1 Tim. 6 - BAIBEL (BSI)

¹ Khunoqono aqu-axemi keno pano mipemiye qhoqhu kuzupu kepi kumsululo, tishianguno timi khuu pelomu Alhou je eno Khristomi kukutsu pipusamo nani.

² Aqu-axemi khunoqono pano mipemiqoye kupulumi keno Khristo lono athikuzumi shive ake ipi puzu tipaqo phimo gihumove kepu kumoe. Tishinike zuqhu akiviushi panoqo qemasae, kughengu khunoqono panoqo kumla launo avehupu shilu ani keno tipaqoye panonguno kimiyechekemi kupulumike. Nono kutsu shika keulo hipaqo pesu akhotoshi pimasae,

Kichile Kukutsu eno Kuchou Kini

³ khunono akukutsu kutau kutsupiye eno niMpeu Jisu Khristo tsa kuchoulo kuqhamoni keno eno kuchou chineyeh kukutsulo kuqhamoni keno,

⁴ paye qheza-laki ani eno kiumu mthae. Paye atsa ghenguno mutomushuyi eno kighe kile anikeu alhoksa kumsupu ani, tishikeu lono anhekushu, kusuxakeu, thaighakile keu, pulukupusa sughi cheni,

⁵ akukumsu lhoksami eno kuchou kuhavekeqo launo kighekile anikeu sughi cheni. Panonguno kumsuchekeuye achineyeh luanguno kinikulu shilu nani kepi cheni.

⁶ Iwa, achineyehlo aghaqiqhiyikeuye kinikulu kijeke,

⁷ kughengu ninguye ayeghilo kiumu pesu ighimoe eno ayeghi lono kiumu pewuni chemoe!

⁸ Tishiaye, chuqu kusho eno aphimini aghi aye ningu ghenguno tino kughokumoke.

⁹ Ikemu khunono kinikulu shinikeu mine cheni keno ghuju pejukeulo ikiqi ilove cheni eno mbomzu ngo ghuzaghugha sholukepu lichhelo ilove cheni, tipaqono puhapighiyi keu ngo hepusa pughayikeulo timi sunhesuve cheni.

¹⁰ Kughengu pisa kikimiye no alhoksa jeli kumtsu kuhu aghuke. Hipau kimine lono timi khamiye akupulu lono igho susu wuvae eno amlo ghimepu kumzapuno pano mlo vephopiniyivae.

Akupulu Ghushi

¹¹ Ikemu, no Alhou timi, noye hipaqo kumtsu phevelo. Noye amikuchou, Alhou lau amlo tsukeu, akupulu, kikimiye, kutuukulu eno akumtshano okimiji shilo.

¹² Akupulu ghushi akivishi shilo, eno lhokta kuxu phekevino tsuqululo. Thopimi kutomo kua lono nono piphe keu vechewo Alhou no okulu keulo tsaqui mutululo.

¹³ Thwokha kumtsu kuxu tsukeu Lhou zulono eno Pontio Pilat zulo pikiphe akivishi shikeu Khristo Jisu zulono ino ahza hipau otsu ani:

¹⁴ niMpeu Jisu Khristo ipeghinike Tsala kutolo ahzakutsu papelo eno tipau mutsumisheyi eno tukutiye shimono pelulo.

¹⁵ Pano ipeghini keu Tsala huye ado achipi lono kumghapu eno ayehpetou kukami shou Akukau eno ampemi shou Ampeu no pephepiye nani.

¹⁶ Pa likhino thimlakeuke eno avilo wumlakeu kuvulo acheni, khunomu pa ithulu puamokeu, eno khunomu pa shou jupukumla keuke. Agigihu kije eno lhokta kukaqha pa lau alo! Amen.

¹⁷ Ayeghi hipaulo kinimiqo vilo qheza kevilopi pilo momu kiu shiveniala mtha aphikeu kini shou pano lajupu bekevilo pilo ikemu alokiqipu shilupeniye thwokha kupukunoshi ningu tsuchekeu Alhou shou lajupu belo pilo.

¹⁸ Kinimiqo vilo akivipu shilopilo eno akumla kivi nibonilei shilopilo, kutami sasu kupukunoshi kusajeni keu kutope alo pilo.

¹⁹ Hitoi shikeu lono panonguno pano sala pekutsu pesu akini khuki pualu nani eno tipauno ighinikeu tsala ghenguno aboqha kumto shilu nani, eno khipauno kuchou kuxu keno tipau kuxu tsuqulu nani.

²⁰ Timothio, opelo jukutopeniye kiu otsupuani keno khelo Alhou sumokeu tsapi eno timino mtha puzu “Akighithi” kighekile chekeu hu phevelo.

²¹ Kughengu khamiye hipau pe panongu wu shi pi cheke eno tileno akupulu laghi puhavae. Alhou wu kupukini nongu gholo apelo.