1 Tim. 3 - BAIBEL (BSI)

Akukuholo Sakiphemi

¹ Timi lakhino akukuholo sakiphemi shinishiqhiyi aye paye ashekha aghilepu kumlalo pa mlo belu anie, ipikeu tsa hiye kuchouke.

² Kughengu akukuholo sakiphemi lakhiye akipimi kuhakemi shimasae. Paye anipu lakhi likhi akemi shimasa, tsukhuyikemi alikhi aghasulukemi eno aghola kithikiyikemi shimasa. Paye inami sasuthikemi eno shikathikemi shimasa.

³ Paye shokumzumi shimoni momu anguka vesukemi shimoni ikemu ivunheyi eno iquighai kemi shimasa. Paye pisa kiminemi shimoni.

⁴ Paye akivishi pa kibo peithalukemi shimasa eno pa ti-anulino thwokhalo pa gihulu chekemi shimasa.

⁵ Kughengu timi lakhino pa kibo peitha nikeu mtha aye paye kishieno Alhou kukuhou tuchohejuluni kya?

⁶ Anileshi Khristo chineyeh lukemi timi shiaghikepu kumoe, tikumoaye pa ye aqhekuza launo kumobeyive puzu Tughami paphi shighi kughakuthapulo iloveno sake.

⁷ Pa ye akukuho kumomiqo gholo ghi pa ghili kivi pikemi aghimasae, tishianguno pa pipusamo nani eno Tughami lichhelo ilomo nani.

Akukuholo Dikonmi

⁸ Tihutoi akukuholo akukuphumi ghi mutsumisheyikemi shimasa, amili shobakupumi shimoni, aji shomoni; momu alakiminemi shimoni,

⁹ eno kivikusa-mlo tsughukhuyi xapusu pepiyevekeu kupulu tsuqupesu amayesa.

¹⁰ Panongu ghi kiutoi anikeno pu-ju paghi kepu eno panongu pujukelo achipishi aghikethiuno panongu pelo akukuholo akukuphumi kumla shipe kepue.

¹¹ Panongu nipu ghi mutsumisheyi kemi shimasa kutami ghili kughakemi shimoni; panonguye tsukhuyikemi eno thwokhalo pichhebe kulumi shimasa.

¹² Akukuholo akukuphumiye anipu lakhi likhi akemi shimasa eno pa tianuli ngo pa kibo akivishi peitha lukemi shimasa.

¹³ Khunoqono akumla kivi shinikeno pano likhi pano ghenguno akivishi puthugho kulupu qeluani eno Khristo Jisu lau xukimepe akeu nikupulu akeu mutotoi shilu cheni.

Nichineyeh Tuqhou

¹⁴ Niye kushuwa kumolo nongu lau ighinikeu kumsu ani kemu nongu lau hipaqo yelu ani, tishianguno

¹⁵ ino munuvekepu shive namu nonguye Alhou kibolo, xuachekeu Lhou kukuhoulo kishi mlaithakepu keno hipau yesu lono ithipeniyeke. Akukuhouye kuchou tsukucho eno aboqhake.

¹⁶ Ningu chineyeh tuqhouye kiutoi kije keno khunomu moe pimlakeu ke! Pano timi phi-ashi shi ighike, Achipi kepi Aghungu no piyeve. Paye kungumino ithulupuani, Judakumomi gholo pa pesu pikulhave. Ayeghiqha kumtsulo pa puluwove, Akimthejukuvu lono pa sasu ikuve.