1 John 3 - BAIBEL (BSI)

Alhou Nuliqo

¹ Apuno kishi shishe ningu kimiyeve akeno julo. Pa kikimiye ighono kije ke ninguye Alhou nuliqo kepi kuluvae, eno kuchouno ninguye tike. Highenguno ayeghilomino ningu mtha eno Alhou mtha ishike.

² Ino kimiye chekemiqo, itehi ninguye Alhou nuliqoke ikemu ninguye kiu shiuve nani keno pephepiye mphike, ikemu kughou Khristo no ipeghini keno ninguye pa toive nani kepi nino ithi ani, kughengu paye kuchouno kiukeno ninguno ithulu nani.

³ Khunono Khristo lau lajupu hipau anikeno Khristo no akimthe kehu timi tipau ghi akimthe shi xu cheni.

⁴ Khunono axine shi cheni keno panoye Alhou yeh hekuxa kipimi shiani, kughengu axineye ayezah hekuxauke.

⁵ Nonguno ithianike Khristo no ipeghikeuye axine ikhisuwuve niyeke, eno pa lolo axine kiumu kuha.

⁶ Ike khunono Khristo gholo xukimepe anikeno axine shichemoe; ikemu khunono axine shi cheni keno khilemu pa ithumla momu pa mthake.

⁷ Itianuliqo, timi khuu pelomu nongu pishiqhipe kevilo. Khristo ye amikucho kehu khunono achipiu shi cheni keno tipanoye amikuchoke.

⁸ Khunono axine shi cheni keno panoye Tughami laumike; kughengu Tughami ye abothu lono axine shiveake. Alhou Nuno ipeghikeu kiqiye Tughami no mulapuakeu shipusave tsu niyeke.

⁹ Khunono Alhou nu shiluve akeno axine shi chemoe; kughengu Alhou lhoayeh pa lolo achenike, eno paye axine shimlae, kughengu paye Alhou nu shiluveake.

¹⁰ Alhou nuli ngo Tughami nuliqo dolo kutuqu akeuye hipau lonoke: khunono achipiu shi chemo keno Alhou laumi kumoe eno khunono athikuzumi kimiye chemo keno tipaqoye Alhou laumi kumoe.

Lakhino lakhi Kimiyelo

¹¹ Kughengu abothu lono nonguno chiluvekeu tsaye hike: ninguye lakhino lakhi kimiye kepue.

¹² Ninguye Kain toikepu kumoe; paye Alhoksau laumike eno pa thikuzuu Abel heqhi pithiveke. Paye kushiye pa thikuzuu heqhipithive kya? Kughengu pa kumlaye alhoksake eno pa thikuzuu kumlaye achipi kehue.

¹³ Athikuzumiqo, tishiaye ayeghilomi no nongu mithikeulo nonguye akumzaqhiyi kevilo.

¹⁴ Nino ithi akeuno ninguye akithi hechesu akuxulo ipevae, kughengu nino athikuzumi kimiye achenike. Khunono kimiyekile chemo keno itehi kutolo akithilo achephike.

¹⁵ Khunono pa thikuzumi mithi cheni keno panoye timi ghikiqhimike, eno nonguno ithi anike, timi ghikiqhimiye panololo lhokta kuxu kuhae.

¹⁶ Kimiyekeuye kiu keno ninguno hipau lono ithi cheni: Khristo no ningu ghenguno pa kuxu pephetsuve, tishiaye ningu ghi athikuzumi ghenguno nikuxu pephetsu kepue.

¹⁷ Ikemu kinimi lakhino pa thikuzuuno aqu-agha shiakeu ithulu puzu pa thikuzuu tipau lau pa mlo xukhomo aye, kishi puzu Alhou kikimiye pa lolo kiu anie pini kya?

¹⁸ Atianuliqo, ninguye atsapilo likhino kimiyekeu shikepu kumoe ikemu akumla lono kuchou kikimiye piyekepue.

Alhou zulo Amlo Kuloghipu

¹⁹ Ninguye kuchou laumi kepi nino ithinikeuye hike, Alhou zulo amlokuloghi shilu nikeuye hipau lonoke.

²⁰ Tsala nimlono ningu kipimi shitsuaye, ninguno ithi anike Alhou ye nimlo nguno akijeu eno pano thwokha ithi anie.

²¹ Ike, kimiyechekemiqo, nimlono akipimi ningu tsumoaye ninguye Alhou zulo amlo kuloghipu ani.

²² Ninguno pa vilo kiukiumu khukeu ninguno ithulu cheni, kughengu ninguno pano ahza tsukeu pelu cheni eno pa pulou shi cheni.

²³ Pano ahza tsukeuye hike ninguye paNu Jisu Khristo jelo pulube kepue eno lakhino lakhi kimiyekile kepue.

²⁴ Khunono Alhou zahkutsu pelu nikeno panonguye pa sasu xukimepe acheni. Alhou no pa Ghungu ningu tsukeu lono paye ni sasu xukimepe anikepi ninguno ithi ani.