2 John 1 - BAIBEL (BSI)

¹ Amuchouno kishepheluve keu Atotiu eno li tianuliqo lau yelu ani. Nongu ino kuchouno kimiyechekeqo, eno ilikhi kumono khunono kuchou ghili ithiani keno tipaqono nongu kimiye cheni,

² kughengu kuchouye ningu gholo acheni eno alhokupujulo ningu sasu ache nani.

³ Apu Alhou launo eno Apu Nu Jisu Khristo launo kukumgha, kupukini eno aloinokeu ningu gholo apeniu. Tiye kuchou eno kikimiye lono niwu shilu peniu!

Kuchou eno Kikimiye

⁴ Nongu tianuli khamino kuchoulo xuchekeu ithulu puzu niye shishe alokivishi ani, tiye Apuno ahza tsukeu toi xuanike.

⁵ Ikemu kimiyeche keu Atotiu, ino oqhuiniju ani: ningu kumtsu lakhino lakhi kimiyeni nolo. Ino hipau nongu lau yelu akeuye ahzakutsu akithe kumoe, hiye inahu abothu lono ninguno ikhilukeuke.

⁶ Ninguno pano ahza tsukeu peluaye tiye kimiyekeuke. Inahu abothu lono nongu kumtsuno chiluveake, ahzakutsu huye hike: nongu kumtsu kimiyekeulo xuchelo.

⁷ Ayeghiqha kumtsulo pishikiqhimi kutomo ipeghivae, timi tipaqono Jisu Khristo ye timi shiajih pepuno ighikepi ikhiluchemoe; titoikemiye pishikiqhimi eno Khristo Kimthiu ke.

⁸ Tishiaye, nonguye kutokupuyilo, tishianguno ninguno kiu ghenguno mla chekeno tipau nonguye puhavemo nanike, ikemu nongu jume kumtsu ithulu nanike.

⁹ Timi khuu khumu Khristo kukutsulo checheghimo keuye Alhou pa gholo kuhae. Khunono akukutsu tipaulo checheghini keno paye Apu, Anu kinikujo ani.

¹⁰ Timi khuu khumu nongu lau akukutsu hipau pesu ighimoaye nongu kilo pa sasu kevilo; momu pa sasu kiumu petha shikile kevilo.

¹¹ Kughengu khunono timi tipau sasu petha shikile nikeno pa kumla lhoksalo kusaje auvae.

Kishekha Tsa

¹² Niye nongu vilo avehu kutomo pikepushi ani ikemu niye akiye loye tipaqo ye-akhamlavae, tighenguno niampino nongu sasu kusho puzu kuptsa nikeu kumsupu ani, tishainguno ningu kumtsu alokivi shilukha nani.

¹³ Kishepheluve keu otsunipu tianuliqono petha nongu tsuni.