2 Peter 1 - BAIBEL (BSI)

¹ Jisu Khristo qeu eno apostol Simon Pitor launo niLhou eno niXakuluu Jisu Khristo mikucho vechewo nigholo akupulu aqhemishi ithuluvekemi lau yelu ani.

² Nonguno Alhou ngo niMpeu Jisu kighithi akeu vechewo kupukini ngo aloinokeu nongu lau kighishelu apeniu.

Alhou no Kukulu eno Kishekulu

³ Alhou no pa kimthe jukuvu eno akivipuno ningu kuluvekeulo paye khuu keno tipau ithikeu kighithi vechewo Alhou lau amlo tsuqhiyikepu kuxu xulupe nikeulo pa kuka kumtono thwokha jeli ningu tsupe puani.

⁴ Hitoi shipuzu pano piqhive keu amekusho eno akughupu kumsagho pesu ningu tsuvae, tishianguno kumsagho hipaqo peitha puzu ayeghiqhalo ngosukumla no shikupsa akeu launo nonguye puluvepe niyeke, eno Alhou lhoayeh kusajelupe niyeke.

⁵ Highenguno tolukivi thaqhulo akiqheu shipuzu akupulu shou alokepu pesu veqabelo; alokepu shou akighithi pesu veqalo;

⁶ akighithi shou alikhi aghasu kulu pesu veqabelo; alikhi aghasu kulu shou kushuwa puqhekulu pesu veqabelo; kushuwa puqhekulu shou Alhou lau amlo tsuqhiyikeu pesu veqabelo;

⁷ Alhou lau amlo tsuqhiyikeu shou Khristomi kimiyekilekeu pesu veqabelo eno Khristomi kimiyekilekeu shou kikimiye pesu veqabelo.

⁸ Kughengu nonguno hipaqo peitha eno kupukunoshi peche aye hipaqono nongu pelo niMpeu Jisu Khristo kighithilo thailupe nani.

⁹ Ikemu khunono hipaqo kuha keno panoye mamayi puzu kiumu ithumlake eno axine aqauqo launo shikimtheve tsukeu hu kumsumakhave ake.

¹⁰ Tighenguno athikuzumiqo, Alhou no nongu kulu eno kishekululo ithamono mutsuqheyi shilupe nike pukaputsa alaushi azukini shialo; titoi shi aye nonguye khilemu akupulu phevemo nanike.

¹¹ Hitoi shikeu lono nongu pelo niMpeu eno ni Xakuluu Jisu Khristo wu alhokupuju yehkipelo ilokulupu kuka kumtsu pesu nongu tsu nanike.

¹² Ike nonguye tipaqo ithi ani eno kuchou ghili ikhiluvekeulo nonguye mutotoi xu acheni kemu niye hipaqo thime pesu pulhapuju nongu piputo anikeu shi ani.

¹³ Ino xuake thaqhulo nongu piputono kudaputhu keu achipikepi ino kumsulu ani.

¹⁴ NiMpeu Jisu Khristo no ipiyeveake, niye kushuwa kumoloye iphimpi hipau pheve nikeu ino ithi anie.

¹⁵ Ino thive kethiu pinamu nongu pelo hipau kumsu chilelupe nike ghenguno ino ala phupe puatsu nani.

Khristo Jukuvu Ithulu

¹⁶ Kughou ninguno nongu vilo niMpeu Jisu Khristo no ajekipi jukuvu lono ighinikeu ghili pesu pikeno ninguye timino muqumughashino iqiphekeu kughakichetsa pesu pithike kumoe, ikemu ninguye pa kimthe jukuvu ithulu puakeqoke.

¹⁷ Apu Alhou no agigihu eno akimthe jukuvu pa tsu eno Akimthe jukuvu sutsa pa lau piakelo ninguye tilehi ake, “Hiye iNu iqhuuke, niye pa lau ilokiqi shi acheni.”

¹⁸ Atsutsu lono asutsa hipau ighikeu ningu ampino chiluke, kughengu ninguye pa gholo akimthe naghutolo ake.

¹⁹ Ikehu tungkupmino Alhou tsape shikeu tsalo ninguye alaushi mutotoi kitheluvae. Hipaulo nonguno amlo tsaqutsaleyi tsukeuno akivipu shilu nani kughengu Atsala vuipeghi puzu inaqhe yepuno nongu mlolo yepuvumoke kutolo hipauno akuzu alo akulu lakhino yepuvuakeu hutoike.

²⁰ Thwokha kumtsu nguno atughushi hipau ithi kututa shilo ike kuchoyesulo tungkuputsa huye pututano lhepiyelu chemoe,

²¹ kughengu tungkuputsaye timi gho apulou lono ighipe puamoe, ikemu Aghungu Kimthe no peitha keu lono timino Alhou launo ighikeu tsape pichenike.