1 John 4 - BAIBEL (BSI)

Kuchou eno Kichileu Ghungu

¹ Kimiyechekemiqo, Aghungu aniepikeu jeli kumtsu pulube kevilo, ikemu tipaqoye Alhou launo ighikeo mokeno miqejulo. Kughengu kichile tungkupmi kutomo ayeghilo ipevae,

² Alhou Ghungu kemokeno nonguno hipau lono ithilu nani: khunono Jisu Khristo ye timi shiaji lono ighikepi ikhiluni keno Alhou launo ighikeu Ghungu ani.

³ Ikemu khunono Jisu ye timi shiaji lono ighikepi pimoni keno tiye Alhou launo ighikeu Ghungu kumoe. Tiye Khristo Kimthiu launo ighikeu ghunguke. Khristo Kimthiu ighiniepi chekeu nonguno chiluvae eno itehiye ayeghiqhalo auvae.

⁴ Ikemu itianuliqo, nonguye Alhou laumike eno kichile tungkupmi shou theqhiluvae, kughengu Aghungu khipau nongu lolo anikeno paye ayeghi laumi gholo akeu nguno akijeuke.

⁵ Panonguye ayeghi laumike, tighenguno ayeghilo akeu ghili picheni eno ayeghi laumino panonguno pikeu ini cheni.

⁶ Ikemu ninguye Alhou laumike. Khunono Alhou ithitoi anikeno nino pikeu ini cheni eno khunono Alhou laumi kumokeno nino pikeu ini chemoe. Kuchou Ghungu eno kichileu ghungu kuma dolo kutuqu akeu hipau lono ninguno ithi cheni.

Alhou ye Kikimiyeu

⁷ Kimiyechekemiqo, ningu lakhino lakhi kimiyekileni nolo, kughengu kimiyekeuye Alhou launo ighike. Khunono kimiye cheni keno paye Alhou nuli shiluvekemike eno Alhou ithitoi ani.

⁸ Khunono kimiyechemo keno paye Alhou mthae; kughengu Alhou ye kimiyekiniuke.

⁹ Alhou kikimiye ningu gholo pephepiyeve keuye hipauke: Alhou no paNu akighipi akeu pesu ayeghiqhalo puwutsu, tishianguno pa vechewo ningu pelo xulupeniyeke.

¹⁰ Kikimiye ye hipauke: ninguno Alhou kimiyeke kumoe ikemu pa no ningu kimiyeke eno pa Nu puwu puzu ningu xine pevetsu nike ghenguno aghakishiu shivepeke.

¹¹ Kimiyechekemiqo, Alhou no hitoi shishe ningu kimiyeve aye ningu ghi lakhino lakhi kimiyekile kepuke.

¹² Timi khunomu Alhou ithulu mphie, ikemu ninguno lakhino lakhi kimiye aye Alhou no ningu gholo acheni eno pa kikimiyeye nilolo ani.

¹³ Ninguye Alhou sasu xukimepe ani eno pano ningu sasu xukimepe ani kepi nino ithitoi ani, kughengu pano pa Ghungu pesu nitsuvae.

¹⁴ Nino ithuluvae eno kutami vilo Apu Alhou Nu pelo ayeghiqhalo Xakuluu shipeniye puwu kepi ninguno ashepe shiani.

¹⁵ Khuno Jisu ye Alhou Nu kepi piphetsu nikeno paye Alhou sasu xukimepe ani.

¹⁶ Ikehu Alhou kikimiye nilau akeu nino ithitoilu eno pulubeluvae. Alhou ye kimiyekiniuke, khunono kikimiyelo xu acheni keno Alhou sasu xukimepe acheni eno Alhou no pa sasu xukimepe acheni.

¹⁷ Hipau lono kikimiye nilolo shikupuluvae tishianguno kughakuthapu Tsalalo ninguye amlo kuloghi shilupe niyeke, kughengu Khristo no ayeghilo kishi akeno ninguye titoi acheni.

¹⁸ Kikimiyeloye musaighukepu kuhae, ikemu kikimiyelo viwotokuluno musaighukeu haphevetsu cheni. Tighenguno khunono musaighu cheni keno kikimiyelo viwotolu chemoe, kughengu musa ighukeuye ghimeqhikepu gholo lakhike.

¹⁹ Ninguno kimiye cheni, kughengu Alhou paghino ningu kimiyeke.

²⁰ Timi khuno, “Niye Alhou kimiye cheni” ipi puzu athikuzumi mithi cheni keno paye kimkimi lakhike. Kughengu khunono pano ithulu chekeu athikuzumi kimiye chemokeno, paye ithulu chemokeu Lhou kimiye mlae.

²¹ Khristo no ahza ningu tsupua keuye hike: khunono Alhou kimiye cheni keno athikuzumi ghi kimiyelu kepue.