1 Peter 4 - BAIBEL (BSI)

Xukithe Kuxu

¹ Khristo ye ningu ghenguno aphiashi lono aghimeshiveke ghenguno nongu ghi titoikeu kukumsu pesu nongu shikumtolulo, kughengu khunono aphiashilo aghime shicheni keno axinelo chhosumove cheni.

² Tishianguno ayeghilo kuxu hipau xuake thaqhulo ashiajino ngosukumla lono xumono Alhou pulou lono xuwuveniyeke.

³ Alhou mthakemiqono kiu shinishi chekeno tipau nonguno wovekeu tsalalo shichekeu huno kughokumovae. Nonguye kiptimi totimi mithemokeu, aghichikupo, shokumzu, mutomushu, akiyighe, kupughokile, ihughaloyi eno kuchhubekutsula ajulho shipeqhikeu mllakeu, hipaqo lono nongu kuxu xucheke.

⁴ Nonguno itehiye panoqo gholo tughashi kuxu eno ghasukumla kuxulo kulojimove kelauye hi Alhou mthakemiqoye nongu jupesu akichiqhi ani eno nongu xishi anike.

⁵ Ikemu panonguye kuxumi eno kithimi shou kughatha niye kutope akeu Lhou lau kihikulayi tsu nanike.

⁶ Hipau ghenguno Atsakiviu pesu kithimi vilo ghi kutughu wu peke, tishianguno panonguye aphimpi kuxuloye kutami lau toi kughakuthapu pesu panongu shou bevekemu, angughapu kuxu loye panongu pelo Alhou toi xulupe niyeke.

Alhou no tsukeu gho Peithakithimi

⁷ Ikemu thwokha kishekha nikeu kupunuvae; tighenguno nonguye akukhu kighini shilukepushi alikhi ampi ghasulu eno tsukhuyi shilo.

⁸ Thwokha kumtsu nguno alauno amlo tsuqhiyi lakhino lakhi kimiyekilelo, kughengu kikimiyeno axine kutomo nhaluvetsu chenike.

⁹ Nhenheshimono nongu kilo lakhino lakhi sasu kilelo.

¹⁰ Milakhi khino Alhou no kupukini gho ajeli tsukeu peitha kithimi shipuzu Alhou launo kiu gho ithulu keno tipau kutami kivipu ghenguno peithalo.

¹¹ Khunono asheshu cheni keno paye Alhou tsa pesu asheshulo, khunono kutami qe cheni keno paye Alhou no tsukeu kumto pesu qelo, tishianguno thwokhalo Jisu Khristo vechewo Alhou kimthe jekipipu shilupenike. Alhokupuju lono alhokupuju kutolo akimthe jukuvu eno ayehkipeqhaye pawuke. Amen.

Khristomi Ghime

¹² Ino kimiyechekeqo, nongu pejuniaye shilukusa ghime nongu shou ikughi akeulo akichiqhi kevilo. Tiye kiuala akumo akukuhau nongu shou ighi ani kughashi kevilo.

¹³ Ikemu Khristo ghime sasu kusaje anikepi alovilo, tishianguno pa kimthe jukuvu pephepiye kelo nongu ghi alokivino chhitoi peniyeke.

¹⁴ Nonguno Khristo timi shiveke ghenguno timino nongu thaigha aye tiye nongu lokivipue; tipau kiqiye Akimthe jukuvupu Ghungu, Alhou Ghungu no nongu shou anike.

¹⁵ Ikemu nongu gholo milakhimu timi ghikiqhi, akupuka, hekiqhi bukiqhi momu kutami kumla hekuxa ghenguno aghime shilukeu shikepu kumoe.

¹⁶ Tishimu nonguno Khristomi lakhike ghenguno aghime sholukepu shive napiaye tipaulo kujomuzakepu kumoe, ikemu Khristo je lono Alhou shikimthilo.

¹⁷ Alhou kibolomi shou paghi kughathabe keu huthunikepu ghuloki ighivae; eno ningu lau paghino huthutughu shiani aye Alhou tsakiviu pulumovekemiye ashekhalo kiu kishive nani kya?

¹⁸ Pipuakeu toi, “Amikuchomi ghi akushukulu xalukepu shiaye; Alhou kuha pichekemi eno axinemiye kiu shive nani kya?”

¹⁹ Tighenguno khunoqono Alhou pulou lono aghime sholuni keno achipiu mlalo eno panongu kuxu pesu Lhokusuu lau pichebeve pelo.