1 Tim. 4 - BAIBEL (BSI)

Kichile Kukutsumi

¹ Aghungu huno mutsumisheyi pikeuno ashekha ghulokiloye timi khamino akupulu pheve nani; panonguno akimiki ghahwuqo tsa ini eno tughamino shikakeulo amlo tsushewuve nani.

² Akukutsu hipaqoye timi pishikiqhimi kimkimi vechewo ighi cheni eno timi tipaqo loloye kivikusa ithichekeu huye ayino pitikushughive keu toivae.

³ Timi tipaqono timino kulakupu shikeu eno achuqupu hami chukeu lakha cheni. Ikemu pululuvekemi kuchou ithivekemiqo pelo shikimthi kighini lono chulupeniye Alhou no achuqupu tipaqo lhotsuke.

⁴ Alhou no lhotsukeu jeli kumtsu akivike eno shikimthi kighini lono ikhilu aye kiumu milive kepu kuhae;

⁵ kughengu tishikeuno Alhou tsa ngo akighini huno Alhou lau tipau shikimtheve tsuae.

Jisu Khristo Qemi Kivi

⁶ Nono akukutsutsa hipaqo pesu athikuzumiqo lau tsuluaye noye Khristo Jisu qemi kivi lakhi ake, eno akupulu tsa ngo kuchou kukutsu nono pulhapuju pepimhe chekeu huno no ampi lojiputhulu nani.

⁷ Ikemu noye Alhou sumokeu kughakichetsa eno topu-toghu tsa launo putosuluvelo. Noye Alhou lau amlo tsukeu kuxulo oqophe alo.

⁸ Aphimpi qokiphelo ame hami acheniaye Alhou lau amlo tsukeuye thwokha lono amekuapu ani, kughengu tishikeuno hipa yeghilo kuxu ngo ighiniye akeu kuxu piqhipe puatsuae.

⁹ Hiye kuchoutsake eno qhoyi ikhiluno pulukepue.

¹⁰ Highenguno saye, ninguye ghichhe ghimeshi mla acheni kughengu ninguye timi kumtsu Xakuluu eno akhotono kupulumi Xakuluu, akuxupu Lhou lau niwu lajupu bepe puavae.

¹¹ Hipaqo vehu pesu pepimhewo eno kutsupiyelo.

¹² Timi khuu pelomu noye lhothemi kepi ojukunatha pekevilo, ikemu atsapilo, ghushoghililo, kikimiye piyekeulo, akupululo eno mutsumishei keu kuxulo xulo.

¹³ Ino ighimoke kutolo ado kumtsu tsuno aqo gholo kuchoyesu phisu, asheshu pikulha eno kutsu piye ishilo.

¹⁴ Alhou wu tungkupmino pikeu eno kichimino okisheluno oshou a-u betsu kelono ololo Alhou launo ighikeu gho otsukeu hu kughuchove kevilo.

¹⁵ Akumlapu saje hipaqo shijualo eno hipaqolo okuxu kumtsu tsulo, tishianguno kumtsu pelo noye kiutoi thuwulu anikeno ithulupelo.

¹⁶ Olikhi ojukuto eno okukutsu jukutolo. Phekevino pukaputsalo, kughengu nono hipaqo shiaye olikhi oxalu eno otsa chilukemi xakulupu shi nani.