ACHINE 12 - BAIBEL (BSI)

Totimi Punu Shikimthe

¹ AMPEU no Muse lau ayezah hipaqo tsu,

² hiye Israilmi ghenguno ke. Totimi lakhi anu punuke thiu atsala tsuni kutolo liye achinepulo mithemokeu shia nanike, tiye lino aqhilo ahji pochekeu paphike.

³ Atsala akutacheulo anu huye aphighu yiko ghavetsulo.

⁴ Tishi puzu atsala shighi kuthu thiuno liye ahji pokeu lono achinepulo mithekeu shiluni aphike. Liye akimthe nhemgha kiumu bukevilo momu li shikimthekeu ghuloki tsala kupumoke kutolo akimthe Phikilo ilokevilo.

⁵ Totimi lakhino anga totimi lakhi punuwo tsala chighi bidi kutolo liye achinepulo mithemokeu shiaphi, tiye lino aqhilo ahji pochekeu paphike. Tishi puzu tinguno alau atsala lhotsugho tsughokutolo liye chinikepu lo kitiqekeu shi aniaphi, tiye ahji pove keu ghengunoke.

⁶ Lino shikimthekeu ghuloki kupuve kethiuno, anu pina anga ghengu namu, liye pitikeu kumllagho bheriti ampe lakhi shivekeu lakhi eno axine kumllagho ghenguno amiqhi lakhi pesu AMPEU no achekeu Phiki hukikhalo achineu lau sughilo.

⁷ Achineuno liwu akumllagho pesu AMPEU mllalo eno liwu mithekumo ikhivetsu keu chine chinilo eno liye chini kepu lono mitheluve nani. Tishiaye, totimi lakhiye punuve kethiu hipau shimasae.

⁸ Totimi huno bheriti peighimla kepushi aye amiqhi kini momu kobutur kini sughilo, lakhino pitikeu kumllagho ghenguno eno lakhiuno axine kumllagho ghenguno eno achineuno li kimthekumo ikhivetsu keu chine chinilo tishianguno liye chinikepulo mitheluve nani.