2 Tim. 3 - BAIBEL (BSI)

Ashekhalau Tsala

¹ Hi ithitoilulo! Ashekhalau tsalaloye shiluksa ghuloki ighi nani.

² Kughengu timiqoye hipaqo shiwuve nani: alikhi ampi kikimiye, pisa kimine, aqhekuza, lahilaza, timi phimo-gihumokeu, apu-aza hekibide, shikimthi kukuha, achineyeh kiphikumo;

³ timi kimiyekilekeyeh kukuha, kusuqhimla, axikishi, ghasukumla, ayikusa, akivipu kimithi,

⁴ pishikiqhi, aka-aghoshikeu, aqhekuzano tsutsungoju, Alhou kimiyenike zuqhulo alikhi aghakiqipu kimiyekeu.

⁵ Achineyeh ghushoghili pepulaghi tipaulo akuka kumto akeu phevekeu. Panongu launo putosu alo.

⁶ Hitoi shikemi gholo khamiye muqumgha shi puzu timi kilo ilono tomochhimokemi totimi alikhi axineno qaqhipesu achekeqo eno thwokha mine-migheyi achekeqo,

⁷ pulhapuju shikapiye penishi anamu kuchouye khilemu ithinichemokeqo totimiqo, timi tipaqono zuluve cheni.

⁸ Joana ngo Jambre pamano Muse mujochile ketoi timi hipaqo ghi kuchou mujochile chenie. Timi hipaqoye kusakugha kumsuchekemi eno akupululo chighi chilaikemike.

⁹ Ikemu panonguye khitohimu wumla nani, kughengu Joana ngo Jambre pama shou kishivekeno titoi timi kumtsuno timi hipaqo ghuzu ithuluve nani.

Akukutsu Shekhau

¹⁰ Ikemu noye ino kutsuche keu, iwu ghushoghili eno ikuxulo kiu mijipesu chenikeno papelue. Noye ikupulu, ino kheakulushi chekeu, ino kimiyechekeu kumtsu ithi ani. Antiok, Ikonia eno Lustra lo

¹¹ ishi kighimekeu eno akijipusa keu ino kishi kutuulu keno noye ithi ani. Ikemu tipaqo kumtsulo Ampeu no ixapheluveke.

¹² Khristo gholo xukimepeno Alhou lau amlo tsukeu kuxu xunikemiye shikimighi nani;

¹³ ikemu timi lhoksami ngo ghaghumiye kutami pishiqhikeulo eno pano likhi pano pishiqhikeulo vimokithe acheuve nani.

¹⁴ Ikemu nouye khikhi oshikapiyeve akeno eno nono mutsuqheyi pulu ani keno tipaulo chechelo, eno khuu launo tipau shikalukeno ithilo,

¹⁵ nono itimi shiaphi lono Kuchoyesu ithichekeu huno akupulu vechewo Khristo Jisu lau xachilekulupu kudau osawukepu lokutsu tsulu nanike.

¹⁶ Kughengu Kuchoyesu kumtsu Alhou no muzuphetsu keuke eno kuchou kutsupiyeni keu, akumou shiaghikelo alomipi nikeu, shipimikeulo shikithe nikeu eno achipishi xupenike akukutsu tsu nikeu, tipaqo kumtsulo peithakulupue,

¹⁷ tishianguno Alhou qeu shiakemi pelo akumla kivipu kumtsu shitsashilu eno kupukulayilu peniyeke.