ACHINE 10 - BAIBEL (BSI)

Nadab ngo Abihu Xine

¹ Aron nuli Nadab ngo Abihu pama milakhi khino amibo ikhilu, eno amibalu tipaulo su, tsungqu-ta sukuqha eno suwo AMPEU lau qhitsuke. Ikemu ami hipauye akimthe kumoe kughengu AMPEU ye panoqo vilo tipau sughi penike ahza tsumoe.

² Paikhavi AMPEU no ami puwu eno tilehi AMPEU zulono pama pitiqhi pithive.

³ Tile Muse no Aron vilo pi, “‘Khunoqono iqecheni keno panoqoye ikimthe sumsa masake; ino ikimthe jukuvu iwu timiqo lau pephepiye nani’ ipi AMPEU no pikeu hu paye hipatsa vehu piakena!” Ikemu Aron ye inaqhoi auve.

⁴ Muse no Aron papu thikuzuu Uzzel nuli Mishal ngo Elzafan pama kupuzu pi, “Hilau ighilo eno no tilimi kithikumo akimthe Phiki lono pesu aghazu bocho nguno khalau qhivelo.”

⁵ Ikehu pamano akithikumo phimini ashelo tsuqupe puzu khapesu aghazu bocho khalau pewuve, Muse no ahza tsukeu toi shike.

⁶ Tile Muse no Aron ngo pa nuli Eleazer eno Ithamar vilo pike, “Nongu sa muthomughoi pekevilo momu amloksa kiqi shi nongu phimini suxu kevilo. Nonguno tishi aye thive nani eno AMPEU no aqoaho kuchopu shou aloghu ideve nani. Ikemu nokusami Israilmi kumtsu AMPEU no ami puwuno akithipu shivekeulo amlo imekuqha penikeu shi pulosutsu anike.

⁷ Aphiki hukikha pheve kevilo tikumoaye nonguye thi nani kughengu nonguye AMPEU wu nukishe teli pesu akimthepulo kisheluvae.” Ikehu panonguno Muse no pikeu toi shike.

Achinemi ghenguno Ayeh

⁸ AMPEU no Aron vilo pi,

⁹ “No eno anuliqoye aji momu atsayi ji shopusu ino achekeu phikilo ilo kevilo; nongu no tishi aye thive nanike. Ayezah hiye olaghami kumtsuno peche masake.

¹⁰ Nonguye Alhou wu shivekeu ngo aqha lono peitha chekeu kuma dolo eno achinelo mithekeu ngo mithemo keu kutuqu akeu ithi masae.

¹¹ Nonguye ino Muse vechewo ayezah tsukeu kumtsu pesu Israilmi shikapiye masa.”

¹² Muse no Aron ngo panu kini xuakeu Eleazar ngo Ithamar pama vilo pi, “AMPEU lau piti mllakeulo athi kumllagho achili akeu lulo eno tipau pesu kholaqhi sumokeu shopa mla puzu akiptia phivi lono chulo, kughengu hipau kumllaghoye ighono akimtheke.

¹³ Akimthea lono tipau chulo, tiye AMPEU lau piti mllakeu lono no eno onuliqo salake. Tiye AMPEU no ahza itsukeu ke.

¹⁴ Ikemu amlashi ngo aluko khipaqo pesu AMPEU lau akimchigho eno akimchi shi achinemi ghenguno tsukeno okibolomino chulu nani. Nonguno chini kimtheve keu-a lono chulu nani. Akumllagho hipaqoye no eno otianuli tsuanike tiye Israilmino kuposhukulu kumllagho shikeu lono ngongu sala shikeuke.

¹⁵ AMPEU lau atha pesu piti mllake ghulokilo panonguno aluko ngo amlashi sughi pelo. AMPEU no ahza tsuve keutoi aleqhi hipaqoye alhokupujulo no eno otianuli salake.”

¹⁶ Muse no axine kumllagho ghenguno ane vehu iniju kelo tiye piti khave aghi. Hipau lono paye Eleazer ngo Ithamar pama shou amlo ideve eno ishi iniju.

¹⁷ “Nonguye kushiye axine kumllagho akimthea lono chuvemo kya? Tiye ighono akimtheke eno AMPEU no aqoahomi xine ikhisuwuve tsuniaye tipau nongu tsuveake.

¹⁸ Ino ahza tsuveke toi tipau jihye akimthe phikilo suiloghimo keke aghashi keu shi tilauno chuve kepushi ake.”

¹⁹ Aron no khochilepi, “Ishi ino axine kumllagho chuve kena piaye kishiveni chekela? Tipau nomu alau AMPEU lopivini chekesha? Timiqono pano xine kumllagho pesu ishi no AMPEU lau tsuke eno panonguno pitikeu kumllagho sughike ghi akumsapu hikithipu ishou ikughike.”

²⁰ Muse no hipau chilu keulo pa mlo kiqi shive.