1 Tim. 2 - BAIBEL (BSI)

Akukuholo Akumlla Hoho

¹ Tishiaye thwokha kumtsu nguno akhotoushi ino hakite akeuye timi kumtsu ghenguno Alhou vilo khulo, akighini shilo, qhuiniju lo eno shikimthikeu tsulo;

² kukami ngo ayehkipemi ghenguno inikhu tsulo, tishianguno thwokha lalo Alhou lau amlo tsuqhiyi eno kithikiyikeu ghola lono ningu pelo iquneikeu eno alokughuno kuxu xulupenike.

³ Hitoikeuye alokepuke eno Alhou ningu xakuluu pulouke,

⁴ paye timi kumtsu xaluve penishi eno kuchou ithi penishike.

⁵ Kughengu Alhou ye lakhike eno Alhou ngo timi dolo alashikutsuuye lakhi, tiye timi Khristo Jisu ke.

⁶ Timi kumtsu xachilelu nike pano pa ampi tsuveke, ikehu ado achipi lono Alhou no timi xalu nishi akeu shepe shike.

⁷ Hipau ghenguno ipelo Judakumomi vilo akupulu ngo kuchou tsape pesu asheshupe nike apostolmi lakhi eno akukutsuu lakhi shi susuno puwuke. Niye kuchou tsa piani kethono miki amoe.

⁸ Kuhoke kumtsulo niye kiptimi pelo inikhu penishi. Ikehu, kiptimi khunoqono akuxu pesu Alhou tsuveakeno tipaqo ye aqha kumtsulo a-u peqhe pesu akighini shipenishi keuno ipulouke, ikemu timi tipaqoye axuidekeu eno mutomushukeu shimokepue.

⁹ Niye totimi pelo ghi pano phimini aghibiu eno akuzupu-u shipenishi eno kithikiyi pepu penishike. Panonguye ajelishi asa pilipu,shunano shikeu chi,achiku,amekusho phimini pepu penishi moe,

¹⁰ ikemu Alhou lau amlo tsuqhiyi chekemi totimi ghenguno akuzupushi akeuye akumla kivi pepukepue.

¹¹ Totimi ye iquneyi eno qhoqhukeu shipuzu ithikupha nikemi shikepue.

¹² Niye totimi pelo kiptimi shika momu kiptimi shou ayeh penikeu pulo amoe; panonguye iquneyi masae.

¹³ Kughengu Adam paghi lhoke eno tithiuno Eva lhoke.

¹⁴ Adam pishiqhiluveke kumoe ikemu atotiu hu pishiqhiluveke eno Alhou yezah hechevekemi shiveke.

¹⁵ Tishiepimu totimino aghibiu lono akupulu, kikimiye eno akimthepushi xuaye panonguye atianuli akeu vechewo xakulupu shi nani.