2 Tim. 4 - BAIBEL (BSI)

¹ Alhou eno kuxumi ngo kithimi shou Kughakuthau Khristo Jisu zulono eno Khristo pephepiye nikeu ngo pa kukaqha ghenguno ino tsaquyi ohakite anike:

² atsa pesu pikulhalo, ado achipilo na monamu mutazu tipau pialo; mutsuqheyi shilupe, sakiyikepulo sakiyi, shikumto kepulo shikumto eno kheakulushi kutsupiyelo.

³ Kughengu timino kuchou kukutsu lumonike ghuloki ighi nani, ikemu muthomuzayi keu kini xapu panongu gho-apulou shipenishi kelauno panonguno ininishi akeu likhi pitsupenikemi akukutsumi sawo qhi nani.

⁴ Timi tipaqoye kuchou tsa ininikeu lono tsughuve nani eno kughakiche tsalo amlo tsuwuve nani.

⁵ Ikemu nouye pulhapuju tsaqutsaleyilo, ghichheghime puqhelulo, tsavipemi kumla shilo eno Alhou qemi kumlapu shikupululo.

⁶ Ighenguye kughape ghiqhi mllave penike kutoluvae; niye hipau kuxu phevekepu ghuloki tovae.

⁷ Niye aghukishi akivishi shivae, niye akupolo ashetovae, niye akupulu pewotovae.

⁸ Hinguno hilauye ighenguno tokulu saxu amikucho kutsukuqho ani, tiye achipi lono xathakutsuu Ampeu no tipa Tsala lono itsunikeushi anike, eno ilikhi kumoe ikemu pa ikighi kimiye chekeqo ghi tipau tsu nanike.

Lomo Tsa

⁹ Mutazu ilau ighi nikeu pukaputsalo,

¹⁰ kughengu Dema ye hipa yeghi kimiyeuve puzu iqhivae eno Thesalonia lo wuvae. Kreska no Galatia lo wuvae eno Tito no Dalmatia lo wuvae.

¹¹ Luk likhino isasu ani. Mark phu sasu ogholo ighilo, paye ikuphughi mlalu nanike.

¹² Tukikha ye Efesia lo ino puwu ani.

¹³ Kughou nono ighi nikeno Troa lo Karp gholo aphikuzu akeu eno akhotono ino yepukuche keu kaku ngo ishi sughilo.

¹⁴ Ayikiyiqiu Aleksander no ighono ikijipusake; Ampeu no pano mlakeu qhemi pa tsuchile nani.

¹⁵ Noye pa launo kutokupuyiluve masae kughengu pano tsuyikhomo nitsa mujochile puanike.

¹⁶ Ilikhi isaphukeutsa kukugha atughiu loye milakhimu isaphukemi kuhaveno kumtsuno iqhiveke. Alhou pelo panoqo shou ngukukeu shipemoniu!

¹⁷ Ikemu Ampeu no igholo ake eno Alhou tsape hu pesu Judakumomi kumtsu vilo chixechileyi pikulhalu kepushi ishikumto tsuke; ikehu abongushu baxa lono ixapheluveke.

¹⁸ Ampeu no alhoksa jeli kumtsu launo ixaphelu nani eno paw kungugha kukaqhalo isasu ilo nani. Alhokupuju lono alhokupuju kutolo pa lau akimthejukuvupu shilo! Amen.

Ashekha Petha

¹⁹ Priskila ngo Akuila eno Onesifora kibolomi lau petha tsuani.

²⁰ Erasta ye Korinthia lo ngoveke eno Trofima ye suauve puzu niye Mileta lo pa qhiveke.

²¹ Noye susutsala shimphi lono ighinike pukaputsalo. Eubulu, Puden, Lina, Klaudia eno athikuzumi kumtsuno petha tsupuwu ani.

²² Ampeu no ongu-gha gholo achelo. Alhou wu kupukini nongu kumtsu gholo achelo.