ACHINE 1 - BAIBEL (BSI)

Kuchopu Kipiti Ghakishi

¹ AMPEU no ngochekeu Phiki lono pano Muse kulu eno

² Israilmi pelo panonguno heqhi mllakeulo pepimhe chepenike ayeh hipaqo pesu patsuke. Kugho kughomu timi lakhino lhoxu heqhi mllani keno pa mishi, bheri momu ane shi aghi masake.

³ Pa mishi gholo no pesu piti mllakeu tiye amshitsu tukutiye kiumu kuhakeu shimaye sake. Pano tipau sawo AMPEU no ngochekeu Phiki hukikhalo saghilo tishi anguno AMPEU no pa ikhilukeu shini.

⁴ Timi tipauno pau pesu tipau kutsu inape lo eno tishi keu lono pa xine ikhisuwuve tsukeu kumllagho tipau ikhilutsu nani.

⁵ Pano tilehino amshitsu tipau heqhino Aron laghalo achinemino ahji pesu AMPEU lau tsulo eno tipau pesu aphiki hukikhalo akiptia akeu ajibo bidi kujolo vepukulo.

⁶ Tipashelo pano lhoxu yiko lhaveno aleqhi shi ghethavelo,

⁷ eno achinemino akiptialo asu pewo kithipe qhino tipaulo ami kuiqu pukulo.

⁸ Panonguno aleqhi shi ghetha vekeu ami lo sulo, tipau gholo akutsu ngo atha ghi sukuqhalo.

⁹ Timi huno kighinoli ngo aluko qhuvemasa eno peitha akeu achineuno heqhi mllakeu kuchopu akiptia lono pitilo. Achuqupu kumllagho xo hipauye AMPEU lopu shi cheni.

¹⁰ Timi huno pawu bheritsu momu anetsu pesu mlla aye tiye tukutiye kiumu kuhakeu shi masa.

¹¹ Pano akiptia ahuu kudauno tipau heqhilo eno achinemino tipau jih pesu akiptia jibo bidi kujolo vepu kulo.

¹² Timi no tipau ghetha piniyive kethiu tile peitha keu achineuno tipau kumtsu ami shou belo, tipa gholo akutsu ngo atha sukuqhalo.

¹³ Timi huno kighinoli ngo aluko qhuvemasa eno heqhi mllakeu tipau achineuno pesu AMPEU tsulo eno tipau leqhi kumtsu akiptia lono pitilo. Achuqupu kumllagho hipauye AMPEU lopu shi cheni.

¹⁴ Timi huno aghau pesu piti mllakeu gho shi aye tiye amiqhi lakhi momu kobutur lakhi shimasa.

¹⁵ Achineuno aghau pesu akiptialo sughilo, tipau kuo sutha puzu akutsuye akiptia lono pitivelo. Tipau jih ye akiptia jibolo kighiji pukulo,

¹⁶ eno pano akole ngo akolemhi ishi ikhi pesu akiptia kipela kudau ayevu qhicheke alo vesuvelo.

¹⁷ Pano tipau chishibolo tsuqupe no tipau phimipi sula lo, achishibo sutha kututa shimono akuchopu akiptia lono pitilo. Achuqupu kumllagho xo hipauye AMPEU lopushi cheni.