuno timi tipau jukutojulo. Tipauye phughui keushi aghi aye tiye ayiko lhoksa likhike, timi tipauye chini kepulo mithe anike.

^40-41 Timi lakhiye pa zupo momu pa kishelo asa ipive aye tipauno papelo mithemokeu shi apemoke.

⁴² Ikemu apiyi hughaikeu asa ipivekeulo ipeghi aye tiye kumsapu yiko kusuke.

⁴³ Achineuno pa jukutojulo eno tipaulo hughaikeu piyi aghi aye,

⁴⁴ paye mithemo kepi pivetsulo kughengu pa kutsulo kumsapu yiko kusu ani ke.

⁴⁵ Timi khuno kumsapu yiko kusu aghini keno paye aphi kuixu umasa, pa kutsusa xemono qhi eno pakichi nhapu puzu ishi ighamukulo, “Mithemoe, mithemoe.”

⁴⁶ Akusu tipau puake thaqhulo paye mithemo aphike, eno paye kutami launo putosuu, timino ngochekeu nguno khalau ache masae.

Akughumho Yezah

⁴⁷ Kughono aphiminilo imho aghini keno amhi momu phepheyi phi lona momu

⁴⁸ phepheikeu momu amhiphi tachulo momu ashiyikono shikeu nhemgha shou aghi aye,

⁴⁹ tipauno tsunika ju momu huchui keu aye tiye phawonikeu kughumhoke ghenguno achineu piyemasake.

⁵⁰ Achineuno tipau jukutojulo eno atsala tsuni ghenguno ti kutashi qhilo.

⁵¹ Atsala akutsuniulo pano tipau jukutoju kithelo eno akughumho phawo aghiaye anhemgha tipauye mithemovae.

⁵² Achineuno tipau pitivelo tiye phawokeu kughumho ke amino pitive masake.

⁵³ Ikemu achineuno tipau jukutojukelo akughumho huye anhemgha shou phawomono aghi aye,

⁵⁴ tipau qhuve penike ahza tsulo eno itaghi atsala tsuni pe puaghilo.

⁵⁵ Tishino pano tipau jukutojulo eno akughumho huye aju kilimono aghiaye, tipauno phawomo namu tiye mithemokeu ake. Nonguye anhemgha tipau pitivelo, mave keu tipauno azuu na athiu kudau aghi pinamu.

⁵⁶ Ikemu achineuno tipau jukutoju kithe keulo akughumhoye hauve aghi aye pano aphimini momu ashiyiko tipado suthavelo.

⁵⁷ Akughumhono ipeghi kitheve aye tiye phawo kithe anike eno anhemgha mpiuno tipau pitivelo.

⁵⁸ Pano anhemgha tipau qhuveni kelo tipa alo hauve aye tipau qhu kithelo eno chini kepulo mitheni ake.

⁵⁹ Tishiaye, ayezah hipaqono aphiminilo akughumho akeu ghengunoke, tiye amhi momu phephei phi na, momu phephei phi momu amhi phi shou momu ashiyikono shikeu nhemgha shi aghi pinamu achinepulo mithe anikeo mokeno hipa ghola lono xatha mayesa.