1 Peter 1 - BAIBEL (BSI)

¹ Jisu Khristo wu apostol Pitor no Pontu, Galatia, Kapadokia, Asia eno Bithiniya lo Apanagha hapiyepighi pesu akemiqo lau yelu ani.

² Nonguye Apu Alhou no kumsupulope akeu kiqi lono kisheluvae eno Aghungu Kimthe no shikimthe pesu Jisu papelupeni eno pa ji pesu mitheluve peniyeke. Kupukini ngo alokiqipu nongu lau kighishelu apeniu!

Xuakeu Lajupu

³ Ningu Mpeu Jisu Khristo paPu Alhou shikimthilo! Kughengu pano kimiyeqhiyi kehu akithi lono Jisu Khristo xuchile puthu vekeu vechewo ninguye xuakeu lajupulo akuxu kithe shiluvae,

⁴ eno puhavemla keu, shipusamla keu, thibuyimo keu mheghi nongu ghenguno kungughalo qhipuanike.

⁵ Nongu kupulu vechewo Alhou kukano nongu susho pesu ani eno ashekha ghulokilo pephepiye nike ghenguno xakulupu kutope ani.

⁶ Highenguno, itehiye ado kitila ghenguno nonguye akijikusapu jelilo aghime shiaghi namu nonguye alokivipuke.

⁷ Hitoikeulo akimji anike, tiye nongu kupulu pesu athicho kughulhotsu niyeke. Shunayi ghi shipusaluve cheni kemu ami lono pitiju cheni; tishiaye nongu kupuluye shunayi nguno amekushou kehu puqhelukepushi peju masae, tishianguno Jisu Khristo pephepiyeke Tsalalo nonguno shekiqhe, akimthe jukuvu eno agigihu ithulukepu shi nani.

⁸ Nonguye pa ithulumo kemu nonguno pa kimiye cheni; nonguye itehi pa ithumla pinamu nonguno pa pulu cheni; ikehu nonguno akiqheu eno atsano piphekumla lokivi lono alokiqishi ani,

⁹ kughengu nongu kupulu kimijiye nongu ngulho xakulupu shilunike.

¹⁰ Tungkupmi khunono Alhou wu kupukini nongu wu shinikuau atsape shichekeno kishekulushi xakulupu hipau ghili phukidekudaju.

¹¹ Khristo Ghungu panoqo lolo akeuno Khristo no aghimeshi ime nikeu eno tipa shelo akimthejukuvupu shinikeu puzuuno asheazushi pikeu huye kiutoi kemi eno kiu tuqhu dolo kichesutsu ani keno panonguno pukaputsa phuphejuke.

¹² Alhou no tungkupmi lau piyesukeuno panonguno mla akeuye panoqo vehupu ghenguno kumono hi nongu ghengunoke; tihu itehiye nongu lau kuchou pikulhavekeu vehuke. Tiye Atsakiviu pikulha chekemino Aghungu Kimthe, kungugha lono puwukeu vechewo nongu vilo pikulhavae. Hipaqo vehuye kungumi ghi junishikutu cheke.

Akimthe kuxulo Kukulu

¹³ Tighenguno nongu kukumsu kutokugho shilulo, tsukhuyilo, nongu wu lajupuye akuchopu Jisu Khristo pephepiye kelo Alhou kukumgha nongu lau tsuniye akeu shou belo.

¹⁴ Aghokulumi shiluvelo eno nonguno puzuu ayekumthalo achekelo ngosukumla gholalo nongu kuxu pepimhe kevilo.

¹⁵ Ikemu nongu kulukeu Lhou ye akimthe kehu nongu ghi suqesuli kumtsulo akimthe shilo.

¹⁶ Kughengu kuchoyesulo ishi yepuanike: “Niye akimthe ke ghenguno nongu ghi akimthe shilo.”

¹⁷ Timi kumtsu shou agijumono pututa kumla kiqi lono kughathabeche keu vilo Apu ipi inikhu cheni aye ayeghilo izucheke kuxu kupujulo nonguye pa sumsaghi mlaithalo.

¹⁸ Kughengu nonguye apuasuqo launo adou laghi pepimhe susu cheghikeu lono amekusho kiu tsu puzu nongu xaphelu keno nonguno ithi ani. Tiye hauvekepu thime shunayi momu tsandiyino kumoe,

¹⁹ ikemu bheri tukutiye kuhakeu jih toikeu Khristo jih amekusho pesu nongu xapheluke.

²⁰ Ayeghiqha ghomphi lono paye kishephepe puaveke ikemu nongu ghenguno hi kishekhakeu tsala lono pephepiyevae.

²¹ Pa vechewo nonguno Alhou shou pulubekeu ani, pano akithi lono Khristo xuputhuve eno akimthe jekipi pa tsue, tishianguno nongu kupulu eno lajupuye Alhou shou apeniyeke.

²² Itehiye nonguno kuchou lau aghokulu shino nongu kuxu shikimthevae eno kupulumi akusamiqo mutsuqheyino kimiyekeu anie, tishiaye nonguno amlo tsuqhiyi shino lakhino lakhi kimiyekilelo.

²³ Nonguye tsu-mauve nikeu piti lono kumoe ikemu tsu-mamlakeu piti, akuxupu eno pulhapuju ache nikeu Alhou tsa vechewo nonguye akitheshi punuvae.

²⁴ Kughengu kuchoyesu lono pi, “Timi jeli kumtsu atsuni toike, Eno timi jekipi kumtsu atsunikupu toike; Atsuni thive cheni, eno atsunikupu ighiqive cheni,

²⁵ Ikemu Ampeu tsaye alhokupuju acheni.” Atsa tipauye nongu lau Atsakiviu khikhi pikulha keno tike.