ACHINE 11 - BAIBEL (BSI)

Chukulupu Lhoxuqo

¹ AMPEU no ayezah hipaqo pesu Muse ngo Aron pama tsuke,

² tiye Israilmi ghenguno tsuke. Nonguye hipaqo shi chulu nani:

³ apukhu mutsu shoba eno akhakile kiche lhoxu shi chulu nani,

^4-6 ikemu nonguye kemel ngo achighi eno rabit shi chukevilo. Tipaqoye mithekumo lhoxuke tipaqoye, akhakile cheni ikemu apukhu mutsu shoba moke.

⁷ Awo shi chukevilo, tiye mithekumo lhoxuke; tipaqoye apukhu mutsu shobake ikemu akhakile chemoke.

⁸ Lhoxu tipaqo chukevilo momu tipaqo kithikumo bukevilo; tipaqoye mithe kumo lhoxuke.

⁹ Nonguye akha jeli khipaqono mulukuba eno akoza puani keno tipaqo chulu nani,

¹⁰ ikemu azulo lhoxu khipaqono mulukuba eno akoza kuhakeno tipaqo chukevilo.

¹¹ Lhoxu tikithipuye mithekumo kepi ithivelo. Nonguye tipaqo chuke kumono tipaqo kithikumo mu bukevilo.

¹² Azulo lhoxu kiu kiu shiaghi mu mulukuba eno akoza kuhakeu jeliye chuke vilo.

^13-19 Nonguye aghau jeli hipaqo lakhimu chukevilo: aluqu, aqhaqho, alhaqu, alukuzuve eno tipaqo jeli; kithimi luqu, agha, ostrik ghau, azughi kubau; azughau jeli kumtsu; minitugha momu ashuqhaqo.

²⁰ Achishibo kupu tikhaninga kumtsu mithekumoke,

²¹ khipaqono ikawu cheni keno tipaqo kumoaye.

²² Nonguno leusu ngo awusho eno atikha chulu nani.

²³ Ikemu lhoxu kutau kititi achishibo kupuqo eno itiwu chekeqoye mithekumo lhoxu kepi ithilo.

^24-28 Khunono lhoxu hipaqo kithikumo buni keno panoye avelau kutolo mithemoni ake: lhoxu apukhu mutsu kupu jeli tiye aphisa puaghike thaqhu; ikemu tipaqo gholo apukhu mutsu shobapu eno akhakile kiche lhoxu bulu kemiye kumu kumoe. Khunono tipaqo kithi kumo xapuwuni keno pa phimini ishive masake, ikemu paye avelau kutolo mithemono aniake.

^29-30 Idelaghu, aji, ajifu eno aniza jeliqoye mithekumo kepi ithilo.

³¹ Khuu khuumu tipaqo dilu momu tipaqo kithi kumo buluaye avelau kutolo mithemo no aniake.

³² Tipaqo kithi kumono kiu kiu shoumu ilukiqi iku aye tiye mithemo keu shini ake. Tipa tsaye asu na aphi na ashiyiko momu jolabo nhemgha jeli kiu kiu ghenguno peitha chekeu shi aghi mu tiye mithemo keu shini ake. Tipau azulo putsuvelo ikemu tiye avelau kutolo mithemo no aniake.

³³ Tipaqo kithi kumono ayeghili lo ikiqi ilo aye tipaulo akeu kumtsu mithemo keu shini ake ike nonguye ali hu kubolevelo.

³⁴ Thosulo chulu chekeu chuqupu pinamu ali tipaqo lono leqhikeu zuno achuqupulo lepukuve aye tiye mithemokeu shivae eno ali tipaqolo yekulupu zu eno titoi keqoye mithemokeu shiniake.

³⁵ Kiukiu shou pinamu akithi kumo ikiqi ikuve keuye mithemovae, ayeghimibo momu amiphoki pimu kubolevelo,

³⁶ ikemu kiu kiu mithekumo lhoxu kithi kumo no azupuki momu azu tughuko dilu namu tiye mithe anani.

³⁷ Tipaqo lakhino apiti yisuniye akeqo shou ikiqi ikulu pinamu apitiye mithe aphike.

³⁸ Ikemu apitiye azulo putsu puake lono tipaqo lakhino tile ikiqi ilove aye apitiye mithemovea.

³⁹ Lhoxu khipaqo chulu kepu keno tipau lakhi thive aye khuno tipau buluni keno avelau kutolo mithemovae.

⁴⁰ Timi khuuno tipau lhoxu bi apukhu jeli kiukiumu chu aye paye pa phimini ishive masa ikemu paye avela kutolo mithemovae, timi khuuno akithi kumo pewuni keno pa phimini ishive masae, tishimu paye avela kutolo mithemovae.

⁴¹ Nonguye lhoxu kititi ayeghilo iqhoiqi chekeqo lakhimu chukevilo,

⁴² tipaqoye itichekeu momu apukhu bidi momu apukhu kutomo pusu chechekeu pinamu.

⁴³ Hipaqo lakhimu chupuzu nolikhi nongu kitiqe kevilo.

⁴⁴ Niye nongu Lhou AMPEU ke, eno nonguye akimtheshi ache masa kughengu niye akimtheke.

⁴⁵ Niye nongu sasu Ijip lono saipeghi keu AMPEU ke tishianguno ino nongu Lhou shiniyeke. Nonguye akimthe shimasake kughengu niye akimtheke.

⁴⁶ Tishiaye, ayezah hipauno ashi aghauqo ghenguno, azulo xuakeqo jeli eno ayeghi shou itha chekeqo ghengunoke.

⁴⁷ Nonguye kutokupui shipuzu achinepulo mithekeu eno kitiqekeu kututa shi ithimasa, lhoxu chulu kepu jeli ngo chumokepu kututa shikeu ithi masae.