2 Peter 3 - BAIBEL (BSI)

Ampeu Ighinikeu Shoqhi

¹ Ino kimiyechekeqo, niye hipau pha ghuthu akiniu nongu lau yepuwu ani. Hikuma kini kujolo hipaqo thime pesu nongu piputo puzu nongu lolo mutsumishei keu kukumsu hakuthotsu anike.

² Ike tiye nongu pelo tungkupmi akimthemiqono ashe azutsa pipuakeu, eno nowu apostolmino Ampeu eno Xakuluu zahkutsu pesu nongu tsukeu kumsuchilelu apenishi anike.

³ Atughishi nonguno hipau ithikututa shimasae, ike ashekha tsalaloye timino alikhi ashi ajino ngosukumla papewuve puzu nongu thaigha nani,

⁴ eno ishi pinani, “Paye ighi nani kepi pichekeu hu khilave akya? Nipuasu qoye thikhavae, ikemu ayeghiqha lhophe kelono thwokha kiutoi aghi keno itehi kutolo titoi aphike!”

⁵ Panonguno puthaputsano mutsuqhei keu vehu hipau juzuve acheni, ike tiye khaghino Alhou tsano atsutsu ayeghi lhopheke. Ayeghiye azu lono azu pesu ghopheke,

⁶ eno yimvekeu-zu pesu khaghi yeghiqha achekeu putsuqhi puhavetsuke.

⁷ Ikemu Alhou tsano atsutsu ayeghi itehi akeu huye ami pesu kutsapiniyiveni keushi ghupe puani, tiye Alhou phimokemi shou kughathabeni keu eno kutsapiniyiveni keu tsala ghenguno qhipuani.

⁸ Ikemu mutsuqheyi keu vehu hipau kumsuma kevilo, ino kimiyechekemiqo! Ampeu zuloye atsala lakhiye ampe 1000 paphike eno ampe 1000 ye atsala lakhi paphike.

⁹ Timi khamino kumsukeuno Ampeu ye pano piqhive keulo asheshi auve cheni kughashi kemu paye tishimo nani. Ikemu paye nongu lau kheakulu shi anike, kughengu paye timi khuu pelomu puhavepe nishimoe, ikemu kumtsu pelo axine lono xakide ighivepe nishi ani.

¹⁰ Ikemu Ampeu Tsalaye kupukami lakhi toi ighi nani. Tipa tsalalo atsutsuye asutsa kuloghishi ighano hauve nani. Atsutsulo akeqoye pitipuhave nani eno ayeghi ngo tile akeu jeli kumtsu piti puhave nani.

¹¹ Tishiaye hipaqo thime kumtsu hitoi shipuzu puhave nikeu shiani aye, nonguye kiutoikemi shikepu keno ithilo.

¹² Alhou Tsala kheakevilo eno tipau mutazu ighipeniye mla akevilo, nonguye Alhou lau akimthe eno pano peithakeu kuxu xukepue, kughengu tipau Tsalaloye atsutsuqoye pitiveno puhave nani eno tile akeu jeliye amino pitikumlave nani.

¹³ Ikemu Alhou no piqhivekeu toi ninguye kungugha kithe eno ayeghi kithe khileno amikucho cheni keno tipau kheani.

¹⁴ Tighenguno ino kimiyechekemiqo, nonguno tipau Tsala kheakelo, nonguye kiumu tukutiye kuhano mutsumisheyi aghikepushi pukaputsa azukini shilo eno pa lau aloino alo.

¹⁵ Alhou no alokutsu pa tsukeu kiqi lono nino kimiyekile chekeu nithikuzuu Paul no nongu lau yesu tsupuwu keu toi niMpeu no kutuu tsu akeu huye nongu pelo xaluve peniye adokivi tsuani kepi kihiluvelo.

¹⁶ Nithikuzuuno pawu yesu yekeu kumtsulo hipatsa pipe puanike. Pawu yesulo kuthokuzutsa hami ani, ike muthakemi eno akupululo akuhu qusumokemino kuchoyesu kutau peitha kehutoi tipaqoghi pesu pano likhi pano shikupusapu shive cheni.

¹⁷ Tighenguno kimiyechekemiqo, tishimphi lono nonguye hipau ithilo. Nonguye kutokupuyiluvelo, tishianguno nonguye ayezah pemokemi kipimi gholo musu sawuve nosake eno nonguno tsaqutsaleyi akeua lono ikiqive nosake.

¹⁸ Ikemu niMpeu eno niXakuluu Jisu Khristo kupukini eno pa kighithilo thuwu alo. Itehi eno alhokupujulo pa lau akimthe jekipi shilo! Amen.