1 Kor. 3 - BAIBEL (BSI)

Alhou Kumlakishimi

¹ Athikuzumiqo, niye Aghungu lono xuchekemi putsa kehutoi nongu putsamlae, tishinike zuqhu inapughami timi vilo toi eno anga kughunu vilo toi nongu putsa kepu shivae.

² Niye akumto chuqupu kumono akichhizu pesu nongu loji kepu shivae, kughengu nonguno akumto chuqupu chumlake. Itehimu nonguye tipau chumla aphike,

³ kughengu nonguye inapughami qhemilo xu aphike. Kughou nongu dolo anhekushu eno mutomushu keu ani keno, nonguye inapughami aqhemi kekumo kesha? Eno inapughami paphi lono xuanike kumokesha?

⁴ Kughengu nongu gholo khamino, “Niye Paul laumike,” ipi aye, kutami khamino, “Niye Apollo laumike” ipi keu huye nonguye inapughami paphi kekumo kesha?

⁵ Maye, Apollo ye kushikemi eno Paul ye kushikemi kya? Ninguye aqemiqoke,Ampeu no pututa shelo akumlapu kophetsu puani, eno ningu vechewo nonguno pululuke.

⁶ Ino abo shosu, Apollo no azu pusuke, ikemu abo thuwulupe keuye Alhou noke.

⁷ Ikehu shosukeu pina azu pusukeu pinamu akhoto kumoe ikemu Alhou likhino akhoto ke, kughengu pano abo thuwulupeke.

⁸ Abo shosukeu timi ngo azu pusukeu timi pama dolo kutuqukeu kiumu kuhae, pututano mla-sukeu qhemi pututa jume Alhou launo ithulu nani.

⁹ Kughengu ninguye Alhou ghenguno kumtsa mla kuqha chekemi akusamike, eno nonguye Alhou nowu akialu ke.

¹⁰ Alhou no kupukini itsukeu peitha puzu aki kishimi shitsami lakhi toi shieno ino aboqha hu qhawoke, ikemu kutamino tipau shou shipuku ani. Pututano paye tipau shou kishi shipuku nikeno jukutokupuyi masakeu ani.

¹¹ Kughengu aboqha khikhi qhave akeno tiye Jisu Khristo ke, tipau nguno alauye kutau boqha khunomu qhamlae.

¹² Timi khamino shunayi momu tsandiyi momu akughupu-tu peithano aboqha shou aki shipuku aghiluvi ikemu kutamiye asu momu atsani momu aghijini peitha puaghiluvi.

¹³ Timi lakhikhi kumla asachu kemokeno piyeni aphi, tiye Khristo ipeghikeu Tsalanino tipau pephepiye nani, kughengu tipa Tsalaniye ami gholono ipeghi nani eno milakhi khino kiutoikeu kumla mla puaghi nikeno asachu kemokeno amino ghu puzu kimchitsu nani.

¹⁴ Khuno kumla aboqha shou shipuku keu pitipuha mlanikeno tipanoye asaxu lakhi ithulu nani.

¹⁵ Ikemu khuno kumla pitipuhaveni keno paye asaxu ithumlave nani, ikemu pa ampiye ami hechesu polu akeshi kethono xalu nani.

¹⁶ Nonguye Alhou chineki ke eno Alhou Ghungu no nongu lolo acheni kepi nonguye mtha kesha?

¹⁷ Timi khunono Alhou chineki kutsa-kungoni keno Alhou no pa kutsa- kungo nani. Kughengu Alhou chinekiye akimthe ke, eno nonguye achineki tipauke.

¹⁸ Timi khumu alikhi ampi pishiqhi kepu kumoe. Nongu gholo khualano paye hipa yeghi gholalo asuqe kighithimi kepi kumsu aghi aye, paye asuqekighithimi kuchou shinike ghenguno mbomzumi lakhi shivekepue.

¹⁹ Kughengu hipa yeghilomino kiu pesu asuqe kighithi kepi picheni keno Alhou zulo tiye mbomzuke. Tiye kuchoyesulo ishi yepuake toi, “Alhou no alokutsumiqo panoqo muqukini lono meluve cheni”

²⁰ eno kuchoyesu kutaulo ghi ishi yepuani, “Alhou no asuqe- kighithimi kukumsu ithi anike tipaqoye abokumsake.”

²¹ Ikehu khumu timi pukhupe qheza pekevilo. Kughengu thwokha kumtsu nongu wuke:

²² Paul na Apollo na Pitor na ayeghiqha na akuxu na akithi na itehi akeu na ighinikeu pinamu thwokha kumtsu nongu wuke;

²³ eno nonguye Khristo wuke, eno Khristo ye Alhou wuke.